اسلام آباد : عالمی ریٹنگ کے ادارے موڈیز کا کہنا ہے روپیہ ضرورت کے مطابق اپنی قدر کا خود تعین کرے گا، شرح سود بڑھنے سے مالیاتی مشکلات میں اضافہ ہوا۔
تفصیلات کے مطابق عالمی ریٹنگ کے ادارے موڈیز نے پاکستان کی معیشت پر تجزیہ جاری کیا ہے ، جس میں کہا ہے کہ روپیہ ضرورت کے مطابق اپنی قدر کا خود تعین کرے گا اور درآمدات میں کمی سے زرمبادلہ کے ذخائربڑھیں گے۔
موڈیز کا کہنا ہے کہ زرمبادلہ کے ذخائر قرضوں کی ادائیگیوں کے حساب سے کم ہیں، غیرملکی ادائیگیوں سےجاری کھاتوں کے خسارے میں اضافے کا خدشہ ہے۔
معیشی تجزیہ میں کہا گیا آئی ایم ایف کے6 ارب ڈالر سے ادائیگیوں کو سہارا ملا، دیگرذرائع سے ملنے والے قرض سے بھی مدد ملی، شرح سود بڑھنے سے مالیاتی مشکلات میں اضافہ ہوا۔
عالمی ریٹنگ ادارے نے مزید کہا کہ دو سال میں شرح سود ساڑے 7فیصدبڑھی، قلیل مدتی بانڈز کا شرح سود مسلسل بڑھ رہا ہے، شرح سود بڑھنے سے مقامی قرضوں میں اضافہ ہوا۔
یاد رہے رواں ماہ کے آغاز میں عالمی ریٹنگز ایجنسی موڈیز نے اپنی رپورٹ میں کہا تھا کہ بیرونی دباؤ پاکستان کے زر مبادلہ کے ذخائر پر اثر ڈالے گا، پاکستان کی کریڈٹ ریٹنگز بی 3 معتدل قوت کی مظہر ہے۔
موڈیز کا کہنا تھا کہ مالیاتی اور سیاسی صورتحال معیشت پر اثر انداز ہوتی ہے، فی کس آمدن اور عالمی اعتبار سے مسابقتی ماحول کافی کم ہے تاہم کم ٹیکس بیس، بیرونی قرض اور سودکی ادائیگی مالی تنگی کا باعث بن رہی ہے۔
