Tag: Molnupiravir

واشنگٹن: امریکی ادارے فوڈ اینڈ ڈرگ ایڈمنسٹریشن نے جمعرات کو فارماسیوٹیکل کمپنی مرک کی تیار کردہ اینٹی وائرل گولی ‘مولنوپراویر’ کے ہنگامی استعمال کی منظوری دے دی۔

تفصیلات کے مطابق ایف ڈی اے کی جانب سے گزشتہ روز فائزر کی تیار کردہ ٹیبلٹ پیکسلووِڈ کے ہنگامی استعمال کی منظوری دی گئی تھی، آج ادارے نے مرک کمپنی کی کووِڈ 19 کے علاج کے لیے بنائی جانے والی دوا مولنوپراویر (Molnupiravir) کی بھی منظوری دے دی۔

اس دوا کی منظوری بالغان میں معمولی اور متعدل کرونا انفیکشن کے علاج کے لیے دی گئی ہے، تاکہ کرونا وائرس بیماری کا براہ راست مثبت نتائج کے ساتھ علاج ہو سکے، بالخصوص ان مریضوں کا جنھیں شدید کرونا کا زیادہ خطرہ ہے، یعنی جنھیں اسپتال میں داخل ہونا پڑتا ہے یا موت واقع ہو سکتی ہے، اور جن کے لیے ایف ڈی اے کی طرف سے منظور شدہ متبادل کرونا علاج قابل رسائی یا طبی لحاظ سے مناسب نہیں ہے۔

امریکا میں فائزر کی کرونا دوا کے استعمال کی منظوری دے دی گئی

یہ دوسری CoVID-19 اینٹی وائرل گولی ہے جو بیمار لوگوں کو گھر پر لینے کی اجازت دی گئی ہے، اس سے پہلے کہ وہ اتنے بیمار پڑیں کہ اسپتال میں داخل ہونا پڑ جائے۔ مرک کمپنی نے امریکی حکومت کے ساتھ مولنوپراویر کے 3.1 ملین کورسز فراہم کرنے کا معاہدہ کیا ہے۔

ایف ڈی اے کے مشیروں کی جانب سے نومبر کے آخر میں مولنوپراویر کے استعمال کی سفارش کی تھی، اعداد و شمار سے پتا چلتا ہے کہ اس نے زیادہ خطرے والے بالغان میں اسپتال میں داخل ہونے یا موت کے خطرے کو 30 فی صد تک کم کیا۔

ٹوکیو: جاپان میں کرونا وائرس کے علاج کے لیے امریکی کمپنی کی دوا کی منظوری کا امکان ہے۔

تفصیلات کے مطابق جاپان کی وزارت صحت کا پینل امریکی دوا ساز کمپنی مرک کی تیار کردہ کووِڈ دوا molnupiravir کی منظوری دینے جا رہا ہے۔

این ایچ کے کے مطابق جاپان کی وزارت صحت کا پینل اس امر پر بات چیت کے لیے 24 دسمبر کو ایک میٹنگ کرے گا کہ آیا امریکی کمپنی مرک کی تیار کردہ منہ سے کھائی جانے والی کووِڈ 19 دوا کے استعمال کی منظوری دی جائے یا نہیں۔

یہ توقع ظاہر کی جا رہی ہے کہ یہ پینل مولنُوپِیراوِیر کے استعمال کی منظوری دے دے گا، پینل کی جانب سے منظوری کے بعد امکان ہے کہ چند روز کے اندر وزارت صحت کی جانب سے بھی اس کے استعمال کی منظوری مل جائے گی۔

جاپانی ماہرین کا کہنا ہے کہ مولنُوپِیراوِیر مریضوں اور طبی اداروں پر بوجھ کو کم کرنے میں مدد دے گی، کیوں کہ اس دوا کو گھر میں بھی لیا جا سکتا ہے اور اسپتالوں میں اس کا انتظام کرنا زیادہ آسان ہے۔

واضح رہے کہ جاپان کی وزارت صحت نے 16 لاکھ مریضوں کے لیے مولنُوپِیراوِیر کی خوراکوں کی ترسیل سے متعلق مرک سے پہلے ہی اتفاق رائے کر لیا ہے جب کہ دو لاکھ افراد کے لیے خواکیں رواں ماہ کے آخر میں پہنچنے والی ہیں۔