اسلام آباد: عدالت نے ڈپٹی کمشنر اسلام آباد کا ایم پی او جاری کرنے کا اختیار بحال کر دیا۔
تفصیلات کے مطابق ڈپٹی کمشنر اسلام آباد کو ایم پی او آرڈر جاری کرنے سے روکنے کا سنگل بینچ کا فیصلہ معطل کر کے اسلام آباد ہائیکورٹ نے ڈپٹی کمشنر اسلام آباد کا ایم پی او جاری کرنے کا اختیار عارضی طور پر بحال کر دیا۔
سنگل بینچ جسٹس بابر ستار نے ڈی سی اسلام آباد کا ایم پی او جاری کرنے کا اختیار غیر قانونی قرار دیا تھا، اس فیصلے کے خلاف چیف کمشنر اور سیکریٹری داخلہ نے انٹرا کورٹ اپیل دائر کر رکھی ہے۔
اسلام آباد ہائیکورٹ کے چیف جسٹس عامر فاروق اور جسٹس طارق محمود جہانگیری کے دو رکنی بینچ نے کیس کی سماعت کرتے ہوئے سنگل بینچ فیصلے کے خلاف چیف کمشنر و دیگر کی اپیل پر فریقین کو نوٹس جاری کر دیا۔
بینچ نے احکامات جاری کرتے ہوئے حکم امتناع کی درخواست پر ڈی سی اسلام آباد کا ایم پی او جاری کرنے کا اختیار عارضی طور پر بحال کر دیا۔
