Tag: model town

لاہور: انسدادِ دہشت گردی عدالت میں سانحہ ماڈل ٹاؤن کیس کی سماعت میں عوامی تحریک نےحکومتی ظلم سے متعلق شواہد کے انبار لگا دیے ‘دو گاڑیوں میں بھر کر ثبوت عدالت لائے گئے۔

تفصیلات کے مطابق انسداد ِدہشت گردی عدالت میں ماڈل ٹاؤن استغاثہ کی سماعت شروع ہوئی تو عوامی تحریک کی جانب سے ماڈل ٹاون سانحہ کے متعلق شواہد اور ثبوت پیش کیے۔

ثبوت اتنی بڑی تعداد میں تھے کہ دو گاڑیوں میں لائے گئے ۔ عوامی تحریک کی جانب سے 120 ملزمان کے خلاف شواہد پیش کیے گئے ۔ عدالت میں 90 ہزار دستاویزات ، 800 سی ڈیز اور 7 ہزار تصاویر کے پرنٹ پیش کیے گئے ۔ اتنی بڑی تعداد میں ثبوت دیکھ کر واقعے میں ملوث ملزم پولیس اہلکار بھی ہکا بکا رہ گئے۔

عوامی تحرک کے مطابق ویڈیوز میں پولیس اہلکاروں کی فائرنگ اور تشدد کے تمام تر واقعات موجود ہیں ۔

دوسری جانب ڈی آئی جی رانا عبدالجبار اور ایس پی ڈاکٹر اقبال کی جانب سے حاضری سے استثنیٰ کی درخواست دی گئی جس کی عوامی تحریک کے وکلاء نے مخالفت کرتے ہوئے موقف اختیار کیا کہ مرکزی ملزمان کی ہر پیشی پر حاضری ضروری ہے‘ اس لیے درخواست مسترد کی جائے ۔

عدالت نے وکلاء کو مزید دلائل کے لیے طلب کرتے ہوئے سماعت 23 نومبر تک ملتوی کردی۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

لاہور: ہائی کورٹ نے سانحہ ماڈل ٹاؤن کی انکوائری رپورٹ طلب کرلی ‘ عدالت نے قراردیا کہ رپورٹ کا بند کمرے میں جائزہ لیا جائے گا۔

تفصیلات کے مطابق جسٹس عابد عزیز شیخ کی سربراہی میں تین رکنی بنچ نے حکومت کی جانب سے رپورٹ شائع کرنے کے عدالتی حکم کے خلاف اپیل کی سماعت کی اور رپورٹ کا بند کمرے میں جائزہ لینے کا فیصلہ کیا ۔

پنجاب حکومت کے وکیل خواجہ حارث نے اپنے دلائل مکمل کر لیے‘ انھوں نے عدالت کو بتایا کہ ماڈل ٹاون رپورٹ کی کوئی جوڈیشل حیثیت نہیں ہے‘ یہ حکومت نے اپنے لیے تیار کروائی تاکہ اصل حقائق معلوم ہو سکیں اور مستقبل میں ایسے واقعات سے بچا جا سکے ۔

حکومتی وکیل خواجہ حارث کا مزید کہنا تھا کہ اس وقت ماڈل ٹاون کا ٹرائل زیر سماعت ہے ‘ اگر رپورٹ شائع ہوئی تو اس سے مقدمے پر اثر پڑے گا۔سنگل بنچ نے حکومتی موقف سنے بغیر رپورٹ شائع کرنے کا حکم دیا‘ لہذا اس کو کالعدم قرار دیا جائے۔

ماڈل ٹاؤن رپورٹ سے فرقہ واریت پھیلنے کا خدشہ ہے*

دوسری جانب درخواست گزار کے وکیل نے دلائل دیے کہ حکومت رپورٹ شائع نہیں کرنا چاہتی مگر اس کے لیے ٹھوس وجوہات بھی بیان نہیں کر رہی کہ رپورٹ کو شائع کرنے سے کیا خدشات پیدا ہو سکتے ہیں۔

