ARYNews.tv | Urdu – Har Lamha Bakhabar

Tag: Mom

  • ماں نے شیر خوار بچی کو سوئمنگ پول میں ڈبو کر مار ڈالا

    ماں نے شیر خوار بچی کو سوئمنگ پول میں ڈبو کر مار ڈالا

    امریکی ریاست جارجیا میں ایک ماں نے اپنی شیر خوار بیٹی کو سوئمنگ پول میں ڈبو کر مار ڈالا، پولیس کے مطابق ماں عملیات کے زیر اثر ہے۔

    امریکی میڈیا کے مطابق یہ واقعہ رہائشی اپارٹمنٹس کی بلڈنگ میں پیش آیا جہاں ماں اپنی 22 ماہ کی بچی کو عمارت کے مرکزی سوئمنگ پول کے قریب لے گئی۔

    پولیس کو اطلاع پہنچنے تک بچی ہلاک ہوچکی تھی، پولیس نے اسے پول کی تہہ سے نکالا۔

    پولیس کا کہنا ہے کہ جس وقت ماں کو گرفتار کیا گیا وہ برہنہ تھی اور عجیب و غریب حرکات کر رہی تھی، وہ مسلسل کچھ پڑھ رہی تھی جس سے بظاہر ایسا لگ رہا ہے کہ وہ کسی قسم کی مذہبی عملیات کے زیر اثر تھی۔

    پول کے پاس لگے سی سی ٹی وی کیمرے نے ماں اور بچی کو پول کے قریب جاتے، اور پھر ماں کو اکیلے واپس آتے ریکارڈ کرلیا۔

    پولیس نے ماں کو گرفتار کرلیا ہے اور گرفتاری کے 4 روز بعد اسے عدالت میں پیش کیا جارہا ہے۔

    پولیس کے مطابق انہیں اس سے قبل بھی خاتون کے گھر کے حوالے سے شکایت موصول ہوئی تھی، جہاں کسی نے بچی سے ناروا سلوک کی شکایت درج کروائی تھی۔

    پولیس نے وہاں پہنچ کر ماں اور بچی کو چیک کیا اور واپس چلی گئی۔

    بچی کا باپ بھی ساتھ رہتا تھا تاہم وہ اکثر شہر سے باہر سفر کرتا تھا اور وقوعے کے روز بھی گھر میں موجود نہیں تھا۔

  • چھوٹے بچوں کو گھر پر اکیلا چھوڑ کر، ماں کئی ماہ کے لیے دوسرے شہر روانہ

    چھوٹے بچوں کو گھر پر اکیلا چھوڑ کر، ماں کئی ماہ کے لیے دوسرے شہر روانہ

    امریکا میں ایک خاتون اپنے چھوٹے بچوں کو گھر پر اکیلا چھوڑ کر کئی ماہ کے لیے دوسرے شہر روانہ ہوگئیں۔

    امریکی میڈیا کے مطابق 31 سالہ خاتون کو ریاست الباما میں گرفتار کرلیا گیا ہے جہاں وہ گزشتہ کئی ماہ سے رہ رہی تھیں۔

    وہ اپنی 13 سال کی بچی اور 3 سال کا بچہ ریاست ٹیکسس میں اپنے گھر پر اکیلے چھوڑ کر آئی تھیں اور بظاہر ان کے واپس جانے کا کوئی ارادہ نہیں تھا۔

    والد اس دوران بچوں کو کھانا بھیج رہے تھے اور جب ایک روز بڑی بچی کے منہ سے اتفاقاً نکل گیا، کہ والدہ گزشتہ کئی روز سے گھر پر نہیں تو وہ فوراً ٹیکسس پہنچے جہاں بچوں کو گھر پر اکیلا پایا۔

    والدہ نے بڑی بچی کو دھمکی تھی کہ اگر اس نے والد کو بتایا کہ وہ گھر پر نہیں تو وہ اس سے بری طرح پیش آئیں گی۔

    پولیس کو اطلاع دیے جانے کے بعد خاتون کی تلاش شروع کی گئی اور بالآخر انہیں ریاست الباما سے گرفتار کیا گیا جہاں وہ ایک شخص کے ساتھ رہ رہی تھیں۔

