کراچی (13 اگست 2025): محکمہ موسمیات کا کہنا ہے کہ ملک میں مون سون بارش کا ساتواں اسپیل آج سے شروع ہونے کا امکان ہے۔

تفصیلات کے مطابق آج سے ملک کے مختلف حصوں میں مون سون کے ساتویں اسپیل میں بارشیں برسنا شروع ہو جائیں گی، پی ڈی ایم اے کے ترجمان نے خبردار کیا ہے کہ بارش کا یہ ساتواں اسپیل زیادہ مضبوط ہے۔

محکمہ موسمیات کے مطابق 13 سے 17 اگست کے دوران پنجاب کے بالائی حصوں میں مون سون بارشوں کا امکان ہے، 18 سے 21 اگست کے تک پنجاب کے بیش تر میدانی اضلاع میں مون سون بارشوں کی پیشگوئی ہے۔

مری، گلیات، اٹک، چکوال، جہلم، منڈی بہاالدین میں بارشوں کاامکان ہے، گجرات، گوجرانوالہ، حافظ آباد، لاہور اور دیگر شہروں میں بھی بارشیں متوقع ہیں، 21 اگست کو ڈیرہ غازی خان، بھکر، بہاولپور، خانیوال اور دیگر شہروں میں بارشوں کا امکان ہے۔

ترجمان پی ڈی ایم اے کا کہنا ہے کہ لاہور، راولپنڈی، گوجرانوالہ اور سیالکوٹ میں اربن فلڈنگ کا خدشہ ہے، اور شدید بارشوں کے باعث مری و گلیات میں لینڈ سلائیڈنگ کا بھی خطرہ ہے۔

ملک بھر میں مون سون بارشوں کا تباہ کن اسپیل شروع ہو گیا ہے، گزشتہ چوبیس گھنٹوں میں مزید 37 افراد جان سے گئے۔

تفصیلات کے مطابق مون سون کی موسلادھار بارشوں میں پنجاب میں مختلف حادثات میں 30 افراد جاں بحق اور 44 زخمی ہوئے، خیبرپختون خوا میں 7 افراد جاں بحق ہو گئے ہیں۔

پاکپتن، پسرور اور اوکاڑہ میں بارش سے سڑکیں دریا کا منظر پیش کرنے لگی ہیں، چیچہ وطنی، چوک اعظم، عارف والا اور جڑانوالہ کے گلی، محلوں میں بھی پانی جمع ہو گیا، کوہ سلیمان کے پہاڑی سلسلوں میں طوفانی بارش سے راجن پور کے ندی نالوں میں طغیانی آ گئی ہے اور ہزاروں ایکڑ اراضی زیر آب آ گئی، روجھان میں بھی دریائے سندھ میں طغیانی ہے اور کچے کا علاقہ مکمل ڈوب گیا ہے۔

پنجاب میں زوردار بارشوں سے بڑے چھوٹے شہر پانی میں ڈوب گئے ہیں، اوکاڑہ میں 172 ملی میٹر بارش ہوئی، 33 گھنٹے بعد بھی سڑکیں دریا کا منظر پیش کر رہی ہیں، 2 دن سے تجارتی مراکز بند پڑے ہیں، نواحی علاقے میں چھت گرنے سے 2 افراد زخمی ہوئے ہیں، ساہیوال میں شہر اور محلے ندی نالوں میں تبدیل ہو گئے ہیں، رسیکیو کی گاڑیاں بھی پانی میں پھنس گئیں۔

لاہور کے طوفانی بارش میں 3 مسافر بردار طیارے فضا میں چکر لگاتے رہے

بہاولنگر میں 3 دن سے بارش کی وجہ سے سڑکیں اور گلیاں پانی میں ڈوب گئیں، 2 سال پہلے بننے والا سیوریج سسٹم بھی ناکارہ ثابت ہو گیا، پاکپتن میں مکان کی چھت گرنے سے بچہ جاں بحق، دو افراد زخمی ہوئے، ہارون آباد کے نواحی علاقے میں دیوار گرنے سے دو افراد زخمی ہو گئے۔

پسرور میں کچے مکان کی چھت ڈھے گئی، جس سے 3 بہنیں ملبے تلے دب کر زخمی ہو گئیں، چیچہ وطنی میں نشیبی علاقے اور سڑکیں زیر آب آ گئیں، چوک اعظم میں گلی، محلوں اور سڑکوں پر پانی جمع ہو گیا، عارف والا میں غلہ منڈی پانی میں ڈوب گٸی، جڑانوالہ کے کالج روڈ پر پانی جمع ہو گیا، نواحی علاقے میں گھر کی چھت گرنے سے خاتون جاں بحق اور 6 افراد زخمی ہو گئے۔