لاہور:امیرجماعت اسلامی سراج الحق نے کہا ہے کہ آزادی مارچ کرنا عمران خان کا جمہوری حق ہےمگر وہ پاکستان میں آئین جمہوریت اورآزادیوں کےساتھ ہیں۔
لاہورمیں عمران خان سےملاقات کےبعد میڈیا سے گفتگو کرتے ہوئے سراج الحق نے کہا کہ حکومت نے پنجاب اوراسلام آباد میں کنٹینرلگا کراپنی خوفزدگی پوری دنیا میں عیاں کردی ہے،احتجاج کرنااورآزادی مارچ نکالتے ہوئےاسلام آباد تک جانا عمران خان کا جمہوری حق ہے وہ اس بات سے خائف ہیں کہ احتجاج کےنتیجےمیں کہیں جمہوریت ڈی ریل نہ ہو جائے۔
سراج الحق نےکہا کہ انکی جماعت پاکستان میں جمہوریت آزادیوں اورآئین کے حق میں ہے۔
لاہور:چودہ اگست کی حکمت عملی طے کرنےکیلئے پاکستان تحریک انصاف اور پاکستان عوامی تحریک کا مشترکہ اجلاس آج ہوگا۔
آزادی اورانقلاب مارچ پرحکومتی حلقوں میں ہلچل کےبعد پاکستان تحریک انصاف اور پاکستان عوامی تحریک بھی لائحہ عمل طے کر رہی ہیں،انقلاب مارچ روکنےکیلئےپنجاب حکومت نےسرجوڑے ہیں توعمران خان، ڈاکٹر طاہر القادری، چوہدری برادران اور شیخ رشید کی گرفتاری کی باتیں بھی ہورہی ہیں،جس کے جواب میں چودہ اگست کی حکمت عملی طے کرنے کے لیے پی ٹی آئی اورپی اے ٹی کا مشترکہ اجلاس طلب کر لیا گیا ہے۔
تحریک انصاف کی جانب سے شاہ محمود قریشی، جہانگیر ترین اوراعجاز چودھری شریک ہوں گےجو پی اے ٹی کے رہنماؤں ڈاکٹر رحیق عباسی، خرم نواز گنڈا پور،شیخ زاہد فیاض اورقاضی فیض کے ساتھ حکمت عملی طے کریں گے۔
تحریک انصاف کا وفد علامہ طاہرالقادری سے ملاقات بھی کرے گا، بتایا جارہا ہے کہ پی ٹی آئی کےسربراہ عمران خان آج شام داتا دربار حاضری دیں گے۔
لاہور: عمران خان کہتے ہیں طاہر القادری سے انتخابات کے ذریعے انقلاب کی بات کی جائے گی، چودہ اگست کے بعد وہ خود وزیراعظم کو ملاقات کی دعوت دیں گے۔
چودہ اگست کو آزادی مارچ اور انقلاب مارچ ساتھ ساتھ ہوگا اور عمران خان نے آزادی مارچ کے بعد اپنی پہلی ترجیح بھی بتا دی،تحریک انصاف کے چیئرمین عمران خان کہتے ہیں یہ پورے پاکستان کی آزادی کا معاملہ ہے۔ علامہ طاہر القادری سے بات کی جائے گی کہ وہ انتخابی انقلاب کے ذریعے اٹھارہ کروڑ عوام کی زندگیوں میں انقلاب لائیں۔
عمران خان علامہ طاہر القادری سے انتخابی عمل میں اصلاحات کی بات کریں گے، کپتان پہلے ہی کہہ چکے ہیں وزیراعظم نواز شریف کے استعفے اور وسط مدتی انتخابات کے مطالبات کی منظوری تک وہ اسلام آباد میں بیٹھے رہیں گے،عمران خان کہتے ہیں چودہ اگست کے بعد وہ خود وزیراعظم کو ملاقات کی دعوت دیں گے۔
پاکستان تحریک انصاف (پی ٹی آئی) کے سربراہ عمران خان نے چودہ اگست کو وزیر اعظم میاں محمد نواز شریف کےاستعفے کا مطالبہ کیا۔
عمران خان نے اےآروائی نیوز کے پروگرام کھرا سچ میں کہا، نوازشریف پہلے استعفی دیں پھر ہی کوئی بات ہوگی اور وہ ہر قیمت پراسلام آباد پہنچیں گے، انھوں نے طاہر القادری کی جانب سے لانگ مارچ کا ساتھ دینے کا خیرمقدم کیا ہے۔