    گرفتاری کے وقت خاتون کو کوئی پشیمانی نہیں تھی اور وہ مسکراتے ہوئے ہتھکڑیاں پہن کر پولیس کی گاڑی میں بیٹھیں۔

    پولیس نے بڑی بچی کو والد کے حوالے کردیا ہے جبکہ بچے کو، جس کے والد کوئی اور تھے، ایک قریبی رشتے دار کے حوالے کیا گیا ہے۔

  • کمسن بچی کو قتل کر کے لاش جلانے والی سفاک ماں نے اقرار جرم کرلیا

    کمسن بچی کو قتل کر کے لاش جلانے والی سفاک ماں نے اقرار جرم کرلیا

    امریکا میں ایک سفاک ماں نے اپنے کمسن بچوں کو موت کے گھاٹ اتار دیا، ایک بچی کی لاش جلی ہوئی برآمد ہوئی، پولیس کی حراست میں ماں نے اقبال جرم کرلیا۔

    امریکی میڈیا رپورٹ کے مطابق کیلی فورنیا کی رہائشی ماں کو 4 سال اور 2 ماہ کی بچیوں کے قتل کے الزام میں گرفتار کیا گیا۔

    4 سالہ بچی کی لاش گھر سے 7 کلو میٹر دور ملی تھی اور اس کی لاش کو جلایا گیا تھا۔

    پولیس کا کہنا ہے کہ والدین نے 14 جولائی 2020 کو بچی کی گمشدگی کی رپورٹ درج کروائی تھی، والدین کا دعویٰ تھا کہ بچی رات کو صحیح سلامت سوئی لیکن صبح وہ اپنے بستر پر نہیں تھی۔

    لاش برآمد ہونے کے بعد پولیس نے ایک طرف تو والدین کو گرفتار کیا تو دوسری طرف ایک اور بچی کی موت کا کیس بھی کھل گیا۔

    جوڑے کی 2 ماہ کی بچی سنہ 2015 میں چل بسی تھی، اس وقت اس کی موت کی وجہ شیر خوار بچوں میں اچانک ہوجانے والی جان لیوا بیماری کو قرار دیا گیا تھا۔

    تاہم پولیس نے جب 4 سالہ بچی کا بہیمانہ قتل دیکھا تو یہ کیس دوبارہ کھولا جس پر انکشاف ہوا کہ دونوں بچیوں کے جسم پر زخموں کے ایک جیسے نشانات تھے۔

    پولیس نے والدین پر شیر خوار بچی کی موت کا چارج بھی عائد کردیا جس کے بعد جوڑے نے اقرار جرم کرلیا۔

    پولیس کا کہنا ہے کہ سفاکانہ حرکت میں باپ بھی شریک ہے لیکن اس کے خلاف ثبوت ناکافی ہیں، عدالت سے ماں کو 28 سال اور باپ کو 11 سال قید کی سزا ہوسکتی ہے۔

  • بے رحم ماں 3 بچوں کو دور دراز مقام پر چھوڑ کر بھاگ گئی!

    بے رحم ماں 3 بچوں کو دور دراز مقام پر چھوڑ کر بھاگ گئی!

    امریکا میں ایک ماں اپنے 3 بچوں کو ایک دور دراز ویران مقام پر چھوڑ کر دوست کے ساتھ فرار ہوگئی تاہم پولیس نے جلد ہی بچوں کو ڈھونڈ نکالا اور ماں کو بھی گرفتار کرلیا۔

    امریکی میڈیا کے مطابق بچوں کو جنوبی کیرولینا کی سرحد پر واقع معروف تفریحی مقام سے برآمد کیا گیا، یہ ایک سنسان جزیرہ تھا جہاں جنگ آزادی میں حصہ لینے والے سپاہیوں کی قبریں ہیں اور اسے قبرستان والا جزیرہ کہا جاتا ہے۔

    بچوں کو وہاں سے گزرنے والی ایک کشتی میں سوار چند افراد نے دیکھا اور پولیس کو مطلع کیا۔

    بچوں کی ماں کورٹنی ٹیلر نے سوموار کی شام اپنے 12، 13 اور 15 سال کے بچوں کی گمشدگی کی رپورٹ درج کروائی۔

