نیو یارک : پاکستانی وفد کے سربراہ اور چیئرمین پیپلزپارٹی بلاول بھٹو نے کہا ہے کہ مودی کا مقبوضہ کشمیر اور نیتن یاہو کا فلسطین میں ظلم دونوں ایک ہی چہرے ہیں۔
یہ بات انہوں نے نیویارک میں پریس کانفرنس سے خطاب کرتے ہوئے کہی، بلاول بھٹو نے کہا کہ مودی کی پالیسیاں بھارت میں انتہا پسندی کو ہوا دے رہی ہیں۔
پاکستانی وفد کے سربراہ نے کہا کہ مودی اور نیتن یاہو دونوں انتہا پسند ہیں جو نفرت کو فروغ دے رہے ہیں، مودی کا مقبوضہ کشمیر میں اور نیتن یاہو کا فلسطین میں ظلم دونوں ایک ہی چہرے ہیں۔
بلاول کا کہنا تھا کہ مودی اور نیتن یاہو نےانسانی حقوق کی پامالیوں میں عالمی سطح پر بدنامی حاصل کی، مودی اور نیتن یاہو کی پالیسیاں خطے کےامن کی سب سے بڑی رکاوٹ ہیں، مودی اور نیتن یاہو کی حکومتیں نسل پرستی اور ظلم کی علامت بن چکی ہیں۔
انہوں نے کہا کہ مودی سرکار نے بھارت کو عالمی سطح پر تنقید کے مرکز میں لاکھڑا کیا ہے، مودی حکومت انسانی حقوق کی سنگین خلاف ورزیاں کررہی ہے، بھارت میں اقلیتوں کی حالت خراب کردی گئی ہے۔
چاہتے تو بھارت کے 20 طیارے گرا سکتے تھے
بلاول بھٹو نے کہا کہ دہشت گردی کو سیاسی مقاصد کیلیے استعمال نہیں ہونا چاہیے، بھارت نے بنا تحقیق پہلگام حملے کا پاکستان پر الزام لگا کر پاکستان کی سرحدی خلاف ورزی کی اور معصوم شہریوں کو نشانہ بنایا جبکہ وزیراعظم پاکستان نے غیرجانبدارانہ تحقیقات کی پیش کش بھی کی تھی۔
حملوں کے جواب میں ہماری فضائیہ نے بھارت کے 20طیارے لاک کرلئے تھے، ہم چاہتے تو بھارت کے 20طیارے گراسکتے تھے مگر ہم نے صرف 6تباہ کئے۔ پاکستان نے ان ہی طیاروں کو نشانہ بنایا جنہوں نے بمباری کی، بھارت نے میزائل داغے جس پر پاکستان نے مؤثر جواب دیا۔
بھارتی جارحیت اور پاکستان کی سرحدی حدود کی خلاف ورزی کے جواب میں پاکستان نے اپنا بھرپور دفاع کیا، بھارت کیخلاف کوئی جارحانہ اقدام نہیں کیا۔
امریکی صدر اور امریکی وزیرخارجہ نے سیزفائر کے لیے پہلا قدم اٹھاتے ہوئے اہم کردار ادا کیا، جسے سراہتے ہیں، سیزفائر سے پہلے دنیا کا امن خطرے میں تھا، دو ایٹمی طاقتیں جنگ کے دہانے پر آگئی تھیں۔
آئندہ ایسا واقعہ ہوا تو حالات درست کرنے کا وقت بھی نہیں ملے گا، صورتحال بگڑنے سے پہلےعالمی برادری کو کردار ادا کرنا چاہیے، پاک بھارت کی موجودہ صورتحال کا حل صرف ڈائیلاگ ہے، پاکستان بھارت کے ساتھ جامع مذاکرات چاہتا ہے۔
مودی اب کشمیر کا قصائی بن گیا
انہوں نے کہا کہ مودی پہلے گجرات کا قصائی بنا اب کشمیر کا قصائی بن گیا ہے، مودی اب پانی بند کرکے وادی سندھ کی تہذیب کا قصاب بننا چاہتا ہے، ہم پانی کو بطور ہتھیار استعمال نہیں کرنے دیں گے۔
بھارت کے ساتھ امن چاہتے ہیں لیکن شرائط پر نہیں، بھارت کی جانب سے پانی روکنا بین الاقوامی معاہدوں کی کھلی خلاف ورزی ہے، ہم پاکستان کا پانی روک دیا جائے تو ہم خاموش کیسے بیٹھیں؟
پانی روکنا دشمنی نہیں کھلی جنگ ہے،
بلاول بھٹو کا کہنا تھا کہ بھارت کی جانب سے دریاؤں کاپانی روکنا دشمنی نہیں کھلی جنگ ہے، پاکستان خاموش نہیں رہے گا، اپنے حقوق کادفاع کرےگا۔ پاکستان نے سب سے بڑے فورم پر دنیا کو خبردار کرتے ہوئے کہا کہ پانی لائف لائن ہے۔
دنیا کے کسی بھی ملک کی واٹر سپلائی بند کردی جائے تو ردعمل کیا ہوگا، دہشت گردی ہو یا مسئلہ کشمیر واحد اور بہترین راستہ ڈائیلاگ ہے۔ بھارت کو مذاکرات کےلیے ماحول پیدا کرنا ہوگا، پاکستان ہمیشہ تیار ہے، مودی کے پاس دو ہی راستے ہیں امن یا تباہی۔ غیر ریاستی عناصر کے ہاتھ میں فیصلہ دینگے تو دو ایٹمی طاقتیں آمنے سامنے ہوں گی۔ایٹمی جنگ چھڑی تو اثر پوری دنیا پر پڑے گا۔
