ARYNews.tv | Urdu – Har Lamha Bakhabar

Tag: Mozambique

  • موزمبیق میں غیر ملکی بحری جہاز پر کیپٹن سمیت 3 پاکستانی پھنس گئے

    موزمبیق میں غیر ملکی بحری جہاز پر کیپٹن سمیت 3 پاکستانی پھنس گئے

    ماپوتو: مشرقی افریقی ملک موزمبیق میں ایک غیر ملکی بحری جہاز کے کیپٹن سمیت 3 پاکستانی پھنس گئے ہیں۔

    تفصیلات کے مطابق موزمبیق کے بیرا پورٹ پر ایک غیر ملکی بحری جہاز کو روک دیا گیا ہے، جس کے باعث اس میں موجود پاکستانی بھی پھنس گئے ہیں۔

    بتایا جا رہا ہے کہ اٹالین بحری جہاز پر پاکستانی عملہ بھی موجود ہے، جہاز کے کپتان محمد اسلم، عامر شہزاد اور نجات علی کو شدید مشکلات کا سامنا ہے، جہاز پر کھانا اور پانی ختم ہو گیا ہے، ایندھن بھی خاتمے کے قریب ہے۔

    اٹالین جہاز کے مالک اور موزمبیق انتظامیہ کے درمیان ادائیگیوں کا مسئلہ کئی ماہ سے جاری ہے، عملے کو کئی ماہ سے تنخواہ بھی نہیں دی گئی ہے۔

    امریکا کی پاکستان اور بھارت کے درمیان براہ راست رابطے کی حوصلہ افزائی

    وزیر بحری امور محمد جنید انوار چوہدری نے واقعے کا نوٹس لیتے ہوئے موزمبیق میں پھنسے پاکستانیوں کی فوری مدد کی ہدایت کی ہے، ڈی جی پورٹس اینڈ شپنگ نے کیپٹن محمد اسلم سے رابطہ کیا ہے، اور موزمبیق حکومت سے رابطہ کر کے ضروری کارروائی مکمل کی جا رہی ہے۔

    وزارت خارجہ پاکستان سے بھی مدد لی جا رہی ہے، اے آر وائی نیوز سے خصوصی گفتگو میں جہاز کے کیپٹن محمد اسلم نے کہا کہ موزمبیق میں پاکستانی سفارتخانہ نہ ہونے کے باعث رابطے میں دشواری کا سامنا ہے۔

    وزارت بحری امور کے مطابق غیر ملکی بحری جہاز پر 3 پاکستانی اور 9 انڈونیشیئن موجود ہیں۔

  • ویڈیو: موزمبیق کی جیل سے ڈیڑھ ہزار قیدی فرار، 33 ہلاک ہو گئے

    ویڈیو: موزمبیق کی جیل سے ڈیڑھ ہزار قیدی فرار، 33 ہلاک ہو گئے

    ماپوتو: ملک میں جاری افراتفری کا فائدہ اٹھاتے ہوئے موزمبیق کی جیل سے ڈیڑھ ہزار قیدی فرار ہو گئے، جس میں 33 ہلاک ہو گئے ہیں۔

    غیر ملکی میڈیا رپورٹس کے مطابق بدھ کے روز موزمبیق کی جیل میں ہنگامہ آرائی کے دوران 33 افراد ہلاک اور 15 زخمی ہو گئے، یہ واقعہ اس وقت پیش آیا جب 1500 سے زائد قیدی جیل سے فرار ہو رہے تھے۔

    ملک میں تین دن سے بدامنی کا ماحول ہے، حالیہ انتخابات میں ملک میں طویل عرصے سے برسر اقتدار پارٹی فریلیمو نے پھر سے متنازعہ جیت حاصل کر لی ہے، تاہم جیسے ہی اس کی جیت کی تصدیق کی گئی، ملک میں ہنگامے شروع ہو گئے ہیں۔