    پولیس کے پہنچنے پر سب سے بڑے بچے نے بتایا کہ وہ اپنی والدہ اور اس کے دوست کے ساتھ اتوار کی شام یہاں پر کیمپنگ کے لیے آئے۔ پیر کی صبح دونوں پانی لانے کا کہہ کر نکلے اور پھر واپس نہیں آئے۔

    پولیس نے اگلے ہی دن بچوں کو ڈھونڈ نکالا اور اسی شام ماں کو گرفتار کرلیا، تاہم پولیس کے مطابق ماں نے خطیر رقم بطور زر ضمانت دے کر رہائی حاصل کرلی۔

    کورٹنی کا دوست پولیس کو منشیات کی فروخت اور استعمال کے دیگر مقدمات میں بھی مطلوب ہے لہٰذا اس کی تلاش جاری ہے، واقعے کے اگلے روز سے وہ فرار ہے۔

  • باپ نے ماں کو قتل کیا ہے: کمسن بچے نے خوفناک واقعہ کہہ سنایا

    باپ نے ماں کو قتل کیا ہے: کمسن بچے نے خوفناک واقعہ کہہ سنایا

    امریکا میں وحشیانہ تشدد سے بیوی کو قتل کر کے اس کی لاش چھپانے والے باپ کا بھانڈا کم عمر بیٹے نے پھوڑ دیا، پولیس نے 50 سالہ ملزم کو گرفتار کرلیا۔

    امریکی ریاست کینٹکی میں 38 سالہ ربیکا ہوور کی ماں نے 2 اگست کو اس کی گمشدگی کی رپورٹ درج کروائی، پولیس اندھیرے میں ٹامک ٹوئیاں مار رہی تھی کہ اچانک کم عمر بیٹے نے آنکھوں دیکھے خوفناک واقعے کا حال کہہ سنایا۔

    ربیکا کے 3 بچوں میں سے ایک بیٹے نے اپنے اسکول کی کاؤنسلر کو بتایا کہ اس نے ایک دن تہہ خانے میں اپنے باپ کو ماں پر تشدد کرتے دیکھا تھا۔

    ایلیمنٹری اسکول میں پڑھنے والے بچے کا کہنا تھا کہ باپ نے اپنے مضبوط جوتوں سے کئی بار ماں کے سر پر زور دار ٹھوکریں ماریں، بعد ازاں چابیوں کے گچھے سے اس کے چہرے پر وار کیا جس کے بعد ماں بے حس و حرکت ہوگئی۔

    اسکول کے کاؤنسلر نے فوری طور پر پولیس کو اطلاع کی جس نے بچے کے گھر پہنچ کر اس کے باپ 50 سالہ جڈسن ہوور کو حراست میں لے لیا، گھر کے تہہ خانے کی سیڑھیوں پر خون سے ملتے جلتے نشانات بھی موجود تھے تاہم ٹھوس ثبوت کی عدم موجودگی پر پولیس نے اسے چھوڑ دیا۔

    اسی رات جڈسن ایک اسٹوریج یونٹ میں پہنچا اور ایک 55 گیلن کا کنٹینر ادھر سے ادھر کرتے ہوئے پایا گیا۔ پولیس نے اس کی یہ حرکت سی سی ٹی وی فوٹیج کے ذریعے دیکھ لی۔

    مزید تفتیش پر انکشاف ہوا کہ ربیکا کی گمشدگی سے ایک روز بعد یعنی 3 اگست کو جڈسن کوئی چیز لے کر وہاں پہنچا تھا جو بظاہر دیکھنے میں کوئی لاش لگ رہی تھی۔

    جلد ہی پولیس نے وہاں سے ربیکا کی لاش برآمد کرلی جس کے بعد ملزم شوہر کو گرفتار کرلیا گیا۔ ملزم پر قتل کے الزامات عائد کیے گئے ہیں۔

    پولیس کا کہنا ہے کہ ملزم اس سے قبل بھی گھریلو تشدد میں ملوث رہا تھا، اسی سال اپریل میں اس نے بیوی کو شدید تشدد کا نشانہ بنایا تھا تب ایک بچہ بھاگ کر پڑوسی کے گھر چھپ گیا تھا اور پڑوسی نے پولیس کو اطلاع دی تھی۔

