کراچی: شہر قائد کے علاقے عزیز آباد بلاک 2 میں موٹر سائیکل چھیننے کی واردات کی سی سی ٹی وی فوٹیج سامنے آ گئی۔
تفصیلات کے مطابق کراچی کے علاقے عزیز آباد میں 3 لٹیرے سیکنڈوں میں ایک اور صحافی سے موٹر سائیکل چھین کر فرار ہو گئے، واقعے کی سی سی ٹی وی فوٹیج بھی سامنے آ گئی ہے۔
فوٹیج میں دو موٹر سائیکلوں پر تین لٹیروں کو دیکھا جا سکتا ہے، لٹیرے شہری کا پیچھا کرتے ہوئے گلی کے کونے تک پہنچے، ایک لٹیرے نے تیزی سے موٹر سائیکل آگے لگا کر راستہ روک دیا۔
موٹر سائیکل پر پیچھے بیٹھا لٹیرا اترا اور اطمینان سے صحافی سے موٹر سائیکل چھینی، موٹر سائیکل چلانے والے لٹیروں نے ہیلمٹ جب کہ چھیننے والے لٹیرے نے ماسک پہن رکھا تھا۔
تینوں لٹیروں نے پینٹ شرٹ پہنی ہوئی تھی، جس گلی سے وہ آئے تھے اسی گلی میں موٹر سائیکل لے کر فرار ہو گئے۔
