لاہور: پنجاب کے مختلف علاقوں میں شدید دھند کا راج ہے، موٹر وے کو متعدد مقامات پر بند کردیا گیا ہے، موٹر وے پولیس نے عوام سے حفاظتی تدابیر اختیار کرنے کی ہدایت کی ہے۔
اے آر وائی نیوز کے مطابق ترجمان پنجاب موٹر وے پولیس نے کہا ہے کہ لاہور اسلام آباد موٹروے ایم 2 دھند کی وجہ سے بند ہے، اس کے علاوہ لاہور سے عبد الحکیم موٹروے ایم 3 بھی دھند کی وجہ سے بند کردی گئی ہے۔
ترجمان کے مطابق موٹروے ایم 4 پنڈی بھٹیاں سے عبدالحکیم تک، موٹروے ایم 5 ملتان سکھر اور لاہور سیالکوٹ موٹروے ایم 11 کو دھند کی وجہ سے بند کر دیا گیا ہے۔
اس کے علاوہ گجرات شہر اور گردونواح میں شدید دھند کا راج ہے، اوکاڑہ شہر اورگردونواح میں بھی شدید دھند کے باعث حدنگاہ انتہائی کم ہے۔
چونیاں شہر اور گردونواح میں بھی شدید دھند ہے، جس کے باعث حدنگاہ 3 سے 4 میٹرتک محدود ہوگئی ہے، قصور اور گردونواح میں بھی شدید دھند کے باعث حد نگاہ صفر ہوگئی ہے۔
ترجمان موٹروے پولیس کے مطابق موٹروے بند کرنے کا مقصد حادثات سے بچاؤ اور موٹروے استعمال کرنے والوں کے جان و مال کا تحفظ ہے، شہریوں سے درخواست ہے کہ دھند کہ اوقات میں غیر ضروری سفر سے گریز کریں۔
اپنا سفر دن کی روشنی میں مکمل کر کے دھند کے آغاز سے پہلے اپنے منزل مقصود تک پہنچ جائیں – گاڑیوں میں فوگ لائٹس کا استعمال کریں، تیز رفتاری سے گریز کریں اور اگلی گاڑی سے مناسب فاصلہ معمول سے زیادہ رکھیں۔
سبی اور گردو نواح میں زلزلہ، لوگوں میں خوف و ہراس
ترجمان موٹروے پولیس نے کہا کہ سفر شروع کرنے سے پہلے موٹروے پولیس ہیلپ لائن 130 یا نیشنل ہائی ویز اینڈ موٹروے پولیس کے آفیشل سوشل میڈیا اکاؤنٹ سے بھی تازہ ترین معلومات ضرور حاصل کر لیں۔