    قومی پولیس کے سربراہ برنارڈینو رافیل نے ایک پریس کانفرنس میں کہا کہ دارالحکومت ماپوتو سے تقریباً 15 کلومیٹر کے فاصلے پر واقع ہائی سیکیورٹی جیل سے مجموعی طور پر 1,534 قیدی فرار ہوئے، تاہم جیل کے عملے کے ساتھ جھڑپوں میں 33 ہلاک اور 15 زخمی ہوئے، جب کہ فوج کی مدد سے 150 قیدیوں کو دوبارہ پکڑ لیا گیا ہے۔

    پولیس کے مطابق تقریباً 30 قیدیوں کا تعلق اُن مسلح گروہوں سے تھا جو شمالی صوبے کابو ڈیلگاڈو میں گزشتہ 7 سالوں سے بدامنی اور حملوں کے پیچھے ہیں، قیدیوں کے فرار کے بعد ملک کے مخلتف علاقوں میں لوٹ مار کے واقعات رونما ہوئے ہیں۔

    شامی حکومت کو ابھی سے کرفیو نافذ کرنا پڑ گیا

    واضح رہے کہ پرتگالی بولنے والے افریقی ملک موزمبیق کی اعلیٰ ترین عدالت نے پیر کے روز اس بات کی تصدیق کی تھی کہ 1975 سے اقتدار میں رہنے والے فریلیمو نے 9 اکتوبر کو ہونے والے صدارتی انتخابات میں کامیابی حاصل کر لی ہے۔

  • موزمبیق : خاتون کا اجتماعی ذیادتی کے بعد سفاکانہ قتل، خوفناک انکشاف

    موزمبیق : خاتون کا اجتماعی ذیادتی کے بعد سفاکانہ قتل، خوفناک انکشاف

    سوفالا : موزمبیق میں ایک خاتون کے ساتھ زیادتی اور اس کے بعد اسے قتل کرنے کے الزامات میں چار ملزمان کو گرفتار کیا گیا ہے۔ ملزمان نے تاوان کی رقم نہ ملنے پر خاتون کو مار ڈالا۔

    غیر ملکی خبر رساں ادارے کی رپورٹ کے مطابق ٹیٹے کی رہائشی خاتون ماتلد انسیلمو کو ایک مشتبہ شخص نے فیس بک کے ذریعے بہلا پھسلا کر ملاقات پر آمادہ کیا۔

    یہ افسوسناک واقعہ ملک بھر میں صدمے کی لہر دوڑانے کا سبب بنا ہے۔ اس کہانی کا آغاز 15 تاریخ کو اس وقت ہوا جب ایک شخص نے سوشل نیٹ ورک فیس بک پر ایک پرتعیش لیکن جعلی طرز زندگی دکھا کر ایک خاتون سے دوستی کی۔

    کچھ دنوں بات چیت کے بعد دونوں نے اگلے دن ملاقات کا منصوبہ بنایا جس کے مطابق مذکورہ خاتون صوبہ سوفالا کے ضلع میں اس شخص سے ملاقات کے لیے گئی۔

    ڈونڈو میں ملزم اپنے تین ساتھیوں کے ساتھ خاتون سے ملا، ملزمان نے خاتون کے ہاتھ پیر باندھ کر قریبی جنگل میں لے گئے اور اس کے ساتھ زیادتی کی، ملزمان نے خاتون کی اسی حالت میں تصاویر بھی لیں۔

    بعد ازاں ملزمان نے مقتولہ کے خاندان سے 100لاکھ متکائش (کرنسی) کا مطالبہ کیا لیکن بات 80ہزار میں طے ہوئی۔ مجرموں نے تاوان کے مطالبے کو مضبوط کرنے کے لیے وہ تصاویر بھیج دیں جو انہوں نے اس کی لی تھیں، جب اہل خانہ مطلوبہ رقم فراہم نہ کرسکے تو اغواء کاروں نے خاتون کو قتل کردیا۔

