کراچی : لب و لہجے میں تلخی سے اداروں کے خلاف ہرزہ سرائی تک مریم نواز ایم کیو ایم بانی کی ڈگر پر چل پڑی ہیں۔ بانی ایم کیو ایم نے اپنی حرکتوں سے پارٹی کو ڈبو دیا۔
موجودہ صورتحال میں مختلف حلقوں کی جانب سے سوالات اٹھ گئے کہ کیا مریم نواز کا بیانیہ بھی ن لیگ کو تباہی کی طرف لے جا رہا ہے؟ ن لیگ کہنے کو تو قومی جماعت ہے لیکن اس کا بیانیہ ریاست کے خلاف ہے۔
بانی ایم کیو ایم کے خلاف بھی قانون حرکت میں آیا۔ اس کے ردعمل میں ان کا رویہ خود کو تباہی کی طرف لے جانا والا تھا، پہلے ان کا لہجہ سخت ہوا۔ پھرریاستی اداروں کے خلاف زہر اگلا اور پھر ملک کے خلاف ہی کھڑے ہوگئے۔
ان دنوں رابطہ کمیٹی آئے روز اپنے بانی کے پاکستان مخالف بیانات کی توثیق اور دفاع کرتی رہی اور آج نتیجہ سب کے سامنے ہے۔ بعد ازاں بچی کچھی ایم کیو ایم نے بھی اپنے بانی سے لاتعلقی کا اظہار کرلیا۔
کچھ ایسے ہی راستے پر ن لیگ کی نائب صدر مریم نواز بھی چل پڑی ہیں اور یہ راستہ ان کو ن لیگ کے قائد نواز شریف نے ہی دکھایا تھا۔ جو ووٹ کے عزت کے نعرے سے شروع ہوئے اور سانحہ اکہتر جیسی دھمکیوں پر اتر آئے۔
یہی نہیں انہوں نے ملک اور ریاستی اداروں کے خلاف انٹرویو بھی دیئے۔ اب مریم نواز کے بیانات بھی سب کے سامنے ہیں۔ پہلے وہ کہتی رہیں کہ کسی بھی حد تک جاؤں گی۔
پھر انہوں نے اداروں پر کیچڑ اچھالنے کی مہم شروع کردی اور اب وہ سڑکوں پر قانون کی دھجیاں اڑاتی پھر رہی ہیں۔ سوال یہ پیدا ہوتا ہے کہ کیا ن لیگ کا حال بھی ایم کیوایم اور بانی ایم کیو ایم جیسا ہوگا؟
کراچی : انسداد دہشت گردی کی خصوصی عدالت نے ڈاکٹر پرویز محمود قتل کیس میں ملوث ایم کیو ایم لندن سے تعلق رکھنے والے ملزمان کو عدم ثبوت کی بنا پر بری کردیا ہے۔
تفصیلات کے مطابق کراچی سینٹرل جیل میں انسداد دہشت گردی کمپلیکس میں قائم خصوصی عدالت نے جماعت اسلامی کے سابق ٹاؤن ناظم ڈاکٹر پرویز محمود قتل کیس کا محفوظ فیصلہ سنادیا۔
ہفتہ کو جماعت اسلامی کے سابق ٹاؤن ناظم ڈاکٹر پرویز محمود قتل کیس کی سماعت کے موقع پر مقدمے کا محفوظ فیصلہ سناتے ہوئے ملزمان مسعود عرف کالا، آصف عرف آلٹو، بابر عرف موٹا کو عدم ثبوت کی بنا پر بری کردیا۔
مفرور ملزمان میں عمران نیازی، طاہر قادیانی، زبیر عرف پپا، عبدالرحمن، سابقہ سیکٹر انچارج فیصل،جوائنٹ سیکٹر انچارج ریحان، فیضان الیاس، سمیر نائی، شکیل موٹا شامل ہیں پولیس کا الزام تھا کہ گرفتار ملزمان نے ڈاکٹر پرویز محمود کی ٹارگٹ کلنگ کا اعتراف کیا ہے۔
