Tag: mqm altaf hussain

اسلام آباد: جمعیت علمائے اسلام ف کے سربراہ مولانا فضل الرحمن نے متحدہ قومی موومنٹ کے قائد الطاف حسین سے ٹیلی فون پر رابطہ کیا، دونوں رہنماؤں نے ملک میں گزشتہ کئی دنوں سے جاری سیاسی بحران اور ملک کی مجموعی صورتحال پر تفصیلی تبادلہ خیال کیا۔

مولانا فضل الرحمان نے الطاف حسین سے گفتگو کرتے ہوئے درخواست کی کہ ایم کیوایم ایک بڑی عوامی جماعت ہے اور ملکی سیاست میں اس کا اہم کردار ہے لہٰذا وہ ایم کیوایم کے ارکان پارلیمنٹ کے استعفے کے فیصلے پر نظرثانی کریں اور ملک کی سیاسی تاریخ کے اس اہم موڑ پر اپنے موٴقف کو بیان کرنے اور جمہوریت کی بقاء میں اپنا بھرپور کردار ادا کرنے کیلئے ایم کیوایم کے ارکان کو پارلیمنٹ کے مشترکہ اجلاس میں شرکت کی بھی ہدایت کریں۔

الطاف حسین نے مولانا فضل الرحمان کی درخواست کو منظور کرتے ہوئے ایم کیوایم کے ارکان پارلیمنٹ کے استعفے کے فیصلے کو موٴخرکر دیا ہے اور انہیں یقین دلایا کہ ایم کیوایم کے نمائندے پارلیمنٹ کے مشترکہ اجلاس میں بھی شرکت کریں گے۔

مولانافضل الرحمان نے الطاف حسین کی اس بات کی مکمل تائید کی کہ ملک میں طوفانی بارشوں اورسیلاب سے ہونیوالی تباہ کاریوں اور نازک صورتحال کے پیش نظردو سیاسی جماعتوں کی جانب سے دیئے جانے والے احتجاجی دھرنے ملتوی کردیئے جائیں ۔

دونوں رہنماوٴں نے ملک میں طوفانی بارشوں اورسیلاب سے بڑے پیمانے پر ہونے والے جانی ومالی نقصانات پربھی شدید افسوس کا اظہار کیا اور اس بات پراتفاق کیا کہ اس وقت ملک کی تمام جماعتوں کوآپس میں متحد ہو کر قدرتی آفات کے متاثرین اور آئی ڈی پیز کی بھرپور مدد کرنا چاہیے۔