عمران خان نے کہا کےان کا مقصد حکومت سے بات کرناکا یا کوئی سمجھوتا کرنا نہیں ہے اب کرپشن سے آلودہ پاکستان میں رہنانہیں چاہتا،انہوں نے دعوی کیا وہ رآٰٔۓ ونڈ محل کو فروخت کردینگےاور سارے پیسےغریب اور ضرورت مند شہریوں کے درمیان تقسیم کرنے کا وعدہ کیا۔
انہوں نے ہنس کر کہا کہ وہ یقین نہیں کرسکتےایک دن ایسا کہہ گےلیکن سابق صدر آصف علی زرداری نواز شریف کےمقابلے میں ایک بہترحکمران تھا۔
تحریک انصاف کے سربراہ چودہ اگست کو لانگ مارچ میں دوبارہ انتخابات کامطالبہ کریں گے۔
اسلام آباد: پاکستان پیپلز پارٹی کےرہنما خورشید شاہ نےکہا ہےملک میں تصادم کی صورتحال بنتی جا رہی ہے،اگرکچھ ہوا توذمےداروہ جماعتیں ہوں گی جن کی وجہ سے حالات خراب ہونگے۔
اسلام آباد سےجاری ایک بیان میں قائد حزب اختلاف خورشید شاہ کا کہنا ہےڈاکٹر طاہرالقادری نے نہایت خطرناک اعلانات کردیئے ہیں،اگرحالات خراب ہوئےتوذمہ دار کون ہوگا ،ملک میں تصادم کی صورتحال بنتی جاری ہے ان حالات میں سیکیورٹی اداروں کو الرٹ رہنا ہو گا۔
خورشید شاہ کا کہنا ہےدنیا میں جہاں بھی تشدد پسند تحریک چلی،ملک و قوم کو نقصان ہوا،خورشید شاہ نے اندیشے کا اظہار کرتےہوئےکہا حالات کی سنگینی سےلگتا ہے کہیں پورا سسٹم ہی ختم نہ ہو جائےان حالات سے زیادہ خطرہ جمہوریت کی لیے قربانی دینے والی جماعتوں کو ہے۔
اسلام آباد: پاکستان عوامی تحریک آج سانحہ ماڈل ٹاؤن اور ضرب ِ عضب میں شہید ہونے والے شہدا کی یاد میں یوم شہدامنارہی ہے جس کی مرکزی تقریب لاہور کے علاقے ماڈل ٹاؤن میں واقع منہاج القرآن سیکریٹیریٹ میں منعقد ہوئی۔ تقریب سے خطاب کرتے ہوئے پاکستان عوامی تحریک کےسربراہ ڈاکٹر طاہر القادری نے کہا کہ ظلم کی انتہا ہوچکی ہے اور اب نہ ظلم رہے گا اور نہ ہی ظالم بچے گا۔
ڈاکٹر طاہر القادری نے اہنے کارکنان سے تین دن تک ماڈل ٹاؤن میں جمع رہنے کا حکم دیتے ہوئے تاریخ ساز اعلان کیا کہ تین دن تک یہاں شہدا کی قرآن خوانی ہوگی اور چودہ اگست کو انقلاب مارچ روانہ ہوگا جو عمران خان کے آزادی مارچ کے ساتھ مل کر اسلام آباد جائے گا۔ انہوں نے یہ بھی کہا کہ ساتھ مل کر حکمرانوں کے خلاف جدوجہد کریں گے۔
پاکستان عوامی تحریک کے سربراہ ڈاکٹر طاہر القادری نے تقریب کے شرکا سے خطاب کرتے ہوئے کہا کہ آج ضرب ِ عضب کے شہدا ، سانحۂ ماڈل اور ملک بھر میں دہشت گردوں کے ہاتھوں شہید ہونے والے شہدا سے خراج ِ تحسین پیش کرنے کا دن ہے۔
علامہ ڈاکٹر طاہر القادری نے خطاب کے آغاز میں پاکستانی قوم کے چنیدہ مسائل کا ذکر کرتے ہوئے ان کے حل کے لئے اللہ تعالیٰ سے مدد کی دعامانگی۔
انہوں نے جلسے کے شرکاء کے جذبے کو سلام پیش کرتے ہوئے کہا کہ انقلاب کوئی پھل نہیں جو آسانی سے جھولی میں ڈال دیا جائے ، دنیا بھر میں جہاں کہیں آج ترقی اور آزادی ہے اس کے پیچھے قربانیوں کی طویل اور لازوال قربانیوں کی داستانیں ہیں۔ ظالم ابھی اور ظلم کریں گے لیکن پاکستان عوامی تحریک کی تاریخ ہمیشہ پر امن رہی ہے اور انقلاب کے راستے پرامن سفر کریں گے۔
