ماؤنٹ مانگنوئی: انڈر19 کرکٹ ورلڈ کپ کے فائنل میں بھارت نے آسٹریلیا کو 8 وکٹوں سے شکست دے کرعالمی چیمپیئن بننے کا اعزاز حاصل کرلیا۔
تفصیلات کے مطابق انڈر19 کرکٹ ورلڈ کپ کے فائنل میچ میں آسٹریلیا کو باآسانی 8 وکٹوں سے شکست دے کر بھارت چوتھی بارانڈر19 کرکٹ ورلڈ کپ کا فاتح بن گیا۔
بھارتی کرکٹ ٹیم نے آسٹریلیا کے 217 رنز کے ہدف کو 39 ویں اوور میں صرف 2 وکٹوں کے نقصان پر حاصل کرلیا۔
بھارت کی جانب سے منجوت کرالا نے 3 چھکوں اور 8 چوکوں کی مدد سے 102 رنز کی ناقابل شکست اننگز کھیلی اور وہ میچ کے بہترین کھلاڑی قرار پائے۔
بھارتی کرکٹ ٹیم کے کھلاڑی ہارویک دیسائی نے 61 گیندوں پر 5 چوکوں کی مدد سے 47 رنز کی ناقابل شکست اننگز کھیلی جبکہ پرتھوی شاہ نے 29 اورشبمن گل نے 31 رنز اسکور کیے۔
آسٹریلیا کی جانب سے ویل سدرلینڈ اور پرام اوپل نے ایک، ایک وکٹ حاصل کی۔
اس سے قبل انڈر 19 کرکٹ ورلڈ کپ کا فائنل پاکستانی وقت کے مطابق صبح 6 بجے نیوزی لینڈ کے شہرماؤنٹ مانگنوئی میں شروع ہوا۔
میگا ایونٹ کے فیصلہ کن میچ میں آسٹریلیا نے ٹاس جیت کر پہلے بیٹنگ کا فیصلہ کیا اور 47 اوورمیں پوری ٹیم 216 رنز بنا کر آؤٹ ہوگئی۔
کینگروز کی جانب سے جوناتھن مرلو نے شاندار بیٹنگ کا مظاہرہ کرتے ہوئے 76 رنز اسکور کیے۔
بھارت کی جانب سے ایشان پورل نے 7 اوورز میں 30 رنز کے عوض 2 کھلاڑیوں کو آؤٹ کیا، شیوا سنگھ، کملیش نگرکوٹی، اورانوکل روئے نے 2،2،2 وکٹیں حاصل کیں جبکہ شیوم ماوی نے ایک کھلاڑی کو پویلین کی راہ دکھائی۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
