پاکستان شوبز انڈسٹری کی اداکارہ مومنہ اقبال نے انکشاف کیا ہے کہ ڈراموں میں مرکزی کردار کے لئے نئے نئے مطالبات کیے جاتے ہیں۔
انہوں نے بتایا کہ آج کل انسٹاگرام فالوورز کا زیادہ ہونا بھی ڈراموں میں مرکزی کردار ملنے کی ایک وجہ ہے، اس بات کا انکشاف انہوں نے ایک ٹی وی انٹرویو میں کیا۔
ان کا کہنا تھا کہ پہلے شوٹنگ سیٹس پر ایسی باتیں نہیں ہوا کرتی تھیں لیکن اب ہونے لگی ہیں کہ جس کے انسٹا فالوورز زیادہ ہوں گے، انہیں اسی مناسبت سے کام دیا جائے گا۔
مومنہ نے کہا کہ یہاں تک کہا جاتا ہے کہ فلاں ماڈل کے اتنے زیادہ فالوورز ہیں تو انہیں فلاں کام دے دیں اور فلاں کے کم ہیں تو انہیں یہ کام دے دیں۔
اداکارہ نے بتایا کہ دیکھا جاتا ہے کہ کس کے کتنے انسٹاگرام فالوورز ہیں، وہ لوگوں میں کتنا مقبول ہے یا اسے کتنے لوگ جانتے ہیں۔
مومنہ اقبال کا کہنا تھا کہ جب تک اداکاراﺅں کو کام نہیں ملے گا جب تک وہ سکرین پر نہیں آئیں گی تو لوگ انہیں کیسے جانیں گے؟
یاد رہے کہ کچھ عرصہ قبل فلم ساز سید نور نے بھی اس بات کا اعتراف کیا تھا کہ انہوں نے ٹک ٹاکر جنت مرزا کو فلم میں اس لئے کاسٹ کیا تھا کیوں کہ ان کے ٹک ٹاک پر فالوورز زیادہ تھے لیکن بدقسمتی سے ان کی زیادہ فین فالوئنگ نے بھی فلم کو کامیاب نہیں کروایا۔