انہوں نے انکشاف کیا کہ حکومت ان کے قتل کی سازش تیار کر چکی ہے اور عنقریب مجھے شہید کردیا جائے گا، انہوں نے حکمرانوں کو للکارتے ہوئے کہا کہ مجھے شہادت سے ڈر نہیں لگتا ، میں کسی کنٹینر میں نہیں بیٹھا ہوا جس کو مارنا ہے ا بھی آجائے۔ میں اس ملک کے عوام کے فلاح و بہبود کے لئے اور ان کے حقوق کے لئے فخر سے شہید ہوں گا۔
یوم ِ شہدا کی تقریب کے مناظر
ان کا کہنا تھا کہ میں پچھلے تیس سال سے ماڈل ٹاؤن کے اس ایک کنال کے مکان میں رہ رہا ہوں حکومت نے مجھ پر منی لانڈرنگ کے الزامات لگائے ، تحقیقات کرائیں اور آخر کار خود شرمندہ ہوئے کہ دنیا بھر میں میرے کوئی اثاثے نہیں ہے۔
انہوں نے اپنے کارکنوں سے کہا کہ انقلاب کی منزلیں بے پناہ سخت ہیں اور جو جانا چاہتا ہے وہ چلا جائے میں کسی پر زبردستی نہیں کروں گا۔ انہوں نے یوم ِ شہدا کی تقریب کے بعد کارکنوں کو مزید تین دن تک بیٹھنے کے لئے کہا جس پر شرکا ء نے انتہائی جوش و خروش سے ان کا ساتھ دینے کا اعلان کیا۔
ڈاکٹرطاہر القادری کا کہنا تھا کہ روز مجھ پر مقدمے قائم کئے جارہے ہیں کبھی اغوا کا ، کبھی کسی ایکسیڈنٹ میں مارے جانے والے کو ہمارے حساب میں ڈال دیا جاتا ہے لیکن آج دو مہینے بعد بھی ہمارے شہدا کے قتل کی ایف آئی آر درج نہیں کی گئی۔
حکمرانوں تحفظ کے نام پر ماڈل ٹاؤن کو غزہ بنادیا ہے سات روز سے شہری یہاں محصور ہیں اور کسی کو ان کی مدد نہیں کرنے دی جارہی یہاں تک کہ ایم کیو ایم کے وزرا کو کھانا لے کر بھی نہیں آنے دیا گیا۔
ڈاکٹر قادری نے کہا کہ ہم پاکستان کی سیاسی سماجی اور ہر سطح پر ہونے والی دہشت گردی کے مخالف ہیں اور ہم اس ملک سے دہشت گردوں سے پاک کر کے دم لیں گے۔
ڈاکٹر طاہر القادری نے حدیث کے حوالے سے کہا کہ ظالم حکومت کے خلاف ڈٹ جانا سب سے بڑا جہاد ہے اور اس وقت جتنی جماعتیں اور افراد اس حکومت کے خلاف ہمارے ساتھ ہیں وہ جہاد ِ افضل کررہے ہیں۔
ڈاکٹر طاہر القادری کا کہنا تھا کہ ہماری ساری جدوجہد انصاف اور مساوات کے لئے ہے ہم چاہتے ہیں کہ پاکستان کے عوام بھی اسی طرح بہتر زندگی گزاریں جس طرح ساری دنیا کے ترقی یافتہ ملکوں کے عوام گزارتے ہیں۔
ان کا کہنا تھا کہ موجودہ حکومت غاصب ہے اور ہر وقت پاکستان آرمی کہ خلاف سازشوں میں مشغول رہتی ہے جو کہ ہماری سرحدوں کی محافظ ہے ہم چاہتے ہیں کہ ہم نظام کو تبدیل کرکے پاک فوج کو نیا جذبہ عطا کریں۔
یوم ِ شہدا کی تقریب کے مناظر
علامہ طاہر القادری نے کارکنوں سے کہا کہ انقلاب کے لئے تیار ہوجائیں جو آپ پر ظلم کریں آپ ان کا ہاتھ توڑ دیں ظالم کو ظلم نہ کرنے دیں ، لڑائی نہیں کرنی لیکن جدوجہد کی حفاظت کے لئے دہشت گردوں کو پوری قوت سے پیچھے دھکیل دیں۔
ڈاکٹر طاہر القادری نے اپنے کارکنوں کو وصیت کی کہ اگر میں اس جدوجہد میں شریف برادران کا سازش کا شکار ہو کر قتل ہوجاؤں تو ان کو چھوڑنا مت۔ خون کا بدلہ خون ہے، میرا بدلہ ضرور لینا ہے۔
عوامی تحریک سے اظہار ِ یکجہتی کے لئے پاکستان تحریک انصاف، عوامی مسلم لیگ۔ متحدہ قومی موومنٹ، آل پاکستان مسلم لیگ ، مجلس وحدت المسلمین اور پاکستان مسلم لیگ ق کے رہنماؤں نے بھی تقریب کے شرکاء سے خطاب کیا۔