  • بچوں کی ذہانت ماں سے منتقل ہوتی ہے

    بچوں کی ذہانت ماں سے منتقل ہوتی ہے

    ذہانت ایک تحفہ خداوندی ہے اور اگر کوئی شخص اپنی ذہانت کو محنت، مستقل مزاجی اور دور اندیشی کے ساتھ ملا کر استعمال کرے تو ایسے شخص کو کامیاب ہونے سے کوئی نہیں روک سکتا۔

    ایک عمومی خیال ہے کہ ذہانت موروثی ہوسکتی ہے اور یہ خاندان کے مختلف افراد سے منتقل ہوسکتی ہے، تاہم حال ہی میں ایک تحقیق میں بتایا گیا کہ بچوں کی ذہانت انہیں ان کی ماں کی طرف سے ملنے والا تحفہ ہوتا ہے۔

    جرمنی میں کی جانے والی ایک تحقیق کے مطابق کسی بچے کی ذہانت کا انحصار اس بات پر ہے کہ اس کا والدہ کتنی ذہین ہیں، یعنی ذہانت والد یا کسی اور سے نہیں بلکہ ماں سے منتقل ہوتی ہے۔

    تحقیق میں کہا گیا کہ ذہانت کے جینز کروموسوم ایکس میں واقع ہوتے ہیں اور خواتین میں 2 ایکس کروموسومز موجود ہوتے ہیں، یہی وجہ ہے کہ بچوں میں ماں کی جانب سے ذہانت کی منتقلی کا زیادہ امکان ہوتا ہے۔

    اس کے برعکس مردوں میں صرف ایک ایکس کروموسوم ہوتا ہے لہٰذا والد سے ذہانت کی منتقلی کا امکان کم ہوتا ہے، تحقیق میں یہ بھی کہا گیا کہ باپ کے ذہانت کے جینز غیر فعال ہو جاتے ہیں۔

    سنہ 1994 میں کی جانے والی ایک تحقیق سے علم ہوا کہ بچوں کی ذہانت یا آئی کیو کی پیشگوئی ماں کے آئی کیو سے کی جاسکتی ہے۔

    جینیاتی عوامل کے علاوہ بھی دیکھا جائے تو بچوں کی زندگی کا وہ وقت جب ان کا دماغ نشونما پارہا ہوتا ہے، یعنی بچپن کا وقت، زیادہ تر ماں کے ساتھ گزرتا ہے۔ ایسے میں ماں کی ذہانت، عادات و فطرت بچوں پر اثر انداز ہوتی ہے۔

    چنانچہ ایک ذہین ماں بچوں کی پرورش بھی نہایت دانشمندانہ انداز میں کرتی ہے۔ بچوں کی شخصیت و دماغ کی تعمیر والدہ کی ذہانت کا عکس ہوتی ہے۔

  • ننھے بچے گھر پر اکیلے چھوڑ کر ماں کئی گھنٹوں کے لیے سیلون روانہ

    ننھے بچے گھر پر اکیلے چھوڑ کر ماں کئی گھنٹوں کے لیے سیلون روانہ

    امریکا میں ایک ماں سیلون میں اپنے اپائنمنٹ کے لیے 4 چھوٹے بچوں کو گھر میں اکیلا چھوڑ گئی، پولیس نے پڑوسیوں کی شکایت پر ماں کو گرفتار کرلیا۔

    امریکی ریاست ٹیکسس میں 28 سال ماں گبریئل سائمن سیلون میں اپنے بالوں کی اپائنمنٹ کے لیے ننھے بچوں کو گھر میں اکیلا چھوڑ گئی، بچوں میں 3 ماہ کے 2 جڑواں بچے، 1 سال کا بچہ اور 7 سال کا بچہ شامل تھا۔

    پولیس کے مطابق 7 سالہ بچے کو ماں نے چھوٹے بچوں کی نگرانی کے لیے کہا تھا تاہم وہ خود بھی جزوی طور پر معذور تھا۔

