وزیراعظم شہباز شریف نے ایم کیو ایم کے وفد سے ملاقات کی ہے اور انہیں یقین دلایا ہے کہ معاہدے کے نکات پر جلد عملدرآمد شروع کردیا جائیگا۔
اے آر وائی نیوز کے مطابق وزیراعظم شہباز شریف نے پارلیمنٹ لاجز میں حکومت کی اتحادی جماعت ایم کیو ایم کے وفد سے ملاقات کی جس میں خالد مقبول صدیقی، امین الحق، وسیم اختر ودیگر شامل تھے۔
ملاقات کے حوالے سے ذرائع نے اے آر وائی نیوز کو بتایا کہ وزیراعظم نے عدم اعتماد کیلیے ووٹ دینے پر ایم کیو ایم قیادت کا شکریہ ادا کیا اور کہا کہ سندھ کی ترقی کیلیے ایم کیو ایم کو ساتھ لے کر چلنا ہے۔
ذرائع کے مطابق وزیراعظم نے ایم کیو ایم وفد کو یقین دلایا کہ ایم کیوایم سے ہونیوالے معاہدے کے نکات پر جلد عملدرآمد شروع کردیا جائیگا اور وفاق کے تحت کراچی اور سندھ کے منصوبے جلد مکمل کیے جائیں گے۔
ذرائع نے یہ بھی بتایا کہ وزیراعظم نے ایم کیو ایم کو وفاقی کابینہ میں شامل کرنے کے فیصلے سے آگاہ کرتے ہوئے ایم کیو ایم سے کابینہ میں شمولیت کے لیے نام مانگ لیے ہیں۔
ذرائع نے بتایا کہ ملاقات میں بتایا گیا کہ بلدیاتی ایکٹ پرعملدرآمد کیلئے ایم کیو ایم نے ڈرافٹ کی تیاری شروع کر دی ہے جس مکمل ہونے کے بعد پیپلز پارٹی کو دیا جائیگا اور پی پی مضبوط بلدیاتی نظام کیلیے ڈرافٹ پر قانون سازی کرکے اسمبلی سے پاس کرائیگی۔
دوسری جانب وزیراعظم شہباز شریف کل کراچی کا ایک روزہ دورہ کریں گے، وہ اتحادیوں کے ہمراہ مزار قائد پر حاضری دیں گے جس کے بعد وزیراعلیٰ ہاؤس جائیں گے جہاں وہ کراچی میں ترقیاتی منصوبوں کی حکمت عملی کیلیے اجلاس کی صدارت کرینگے۔
