Tag: Mother arrested

اسٹاک ہوم : سوئیڈن میں سفاک ماں نے اپنے بیٹے کو مبینہ طور پر تیس سال تک کمرے میں قید رکھا، پولیس نے 70سالہ خاتون کو حراست میں لے لیا۔

تفصیلات کے مطابق سویڈن کے دارالحکومت اسٹاک ہوم میں پولیس نے ایک 70 سالہ خاتون کو گرفتار کیا ہے، ملزمہ پر الزام ہے کہ اس نے مشتبہ طور پر 30سال تک اپنے بیٹے کو فلیٹ میں قید کررکھا تھا۔

برطانوی خبرر ساں ادارے کی رپورٹ کے مطابق 40 سالہ شخص ایک رشتہ دار کو زخمی حالت میں فلیٹ میں ملا تھا، اسٹاک ہوم کی پراسیکیوٹر ایما اولسن نے میڈیا کو بتایا کہ اس شخص کو لگ بھگ 30 برس تک قید کیا گیا تھا۔

اس کے علاوہ سویڈن کے اکثر میڈیا اداروں نے اس شخص کے رشتے دار کا حوالہ دیتے ہوئے کہا ہے کہ 40 سالہ شخص فرش پر ایک کمبل میں لپٹا ہوا ملا تھا، ا کے دانت نہیں تھے اور وہ بول نہیں پارہا تھا اور جسم پر لگنے والے زخم بھی خراب ہوچکے تھے۔

ایما اولسن نے کہا کہ وہ شخص اب اسپتال میں زیر علاج ہیں اور انہیں سرجری کی ضرورت ہے۔ تاہم پراسیکیوٹر نے قید سے ملنے والے شخص کی مزید تفصیلات فراہم نہیں کی ہیں۔

مقامی اخبار اور دیگر ذرائع ابلاغ کا کہنا ہے کہ مذکورہ شخص کو12 سال کی عمر میں اسکول سے نکلوا دیا گیا تھا۔ اخبار نے رشتہ دار کا حوالہ دیتے ہوئے کہا کہ انہیں 1995 اور 1996 میں اسی اپارٹمنٹ کے دیواروں سے جھانکتے دیکھا گیا تھا لیکن بعد میں اس کی دیواروں کو ڈھک دیا گیا تھا۔

پراسیکیوٹر ایما اولسن نے اپنے بیان میں بتایا کہ اس شخص کی والدہ جعلی قید اور جسمانی نقصان پہنچانے کے الزامات کو مسترد کر رہی ہیں۔ تاہم میڈیا میں بازیاب ہونے والے شخص اور ان کی والدہ دونوں کے نام ظاہر نہیں کیے گئے۔

اس کے علاوہ غیر ملکی میڈیا میں اس بات کی فوری طور پر یہ وضاحت نہیں کی گئی کہ آخر اس خاتون نے بیٹے کو کیوں قید کیا تھا اور میڈیا بھی متاثرہ شخص کے اہلخانہ سے رابطہ نہیں کرسکا۔

اس شخص کا علاج کرنے والے ہسپتال کے عملے کی جانب سے الرٹ کرنے کے بعد پولیس نے تحقیقات کے لیے اسٹاک ہوم کے جنوبی علاقے کے اپارٹمنٹ کو گھیرے میں لے لیا تھا۔

پولیس ترجمان نے بتایا کہ ہم دیکھ رہے ہیں کہ اس شخص کو کتنے عرصے سے قید میں رکھا گیا لیکن ہمیں اندازہ ہے کہ وہ طویل عرصے سے قید تھا۔