    بعد ازاں پڑوسیوں نے گھر پر بچوں کو اکیلا پا کر پولیس کو اطلاع کر دی۔ پولیس نے گھر پر پہنچ کر ماں سے رابطہ کیا تو اسے گھر سے گئے کئی گھنٹے گزر چکے تھے اور پولیس کی کال کے مزید ایک گھنٹے بعد وہ گھر پہنچی۔

    پولیس نے اسے گرفتار کر کے اس پر بچوں کی طرف لاپرواہی اور غفلت کے الزمات عائد کیے ہیں۔ بچوں کو چائلڈ پروٹیکشن سروس نے اپنی تحویل میں لے لیا ہے۔

  • 18 بچوں کی ماں نے 17 بچوں میں کرونا وائرس منتقل کردیا

    18 بچوں کی ماں نے 17 بچوں میں کرونا وائرس منتقل کردیا

    واشنگٹن: کرونا وائرس کی علامت ظاہر ہوتے ہی لوگ پریشان ہو کر ڈاکٹر کے پاس جارہے ہیں تاہم بعض کیسز میں مرض کا شکار لوگوں میں کوئی علامت ظاہر نہیں ہورہی، ایسی ہی ایک ماں نے بھی بے خبری میں اپنے 18 میں سے 17 بچوں کو وائرس منتقل کردیا۔

    نیویارک کی رہائشی برٹنی جینک میں کرونا وائرس کی کوئی علامت ظاہر نہیں ہوئی چنانچہ وہ معمول کے مطابق اپنے گھر میں رہ رہی تھی، پھر اچانک اس کی طبیعت نہایت بگڑ گئی جس کے بعد اس کا ٹیسٹ کیا گیا تو انکشاف ہوا کہ وہ کرونا وائرس کا شکار ہوچکی ہے۔

    تشویش ناک بات یہ تھی کہ ماں سے اس کے 18 میں سے 17 بچوں میں بھی وائرس منتقل ہوچکا تھا، برٹنی کے 18 بچوں میں سے کچھ گود لیے ہوئے ہیں جو سب ایک ساتھ ایک گھر میں رہتے ہیں۔

    برٹنی کا کہنا ہے کہ اسے گزشتہ 5 ہفتوں سے کسی بیماری کا سامنا نہیں کرنا پڑا اور اب وہ شدید بیمار ہوئی ہے اور بستر پر پڑ گئی ہے، ’میں اپنی زندگی میں آج سے پہلے کبھی اتنی خوفزدہ نہیں ہوئی‘۔

    حکام کا کہنا ہے کہ اس بات کا تعین نہیں ہوسکا کہ خود برٹنی اس وائرس کا کیسے شکار ہوئی۔

    خیال رہے کہ امریکی ریاست نیویارک اس وقت اس وبا کا مرکز بن چکی ہے، صرف نیویارک میں اب تک 2 لاکھ 23 ہزار 699 افراد وائرس کا شکار بن چکے ہیں جبکہ ہلاک افراد کی تعداد 12 ہزار 800 ہوچکی ہے۔

    نیویارک سمیت امریکا میں وائرس سے متاثرہ افراد کی تعداد 7 لاکھ 10 ہزار 272 ہوچکی ہے جبکہ ملک بھر میں ہلاکتوں کی تعداد 37 ہزار 175 ہوچکی ہے۔

  • سجل اور عدنان صدیقی کی بالی ووڈ فلم ’مام‘ کا ٹیزر ریلیز

    سجل اور عدنان صدیقی کی بالی ووڈ فلم ’مام‘ کا ٹیزر ریلیز

    معروف اداکار عدنان صدیقی اور سجل علی کی پہلی بالی ووڈ فلم مام کا ٹیزر ٹریلر جاری کردیا گیا۔ فلم میں مرکزی کردار سری دیوی ادا کر رہی ہیں، جبکہ عدنان صدیقی ان کے شوہر کا کردار نبھا رہے ہیں۔

    بالی ووڈ فلم ’مام‘ ایک معاشرتی موضوع پر مبنی فلم ہے جس کا مرکزی کردار ماں سری دیوی ادا کر رہی ہیں۔ عدنان صدیقی ان کے شوہر جبکہ سجل علی ان کی بیٹی کا کردار نبھائیں گی۔