یاد رہے کہ جماعت اسلامی کے مقامی رہنما اور لیاقت آباد ٹاؤن کے ناظم کو 17 ستمبر 2012 کے روز نارتھ ناظم آباد میں فائرنگ کر کے قتل کیا گیا تھا۔
ڈاکٹر پرویز اپنی گاڑی میں جارہے تھے کہ حیدری کے قریب واقع کے ڈی اے چورنگی پر نامعلوم مسلح ملزمان نے فائرنگ کردی۔ حادثے میں پرویز محمود کے ہمراہ ان کے دوست خلیق اللہ بھی جاں بحق ہوئے تھے۔
سابق ٹاؤن انچارج کو زخمی حالت میں عباسی شہید اسپتال منتقل کیا گیا تھا البتہ وہ زخموں کی تاب نہ لاتے ہوئے دم توڑ گئے تھے۔ جماعت اسلامی نے اُن کے قتل کا الزام ایم کیو ایم پر عائد کیا تھا۔
کراچی : سی ٹی ڈی نے کارروائی کرکے ایم کیوایم لندن کے دو ٹارگٹ کلر گرفتار کرلیے، رینجرز نے کراچی کے مختلف علاقوں میں سرچ آپریشن کرکے مشکوک افراد اور گھروں کی تلاشی لی۔
تفصیلات کے مطابق سی ٹی ڈی نے کراچی میں خفیہ اطلاع پر کامیاب کارروائی کرکے دو ٹارگٹ کلر گرفتار کرلیے اس حوالے سے سی ٹی ڈی حکام کا کہنا ہے کہ گرفتارملزمان کا تعلق ایم کیوایم لندن سے ہے۔
ملزمان کی شناخت عاقب گولڈن اور عامربھیا کےنام سے ہوئی، عاقب گولڈن ٹارگٹ کلنگ اور دہشت گردوں کو اسلحہ فراہمی میں ملوث ہے، ایس پی سی ٹی ڈی کے مطابق ملزم عامر بھیا ٹارگٹ کلنگ اور بھتہ خوری میں ملوث ہے، ملزم عامر بھیا، تاج محمد اور محمد آصف کو قتل کرچکا ہے، اس کے علاوہ ملزم عامربھیا جلاؤ گھیراؤ کی وارداتوں میں بھی ملوث رہا ہے۔
اس کے علاوہ رینجرز نے کراچی کے مختلف علاقوں میں سرچ آپریشن کرکے مشکوک افراد اور گگھروں کی تلاشی لی، ذرائع کے مطابق مذکورہ آپریشن لائنزایریا، شارع قائدین اور پریڈی اسٹریٹ کے علاقوں میں کیا جارہا ہے، آپریشن میں12رینجرز کی گاڑیاں اور موٹر سائیکل سوار اہلکار حصہ لے رہے ہیں۔
آپریشن کے دوران مشکوک افراد اور مشکوک گھروں کی تلاشی لی گئی، اس موقع پر مخصوص مقامات کے داخلی وخارجی راستے بند کردیے گئے۔ علاوہ ازیں پولیس اور رینجرز اہلکاروں نے گلبہار، حاجی مرید گوٹھ میں مشترکہ سرچ آپریشن کیا، پولیس اور رینجرز نے علاقے کو گھیرےمیں لے کر گھر گھر تلاشی لی، ایس ایس پی عارف اسلم سرچ آپریشن کی نگرانی کررہے ہیں۔
کراچی: رینجرز نے شہر کے مختلف علاقوں میں کارروائیاں کرتے ہوئے ایم کیو ایم لندن کے دو کارندوں سمیت15افراد کو حراست میں لے کر اسلحہ برآمد کرلیا۔ملزمان پر سنگین نوعیت کے مقدمات ہیں۔
تفصیلات کے مطابق کراچی کے مختلف علاقوں میں رینجرز نے کامیاب کارروائی کرکے ایم کیو ایم لندن کے دو کارندوں سمیت 15ملزمان گرفتار کرکے ان کے قبضے سے اسلحہ برآمد کرلیا۔