  • ویڈیوز: ملاوی، موزمبیق اور مڈغاسکر میں طوفان فریڈی نے تباہی مچا دی

    ویڈیوز: ملاوی، موزمبیق اور مڈغاسکر میں طوفان فریڈی نے تباہی مچا دی

    بلانٹائر: ملاوی، موزمبیق اور مڈغاسکر میں طوفان فریڈی کی تباہ کاریوں سے درجنوں افراد ہلاک ہو گئے۔

    غیر ملکی میڈیا رپورٹس کے مطابق افریقی ملک ملاوی، موزمبیق اور مڈغاسکر میں سمندری طوفان فریڈی نے تباہی مچا دی، 136 افراد ہلاک ہو گئے، طوفانی ہواؤں سے سیکڑوں مکانات کی چھتیں اڑ گئیں۔

    الجزیرہ کے مطابق ورلڈ میٹرولوجیکل آرگنائزیشن کا کہنا ہے کہ یہ طوفان جنوبی نصف کرہ میں ریکارڈ کیے گئے طاقت ور ترین طوفانوں میں سے ایک ہے، جو دوسری بار جنوبی افریقہ سے ٹکرایا ہے۔

    روئٹرز نے لکھا کہ موزمبیق اور ملاوی نے پیر کے روز ٹراپیکل طوفان فریڈی کی قیمت چُکائی، جس میں 100 سے زائد افراد ہلاک، متعدد زخمی ہوئے اور طوفان نے اپنے پیچھے تباہی کے زبردست نشانات چھوڑے، اس طوفان نے ایک ماہ میں دوسری بار جنوبی افریقہ کو چیر کر رکھ دیا ہے۔

    ورلڈ میٹرولوجیکل آرگنائزیشن کے مطابق یہ طوفان سب سے زیادہ دیر تک چلنے والا ٹراپیکل طوفان ہے۔

    طوفانی بارشوں نے ہفتے کے روز وسطی موزمبیق کو بری طرح گھیرے رکھا، جس سے سیکڑوں عمارتوں کی چھتیں اڑ گئیں، اس کے بعد ملاوی کی طرف اندرون ملک جانے سے پہلے کوئلیمانے کی بندرگاہ کے ارد گرد اس طوفان کی وجہ سے بڑے پیمانے کا سیلاب آیا، جہاں یہ طوفانی بارشوں کا سبب بنا اور اس کی وجہ سے لینڈ سلائیڈنگ ہوئی۔

    ملاوی میں بہت سے گھر ٹین کی چھتوں والے اور مٹی کے ہیں، جہاں زیادہ تر لوگوں کے زخمی ہونے کی وجہ درخت گرنا، لینڈ سلائیڈنگ اور سیلاب رہی، گھروں کی چھتیں لوگوں کے سروں پر گرنے سے بہت سارے لوگ زخمی ہوئے۔

    آفات سے نمٹنے کے امور کے محکمے کے کمشنر چارلس کلیمبا نے ایک پریس بریفنگ میں بتایا کہ طوفان نے ملاوی میں 99 افراد کی جان لے لی ہے، جن میں 85 بلانٹائر کے اہم تجارتی مرکز میں ہلاک ہوئے۔ تاہم موزمبیق میں جانی و مالی نقصان کی مکمل تفصیلات ابھی تک واضح نہیں ہوئی ہیں، کیوں کہ متاثرہ علاقے کے کچھ حصوں میں بجلی کی سپلائی اور فون کے سگنل منقطع ہو گئے ہیں۔

    روئٹرز کے مطابق موزمبیق، ملاوی اور مڈغاسکر میں طوفان فریڈی سے ہلاک ہونے والوں کی کل تعداد اب 136 کے لگ بھگ ہے۔

  • موزمبیق کے ایک شہر پر داعش نے قبضہ کر لیا

    موزمبیق کے ایک شہر پر داعش نے قبضہ کر لیا

    ماپوٹو: داعش نے موزمبیق کے شہر پالما پر قبضہ کر لیا ہے۔

    تفصیلات کے مطابق غیر ملکی میڈیا نے کہا ہے کہ دہشت گرد تنظیم داعش نے موزمبیق کے شہر پالما پر قبضہ کر لیا ہے۔