انہوں نے کہا کہ جو لوگ سانحہ میں جاں بحق یا زخمی ہوئے ان کے لواحقین کو حق حاصل ہے کہ وہ رپورٹ حاصل کر سکیں ۔عدالت نے سماعت ملتوی کرتے ہوئے حکم دیا کہ سانحہ ماڈل ٹاون کی رپورٹ آئندہ سماعت پر پیش کی جائے جس کا چیمبر میں جائزہ لیا جائے گا۔

عدالت نے پنجاب حکومت کے وکیل کے دلائل مکمل ہونے پر متاثرین کے وکلاء کو آئندہ سماعت پر دلائل دینے کی ہدایت بھی کی۔

یاد رہے کہ پنجاب کے وزیرِ قانون رانا ثناء اللہ نے کہا تھا کہ اس فیصلے پر ہائی کورٹ سے رجوع کریں گے اور ہائی کورٹ جو بھی فیصلہ کرے گی اسے قبول کریں گے‘ کیونکہ یہ معاملہ فل بینچ میں تھا لیکن آج کا فیصلہ سنگل بینچ نے دیا ہے جس پر ہمیں اعتراض ہے اور ویسے بھی باقر نجفی رپورٹ کا سانحہ ماڈل ٹاؤن کی تحقیقات سے کوئی تعلق نہیں ہے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

لاہور: ہائی کورٹ نے نوازشریف اور شہبازشریف کانام ای سی ایل میں ڈالنےکی درخواست قابل سماعت قرار دے دی ہے‘درخواست میں وزیرقانون پنجاب راناثنااللہ اورمشتاق سکھیرا کو بھی نامزد کیا گیا ہے۔

تفصیلات کے مطابق لاہور ہائی کورٹ میں نا اہل ہونے والے سابق وزیراعظم نواز شریف اور وزیراعلیٰ پنجاب شہباز شریف کا نام ای سی ایل میں ڈالنے کی درخواست کو سماعت کے لیے منظور کرلیا ہے‘ہائی کورٹ نے 2ہفتےمیں وزارت داخلہ سے جواب طلب کرلیا۔

یہ درخواست پاکستان عوامی تحریک کےرہنماخرم نوازگنڈاپورکی جانب سے دائرکی گئی‘ جس میں موقف اختیار کیا گیا کہ ہائی کورٹ نے سانحۂ ماڈل ٹاؤن کی رپورٹ منظرِ عام پر لانے کا حکم دیا ہے‘ ملزمان مقدمے سے بچنے کے لیے بیرونِ ملک فرار ہوسکتے ہیں۔

باقرنجفی رپورٹ منظرعام پرلانے سے فرقہ واریت پھیلنے کا خدشہ ہے

خیال رہے سانحہ ماڈل ٹاؤن کے لواحقین نے اپنی درخواست میں مؤقف اختیار کیا تھا کہ سانحہ ماڈل ٹاؤن کا کیس زیر سماعت ہے جس کی تفتیشی رپورٹ منظرعام پر نہیں لائی جارہی‘ عدالت نے درخواست پر فیصلہ سناتے ہوئے حکومت کوباقر نجفی رپورٹ کو جاری کرنے کا حکم صادر کیا تھا۔

دوسری جانب صوبائی وزیر قانون رانا ثناء اللہ نے عدالتی فیصلےپر ردعمل دیتے ہوئے کہا تھا کہ باقر نجفی رپورٹ منظرعام پر آئی تو فرقہ واریت پھیلنے کا خطرہ ہے تاہم قابل اعتراض حصے کے علاوہ رپورٹ منظرعام لانے کو تیار ہیں۔

یاد رہے کہ 3 سال قبل لاہور کے علاقے ماڈل ٹاؤن میں پولیس کی جانب سے منہاج القرآن مرکز کے ارد گرد سے رکاوٹیں ہٹانے کے نام پر آپریشن کیا گیا جہاں کارکنوں اور پولیس کے درمیان مزاحمت ہوئی اور اس دوران پولیس کے شدید لاٹھی چارج کے سبب 14 افراد جاں بحق اور درجنوں زخمی ہوگئے تھے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