اسلام آباد،لاہور، پشاور : جڑواں شہروں راولپنڈی ، اسلام آباد ، لاہور، پشاور اور گرد و نواح میں موسلا دھار بارش سے موسم خوشگوار ہوگیا محکمہ موسمیات نے وقفے وقفے سے مزید بارش جاری رہنے کی نوید سنادی۔
تفصیلات کے مطابق لاہور،پشاور سمیت پنجاب اور خیبر پختون خوا کےشہروں میں بادل چھم چھم برسے تو پھول بوٹے کھل اٹھے موسم خوشگوار ہوگیا، شدید گرمی کا زور ٹوٹا تو شہریوں کے چہروں پر بھی رونق لوٹ آئی۔
محکمہ موسمیات نے پشاورسمیت خیبرپختونخوا میں چند مقامات پرمزید بارشوں کی خوشخبری دی ہے ساتھ ہی انتظامیہ کو ہدایات بھی جاری کی ہے کہ موسلادھاربارشوں کے لیے پیشگی انتظامات کرلیں۔
آسلام آباد اور گرد و نواح میں بھی موسم مہربان ہوا۔ صبح سویرے سورج کو بادلوں نے گھیر لیا، بارش سے موسم سہانا ہوگیا۔
اسلام آباد اور بالائی علاقوں میں بھی کہیں کہیں موسلادھار بارش کی پیش گوئی کی گئی ہے جبکہ پہاڑی علاقوں میں بارش کے باعث لینڈ سلائڈنگ کا خدشہ بھی ظاہر کیا گیا ہے۔