    رپورٹس کے مطابق داعش نے گزشتہ بدھ کو شہر پالما پر حملے کا آغاز کیا تھا، اور اب اس نے شہر پر قبضہ کر لینے کا دعوی کر دیا ہے۔

    موزمبیق کی وزارت دفاع کے حوالے سے ایک میڈیا رپورٹ میں کہا گیا تھا کہ مسلح دہشت گردوں نے گیس کے ذخائر کے حامل چھوٹے شہر پالما پر حملہ کر دیا ہے، جس میں متعدد افراد ہلاک ہو چکے ہیں۔

    داعش کے حملے کے بعد پالما سے مقامی لوگوں نے شہر چھوڑنا شروع کر دیا تھا، میڈیا رپورٹس میں بھی کہا جا رہا ہے کہ لوگ شہر چھوڑ کر جا رہے ہیں۔

    واضح رہے کہ گیس کے ذخائر سے مالا مال پالما شمالی موزمبیق میں واقع ایک ساحلی شہر ہے، فرانس کی ٹوٹل کمپنی اس علاقے کا تیل اور گیس نکالنے کے لیے تنصیبات لگا رہی ہے۔

    موزمبیق کے کابودلگادو ریجن کے شہر اور دیہات 2017 سے انتہا پسندوں اور دہشت گردوں کے نشانے پر ہیں، اب تک اس علاقے میں داعش کے حملوں میں سیکڑوں افراد ہلاک ہو چکے ہیں۔

    علاقے سے لوگوں کی نقل مکانی بھی جاری ہے، ہزاروں افراد جانیں بچانے کے لیے علاقہ چھوڑ کر دیگر مقامات پر منتقل ہو چکے ہیں۔

  • موزمبیق: سمندری طوفان اربوں‌ ڈالرز کا انفرا اسٹرکچر بہا لے گیا

    موزمبیق: سمندری طوفان اربوں‌ ڈالرز کا انفرا اسٹرکچر بہا لے گیا

    ماپوتو: سمندری طوفان نے افریقی ملک موزمبیق میں تباہی مچا دی، اربوں ڈالرز کا انفرا اسٹرکچر تباہ ہوگیا۔

    تفصیلات کے مطابق جنوبی افریقی ملک موزمبیق میں یکے بعد دیگر  آنے والے دو سمندری طوفانوں نے تباہی مچا دی، جن کی وجہ سے چھ سو سے زائد افراد اپنی زندگی سے ہاتھ دھو بیٹھے۔

    ان طوفانوں سے زمباوے بھی شدید متاثر ہوا، جہاں ہلاکتوں کی تعداد تین سو سے زاید ہے۔

    موزمبیق میں نظام زندگی تباہ ہوچکا ہے، بجلی کی فراہمی کئی شہروں میں معطل ہے، غذا اور پانی کی قلت خطرناک شکل اختیار کر گئی۔ وبائیں پھوٹنے کا خدشہ بھی ظاہر کیا جارہا ہے۔

    سمندری طوفان کی وجہ سے فصلیں بھی تباہ ہو گئیں، لاکھوں افراد خوراک کی قلت کا شکار ہیں۔ سنگین حالات کے پیش نظر اقوام متحدہ حرکت میں آگئی ہے، ریڈ کراس نے امداد شروع کر دیں۔

    موزمبیق سرکار کا کہنا ہے کہ طوفانوں کی وجہ سے پہنچنے والے نقصان کے ازالے کے لیے 3.2 ارب ڈالر درکار ہیں۔

    حکومت کی جانب سے ایک عالمی امدادی کانفرنس میں اپیل کی گئی ہے، تاکہ امدادی کارروائیاں بڑے پیمانے پر شروع ہوسکیں۔

  • جل، اجل بن گیا، موزمبیق میں سیلاب نے تباہی مچا دی

    جل، اجل بن گیا، موزمبیق میں سیلاب نے تباہی مچا دی

    ماپوتو: افریقی ملک موزمبیق میں پانی موت کی علامت بن گیا، سیلاب اور تیز بارشوں نے تباہی مچا دی.

