Tag: Mother of 03 children

ٹنڈوآدم : تین بچوں کی ماں کی تشدد زدہ لاش برآمد ہوئی ہے، متوفیہ کے رشتہ داروں نے واقعہ کو خود کشی قرار دے دیا، پولیس کا کہنا ہے کہ واقعہ خود کشی کے بجائے قتل لگتا ہے، تفتیش جاری ہے۔

تفصیلات کے مطابق ٹنڈوآدم کے گاؤں میں تین بچوں کی ماں کی تشدد زدہ لاش ملی ہے، متوفیہ کے رشتہ داروں کا کہنا ہے کہ واقعہ خودکشی کا نتیجہ ہے، جبکہ پولیس نے قتل کا شبہ ظاہر کیا ہے، نعش پوسٹ مارٹم کے بعد ورثاء کے حوالے کردی گئی۔

پولیس کا کہنا ہے کہ ٹنڈوآدم کے گاؤں گیدڑ آپھن میں تین بچوں کی ماں نوجوان خاتون رخسانہ اہلیہ دوست علی لاکھو کی گردن ٹوٹی نعش کو تعلقہ پولیس نے برآمد کرنے کے بعد تعلقہ اسپتال پوسٹ مارٹم کے لئے روانہ کیا۔

اس سلسلے میں متوفی کے مامو عرس لاکھو نے بتایا کہ رخسانہ کا شوہر کراچی میں مزدوری کرتا ہے اور خود گھر میں اکیلی رہتی ہے اس کی کسی سے کوئی دشمنی نہیں ہے اس نے غربت سے تنگ آکر خودکشی کی ہے۔

 اس حوالے سے ایس ایچ او تعلقہ نے بتایا کہ جس گھر سے نعش ملی ہے وہ متوفیہ کا ہے اور جھونپٹری نما گھر ہے جس کی اونچائی پانچ فٹ کے قریب ہے اور واقعہ خودکشی نہیں لگتا ہے ہمیں قتل کا شک ہے تاہم واقعے کی پوری تفشیش کریں گے۔

متوفیہ کے میڈیکل چیک اپ کے لئے اجزاء لے لئے ہیں اور انہیں کراچی بھیجا جائے گا جبکہ ڈاکٹروں نے بھی90 فیصد قتل کا شبہ ظاہر کیا ہے جبکہ حتمی رپورٹ کراچی سے آنے کے بعد جاری کی جائے گی، علاوہ ازیں نعش پوسٹ مارٹم کے بعد ورثاء کے حوالے کردی گئی ہے تاہم آخری اطلاعات تک واقعے کا مقدمہ درج نہیں ہو سکا۔