    فلم کی کہانی ماں کی اس جدوجہد پر مشتمل ہے جو وہ اپنی اولاد کے لیے کرتی ہے اور تمام قربانیاں دینے کو تیار رہتی ہے۔

    مزید پڑھیں: بھارتی فلم میں کام سری دیوی کی وجہ سے کیا، عدنان صدیقی

    ٹیزر کو گزشتہ روز زی ایوارڈز 2017 کی تقریب میں ریلیز کیا گیا۔ اس موقع پر سری دیوی نے کہا، ’جب میں نے اپنی پیشہ وارانہ زندگی کا پہلا شوٹ کیا تو میری والدہ وہیں میرے ساتھ کھڑی تھیں۔ اگر وہ وہاں نہ ہوتیں تو میں بھی آج یہاں نہ ہوتی‘۔

    انہوں نے کہا کہ اب وقت بدل گیا ہے، اب میں خود بھی ایک ماں ہوں۔ ’لیکن وقت جو بھی ہو، مائیں وقت کی قید سے آزاد رہیں گی‘۔

    mom-2

    تقریب میں گو کہ عدنان صدیقی موجود نہیں تھے، تاہم بعد میں سوشل میڈیا پر انہوں نے اپنے پیغام میں کہا کہ زی ایوارڈز کے اسٹیج پر فلم کا ٹیزر دیکھا جانا بہت خوش کن لمحہ تھا۔

    انہوں نے اپنے جذبات کا اظہار کرتے ہوئے کہا، ’جب میں 16 سال کا تھا تب میں نے اپنی والدہ کو کھو دیا تھا۔ انہوں نے کبھی اپنے بیٹے کو آگے بڑھتے اور انڈسٹری میں اس بہترین مقام پر نہیں دیکھا۔ میری خواہش تھی کہ وہ یہ سب اپنی آنکھوں سے دیکھتیں‘۔

    عدنان نے کہا، ’میں اپنی والدہ کا مقروض ہوں کہ ان کی ذہانت اور قربانیوں کے بغیر میں کبھی اس قابل نہیں ہوتا کہ اس مقام تک پہنچ سکوں‘۔

    انہوں نے سجل علی کی والدہ کو بھی خراج تحسین پیش کیا جو چند روز قبل ہی کینسر کے باعث انتقال کر گئی تھیں۔

    عدنان صدیقی نے اس فلم کو تمام ماؤں کے نام کیا۔

    فلم مام میں اکشے کھنہ اور نواز الدین صدیقی بھی اداکاری کے جوہر دکھائیں گے۔ سری دیوی کے شوہر بونی کپور کی ہدایت کاری میں بننے والی فلم رواں برس 14 جولائی کو ریلیز کی جائے گی۔

  • ماؤں کے عالمی دن کے موقع پرمعروف شخصیات کے تاثرات

    ماؤں کے عالمی دن کے موقع پرمعروف شخصیات کے تاثرات

    کراچی: ماں کی ماں محبت بے لوث اور اسکی یاد بے پناہ قیمتی ہوتی ہے، ماں ایک ایسی عظیم ہستی ہے جس کی عزت واحترام اور مرتبہ ہر مذہب اور معاشرے میں مسلمہ ہے،اس حوالے سے ہر سال ماں کا عالمی دن منایا جاتا ہے۔

    ماں قدرت کا انمول تحفہ ہے جس کادنیامیں کوئی نعم البدل نہیں ہے، یوں تو ماں سے محبت کو دنوں کی زنجیر میں جکڑنا مشکل ہے اور ہر دن ماں کی خدمت اور تابعداری کا دن ہے لیکن یہ خاص دن ہمیں اپنی مصروف زندگی میں ماں کی قدر یاد دلاتا ہے، ہر لمحہ ہر روز ماں کی عزت اور محبت کا اظہار کرنے والے خوش قسمت شخص جن کی مائیں حیات ہیں کیونکہ ماں کی دعائیں ہر لمحہ شامل حال رہتی ہیں۔

    اس دن کی مناسبت سے مشہور و معروف شخصیات نے سماجی رابطوں کی ویب سائٹ ٹوئٹر پر ماں سے محبت کا اظہار کیا۔