    تفصیلات کے مطابق افریقہ کے جنوب مشرق میں واقع موزمبیق ایک بار پھر طوفانوں‌ اور سیلاب کی زد میں‌ ہے.

    افریقی ملک میں سمندری طوفان کے ساتھ ہونے والی مسلسل بارشوں کے باعث ہلاکتوں کی تعداد 38 تک پہنچ گئی۔

    موزمبیق کی شمالی ساحلی پٹی سے سمندری طوفان کینیتھ گزشتہ ہفتے ٹکرایا، اس طوفان سے سب سے متاثر صوبہ کابو ڈیلگاڈو ہوا.

    متاثروں علاقوں میں ہزاروں مکان منہدم ہو گئے، کئی گاؤں صفحہ ہستی سے مٹ گئے، کئی علاقے ملک کے دیگر علاقوں‌ سے کٹ گئے. سڑکیں بہہ گئیں اور مواصلاتی نظام درہم برہم ہوگیا.

    موزمبیق میں متاثرہ افراد کی تعداد ایک لاکھ سے زائد بتائی گئی ہے، امدادی کارروائیوں کا سلسلہ جاری ہے۔ 

    مزید پڑھیں: ایران اورپاکستان کے بعد افغانستان میں طوفانی بارشوں نے تباہی مچادی

    خیال رہے کہ اس صوبے کو چند روز پہلے بھی ایک تباہ کن طوفان کا سامنا کرنا پڑا تھا.

    حکومت کے مطابق تباہی توقع سے زیادہ ہے. ابھی تک مجموعی نقصان کا تخمینہ نہیں لگایا جا سکا۔

  • افریقا میں چار ٹانگوں‌ والےعجیب الخلقت بچے کی پیدائش

    افریقا میں چار ٹانگوں‌ والےعجیب الخلقت بچے کی پیدائش

    مپوٹو: افریقی ملک موزمبیق میں ایک انوکھے بچے کی پیدائش ہوئی ہے جس کی چار ٹانگیں ہیں، ڈاکٹروں نے ماں اور بچے کی حالت تسلی بخش قرار دے دی، اسی صوبے میں رواں غیر معمولی پیدائش کا یہ دوسرا واقعہ ہے۔

    افریقی میڈیا کے مطابق افریقا کے ملک موزمبیق کے مغربی صوبے مانیکا میں ایک خاتون کے ہاں چار ٹانگوں والے بچے کی پیدائش ہوئی ہے جسے انتہائی انوکھا  قرار دیا جارہا ہے۔

    غیر ملکی میگزین کے مطابق ڈاکٹروں نے غیر معمولی پیدائش کی تصدیق کرتے ہوئے کہا ہے کہ بچے اور ماں کی حالت ٹھیک ہے ،دوران حمل کوئی پیچیدگی نہیں ہوئی، ڈلیوری بھی نارمل طریقے سے ہوئی، بچے کی دو کے بجائے چار ٹانگیں ہیں ،اگر اس بچے کا آپریشن کیا جائے تو اضافی دو ٹانگوں کو جسم سے علیحدہ کیا جاسکتا ہے تاہم میڈیا کو بچے کی جنس کے بارے میں اطلاعات نہیں مل سکیں۔

    اطلاعات کے مطابق اسی صوبے مانکیا میں رواں ماہ بھی ایک ایسے بچے کی پیدائش ہوئی تھی جس کی تین ٹانگیں تھیں تاہم وہ بچہ جانبر نہ ہوسکا۔

    اس خطے میں غیر معمولی پیدائش کے واقعات کی شرح زیادہ ہے جب کہ قبل از وقت پیدائش حمل کے اسکین کی سہولت بھی اکثر دستیاب نہیں ہوتی۔

    ہفتہ وار میگزین انڈیپنڈیٹ کے مطابق جنوری 2014ء میں زمبابوے میں ایک غیر پیدائش ہوئی تھی جس میں دو بچے ایک ساتھ جڑے ہوئے تھے۔