اسلام آباد: سابق صدر پرویز مشرف کا کہنا ہےان پر لگائے گئے تمام مقدمات سیاسی ہیں۔ اسلام آباد میں ورکرز کنونشن سے خطاب میں پرویز مشرف کا کہنا تھا کہ وہ آزاد شہری کی حیثیت سے ملک سے باہر جانا چاہتے ہیں۔
سابق صدر مشرف کو آل پاکستان مسلم لیگ کا چیرمین منتخب کر لیا گیا ہے۔انہوں نے پارٹی کنونشن سے خطاب کرتے ہوئے کہا کہ ان پر لگائے گئے تمام مقدمات بے بنیاد اور سیاسی ہیں۔
سابق صدر کا کہنا تھا کہ وہ آزاد پاکستانی شہری کی حیثیت سے باہر جانا چاہتے ہیں، انہوں نے سانحہ ماڈل ٹاؤن کی شدید الفاظ میں مذمت کی۔
سابق صدر مشرف کا مزید کا کہنا تھا ملک کے حالات بد سے بدتر ہوتے جارہے ہیں۔ حکمرانوں کا چاہیے کہ آپس میں تنازعات میں الجھنے کے بجائے ملک کی ترقی کی جانب توجہ دیں۔
کراچی:ایم کیوایم کےقائد الطاف حسین نے پولیس کی مبینہ فائرنگ سے پاکستان عوامی تحریک کے کارکنوں کے جاں بحق ہونے اور متعدد کارکنوں کےزخمی ہونے پرگہرے دکھ اور افسوس کا اظہار کیا ہے۔
ایک بیان میں الطاف حسین کا کہنا ہےکہ پولیس کاپرامن قافلوں پرتشدداورفائرنگ سمجھ سےبالاترہے،حکومت ریاستی طاقت کےاستعمال سےہرقیمت پرگریزکرے، انھوں نے اپوزیشن سےاپیل کی ہے کہ احتجاج قانون کےدائرےمیں رہ کر کیا جائے اور رہنما کارکنوں کو قانون ہاتھ میں لینے سے روکیں۔
الطاف حسین کا کہنا ہے کہ انسانی جانوں اوراملاک کونقصان پہنچانےسےہرممکن اجتناب کیاجائے،الطاف حسین نے مبینہ پولیس فائرنگ سےکارکنوں کےجاں بحق ہونے پر ڈاکٹر طاہر القادری سے دلی تعزیت کا اظہار کیا ہے اور زخمیوں کارکنان کی صحت یابی کیلئےدعا بھی کی۔
لاہور: ایم کیو ایم کے رہنماحیدرعباس رضوی کہتے ہیں کہ ملک کی سیاسی صورتحال کاجائزہ لے رہیں ہیں اور طاہرالقادری کی حمایت کافیصلہ مشاورت سے کریں گے۔
ایم کیوایم کاوفدسانحہ ماڈل ٹاؤن پرتعزیت کیلئے ڈاکٹرطاہرالقادری سے ملنے منہاج القرآن سیکریٹریٹ پہنچا۔ملاقات کے بعد میڈیا سے گفتگوکرتے ہوئے حیدرعباس رضوی کاکہناتھا ایم کیوایم نے ہمیشہ علامہ طاہرالقادری کی سوچ کی حمایت کی،حیدرعباس رضوی نے بتایا ملک کی سیاسی صورتحال کاجائزہ لے رہے ہیں کوئی بھی فیصلہ مشاورت سے کریں گے۔
پاکستان عوامی تحریک کے رہنما رحیق عباسی نے بتایا یوم انقلاب کی کال کیلئے مشاورت حتمی مراحل میں ہے۔
حیدرعباس رضوی کاکہناتھااسلام آباد میں فوج بلانے کے کیا فوائد ہیں اس کاپتہ توبعد میں چلے گالیکن ایسا کچھ نہیں ہوناچاہئے جس سے جمہوریت کودھچکالگے۔
کراچی:لاہورمیں ہونے والےافسوس ناک سانحہ ماڈل ٹاون کے خلاف تحریک منہاج القرآن کی جانب سے آج ملک گیراحتجاج کیا جائےگا۔
لاہور کے سانحہ ماڈل ٹاون کو ایک ماہ مکمل ہوگیا ، لیکن کوئی اہم کاروائی عمل میں نہ آئی جس پر تحریک منہاج القرآن آج ملک گیراحتجاج کرے گی۔
صدر پاکستان عوامی تحریک راحیق عباسی کے مطابق احتجاج کے سلسلےمیں لاہور ، اسلام آباد، ملتان ، کراچی ، ڈیرہ غازی خان اور پشاور سمیت سات بڑے شہروں میں بڑی احتجاجی ریلیاں نکالی جائیں گی۔
احتجاجی ریلیوں سے مسلم لیگ ق، سنی اتحاد کونسل ، وحدت المسلمین، تحریک انصاف اور جماعت اسلامی کی قائدین خطاب کرینگے۔
