ARYNews.tv | Urdu – Har Lamha Bakhabar

Tag: motorcycle theft

  • موٹر سائیکل چوری سے آن لائن فروخت تک تین مرحلوں میں کام کرنے والا گینگ پکڑا گیا

    موٹر سائیکل چوری سے آن لائن فروخت تک تین مرحلوں میں کام کرنے والا گینگ پکڑا گیا

    کراچی: گلبہار پولیس نے شہر قائد میں موٹر سائیکل چوری سے آن لائن فروخت تک تین مرحلوں میں کام کرنے والا گینگ پکڑا ہے۔

    تفصیلات کے مطابق گلبہار پولیس نے خفیہ اطلاع پر ایک بڑی کارروائی میں موٹر سائیکل چوری میں ملوث 3 ملزمان کو گرفتار کیا ہے، یہ گینگ واردات کے لیے تین مرحلوں میں کام کرتا تھا۔

    ایس ایس پی سینٹرل ذیشان شفیق صدیقی کے مطابق پہلے مرحلے میں ملزمان کلیئر موٹر سائیکل کے کاغذات حاصل کرتے اور اس کے جعلی کاغذات تیار کرتے تھے، دوسرے مرحلے میں ملزمان اس کمپنی کی موٹر سائیکل چوری کرتے جس کے جعلی کاغذات بنائے جاتے تھے، اور تیسرے مرحلے میں انجن چیسز نمبر ٹیمپرڈ کر کے ویب سائٹ پر آن لائن فروخت کرتے تھے۔

    ایس ایس پی کے مطابق ملزمان کا گروہ کراچی کے مختلف علاقوں میں انتہائی سرگرم تھا، ملزمان نے شہریوں کو درجنوں چوری شدہ موٹر سائیکل ٹیمپر کرنے کے بعد فروخت کرنے کا اعتراف کیا ہے، ملزمان کی شناخت بلاول، شاہ رخ اور رضوان کے ناموں سے ہوئی ہے۔

    سندھ کی جیلوں میں موبائل فون سمیت دیگر چیزوں کے استعمال کا سوال درست ثابت

    ملزمان کے قبضے سے کراچی کے مختلف علاقوں سے چوری کی ہوئی 8 عدد موٹر سائیکل اور 5 عدد چیسز برامد کیے گئے ہیں، ملزم رضوان نے انکشاف کیا کہ وہ موٹر سائیکل کے جعلی کاغذات بناتا تھا اور بعد ازاں آن لائن موٹر سائیکل فروخت کر دیتا تھا۔

    ملزم بلاول نے اعتراف کیا کہ وہ موٹر سائیکل چوری کرنے میں ملوث ہے، اور آن ڈیمانڈ موٹر سائیکل چوری کرتا تھا، جب کہ ملزم شاہ رخ موٹر سائیکل کے انجن چیسز نمبر ٹیمپر کرنے کا ماہر ہے اور ٹیمپر کرنے کے 3 ہزار روپے لیتا ہے۔

    گرفتار ملزمان کے خلاف ضابطے کی کارروائی مکمل کر کے مقدمہ درج کر لیا گیا ہے، جب کہ تفتیش کا اغاز بھی کر دیا گیا ہے۔

  • کراچی میں موٹرسائیکل چوری کی وارداتوں میں بھی اضافہ

    کراچی میں موٹرسائیکل چوری کی وارداتوں میں بھی اضافہ

    کراچی : شہر قائد میں ایک بار پھر موٹرسائیکل چوری کی وارداتوں میں اضافہ ہوگیا، ملزمان بلاخوف و خطر کسی کی بھی موٹر سائیکل لے کر فرار ہوجاتے ہیں۔

    کراچی کے علاقے صدر سی آئی اے سینٹر کے قریب دن دہاڑے موٹرسائیکل چوری کی واردات سامنے آئی ہے، مذکورہ واردات کی سی سی ٹی وی فوٹیج منظرعام پر آگئی۔

    سی سی ٹی وی فوٹیج میں موٹرسائیکل سوار2ملزمان کو واضح طورپردیکھا جاسکتا ہے، ملزمان نے گلی میں شہریوں کی غیرموجودگی کا فائدہ اٹھاتے ہوئے واردات انجام دی۔

    ملزمان چند منٹوں میں موٹرسائیکل چوری کرکے فرارہوگئے، ملزمان نے اپنی شناخت چھپانے کے لئے کیپ اور ہیلمنٹ پہن رکھے تھے۔

    یاد رہے کہ سی پی ایل سی نے شہر قائد میں گزشتہ ماہ اگست میں ہونے والی وارداتوں کی رپورٹ جاری کی تھی جس کے مطابق 263شہری روزانی کی بنیاد پر ڈاکووں کی وارداتوں کا نشانہ بنے۔

    رپورٹ کے مطابق کراچی میں ماہ اگست میں اسٹریٹ کرائم کی 8 ہزار 163 واردتیں رپورٹ ہوئیں، ریکارڈ کا حصہ بننے والی وارداتوں میں صرف گاڑیاں، موٹرسائیکل چوری اور چھیننے کے علاوہ موبائل فون چھیننے کی وارداتیں بھی شامل ہیں، موٹرسائیکل لفٹنگ کی وارداتیں یومیہ 171 سے تجاوز کرگئیں۔

  • تفریح کے طور پر بھی موٹر سائیکلیں چوری ہونے لگیں، کم عمر بچے گرفتار

    تفریح کے طور پر بھی موٹر سائیکلیں چوری ہونے لگیں، کم عمر بچے گرفتار

    کراچی: شہر قائد میں تفریح کے طور پر بھی موٹر سائیکلیں چوری ہونے لگی ہیں، پولیس نے اس سلسلے میں کم عمر بچے گرفتار کر لیے۔

    تفصیلات کے مطابق ضلع وسطی کراچی میں سرسید پولیس نے موٹر سائیکل لفٹنگ میں ملوث کم عمر بچے گرفتار کر لیے، جن کے بارے میں بتایا جا رہا ہے کہ وہ تفریحاً موٹر سائیکلیں چوری کر رہے تھے۔

    گرفتار بچوں کی تعداد 2 ہے، جن میں 12 سالہ صابر اور 15 سالہ ذاکر شامل ہیں، دورانِ تفتیش ملزمان نے بتایا کہ وہ کراچی کے علاقے بلال کالونی کے رہائشی ہیں۔

    ایس ایس پی سینٹرل معروف عثمان کے مطابق دونوں بچے کافی عرصے سے موٹر سائیکل چوری کرنے میں ملوث ہیں۔

    بچوں نے انکشاف کیا ہے کہ وہ موٹر سائیکل صرف تفریح کے لیے چوری کرتے تھے، جب بائیک میں پیٹرول ختم ہو جاتا تھا تو وہ اسے کہیں بھی کھڑی کر کے وہاں سے بھاگ جاتے تھے۔

    سرسید پولیس نے گرفتار دونوں بچوں کے خلاف موٹر سائیکل چوری کے مقدمات درج کر دیے۔

  • کراچی میں رواں سال 8 ہزار545 موٹرسائیکلیں چوری کی گئیں، رپورٹ میں انکشاف

    کراچی میں رواں سال 8 ہزار545 موٹرسائیکلیں چوری کی گئیں، رپورٹ میں انکشاف

    کراچی: شہر قائد میں رواں سال آٹھ ہزار پانچ سو پینتالیس موٹرسائیکلیں چوری اور845 موٹرسائیکلیں چھینی گئیں، ضلع کورنگی موٹر سائیکل لفٹنگ میں سرفہرست رہا۔

    تفصیلات کے مطابق کراچی کے25 تھانےموٹرسائیکل لفٹرز کی جنت بن گئے، شہر قائد میں موٹرسائیکلیں چھینی جانے سے زیادہ چرائی جانے کا انکشاف سامنے آیا۔

    شہرکے108تھانوں میں سب سےزیادہ موٹرسائیکل لفٹنگ کہاں ہوئی؟ اس حوالے سے مکمل تفصیلات کی رپورٹ سامنے آگئی، رپورٹ میں بتایا گیا کہ ضلع کورنگی موٹرسائیکل لفٹنگ میں سرفہرست ہے جبکہ ایسٹ زون کے 13،ساؤتھ کے 2 اور ویسٹ کے 10تھانے ملزمان کا ہدف رہے۔

    رپورٹ میں انکشاف ہوا کہ بلوچستان کےمخصوص گروہ چوری شدہ موٹرسائیکلوں کے بڑےخریدارہے، جنوری سے 15 مئی تک 8 ہزار 545 موٹرسائیکلیں چوری کی گئی جبکہ سوا 5ماہ میں 845 موٹر سائیکلیں چھینی گئی،مجموعی طور پر 9 ہزار 390 موٹرسائیکل چوری یا چھینی گئی۔

    رپورٹ میں کہا گیا کہ ڈسٹرکٹ کورنگی کے زمان ٹاؤن،انڈسٹریل ایریا،عوامی کالونی ، کورنگی تھانہ،شاہ فیصل اورلانڈھی چوروں کے نشانے پر تھے جبکہ ڈسٹرکٹ ایسٹ کے سچل، جمشید، سائٹ سپرہائی وے بھی ملزمان کا ہدف رہے۔

    رپورٹ میں بتایا گیا ڈسٹرکٹ ایسٹ کےبلوچ کالونی،شارع فیصل، گلستان جوہر بھی آسان ٹارگٹ تھے جبکہ ڈسٹرکٹ ملیرکاصرف شاہ لطیف تھانہ موٹرسائیکل لفٹرزکے نشانے پر رہے۔

    اسی طرح ڈسٹرکٹ ساؤتھ کا پریڈی اورڈسٹرکٹ کیماڑی کا سائٹ اے ، ڈسٹرکٹ ویسٹ کےاورنگی ٹاؤن،مومن آباد،سرجانی ، ڈسٹرکٹ سینٹرل میں تھانہ خواجہ اجمیر نگری،تیموریہ اورعزیزآباد ، لیاقت آباد،رضویہ،سرسیداوراین کےآئی اے ملزمان کا آسان ہدف رہے۔