اس حوالے سے ترجمان رینجرز کا کہنا ہے کہ رینجرز نے انٹیلی جنس معلومات کی بنیا د پرفائر بریگیڈ ناظم آباد اور سیکٹرالیون ایف نیو کراچی میں کارروائی میں دو انتہائی مطلوب ٹارگٹ کلرز محمد خالد عرف مودی اور معراج الدین عرف ماجو گرفتارکیا۔
ملزمان کا تعلق ایم کیو ایم (لندن) سے ہے،ترجمان رینجرز کے مطابق ملزم خالد سر سید تھانے کے ایس ایچ او انسپکٹر عرفان حیدر اور نیو کراچی تھانہ کے سینئر انویسٹی گیشن آفیسرشہباز علی کے قتل میں ملوث ہے،ملزمان ٹارگٹ کلنگ، بھتہ خوری، کھالیں چھیننے، زبردستی فطرانہ اکٹھا کرنے، فائر نگ، شٹر ڈان ہڑتالیں کروانے اور روڈ بلاک کرنے میں ملوث ہیں۔
ملزم محمد خالد یونٹ نمبر137اے نارتھ کراچی کا ممبر رہا 2012میں سیکٹر ممبر بن گیا،ملزم 2008میں شاہ نواز بھٹو کالونی نارتھ کراچی میں ایم کیو ایم اور اے این پی کے درمیان جھگڑے میں ملوث ہے۔
ملزم معراج 2011 ایم کیو ایم (الطاف) میں شمولیت اختیار کی اور یونٹ نمبر33F ایوب گوٹھ گڈاپ ٹاوٴن کا ممبر رہا،ملزم معراج عبداللہ عرف ڈاکٹر(پی ایم ایل۔ف)اور اختر گبول کے قتل میں ملوث ہے ،ملزم احسن آباد گڈاپ ٹاوٴن میں 30 پلاٹوں پر چائنہ کٹنگ میں ملوث ہے۔
ترجمان رینجرز کے مطابق رینجرز نے سہراب گوٹھ، مبینہ ٹاؤن، کھارادر، گارڈن، عید گاہ اور نبی بخش کے علاقے میں کارروائی میں13ملزمان کو گرفتارکیا۔ گرفتار ملزمان ڈکیتی اور اسٹریٹ کرائم کی متعدد وارداتوں میں ملوث ہیں، ملزمان کے قبضے سے اسلحہ، ایمونیشن، اور مسروقہ سامان برآمد کرلیا۔
کراچی : شہرقائد سے گرفتاریاسین عرف چھوٹا ڈان ٹارگٹ کلر نے بتایا ہے کہ سعودی عرب میں مقیم مطلوب ٹارگٹ کلرعالم بنگالی ہدایتیں اورسہولتیں دیتا تھا۔
تفصیلات کے مطابق متحدہ لندن کےجنوبی افریقہ کے بعد سعودی عرب کے سیٹ اپ کا انکشاف ہوا، ابراہیم حیدری سے گرفتار یاسین عرف چھوٹا ڈان ٹارگٹ کلر نے مزید اہم رازآشکار کیے ہیں۔
پولیس کا کہنا ہے ملزم متحدہ لندن کے ٹارگٹ کلر عالم بنگالی کےلیے کام کرتارہا اور یاسین عرف چھوٹاڈان سانحہ چکراگوٹھ کےبعد سعودی عرب فرارہوا، سعودی عرب میں مقیم مطلوب ٹارگٹ کلرعالم بنگالی نے ملزم کوسہولتیں دیں۔
ملزم نے قتل اور اغواسمیت 14 وارداتیں کیں اور متحدہ لندن سے علیحدگی کے بعدپی ایس پی میں شمولیت اختیارکی جبکہ 2010 میں کورنگی روڈ پر کلاشکوف سے پولیس پر فائرنگ کا بھی اعتراف کیا۔
پولیس کے مطابق ملزم کوسعودی عرب سے عالم بنگالی ہدایتیں دیتا تھا۔
یاد رہے گذشتہ ہفتے کاؤنٹر ٹیرر ازم ڈیپارٹمنٹ نے کراچی کے علاقے سرجانی میں مختلف کارروائیوں میں 4 ٹارگٹ کلرز گرفتار کیا تھا ، ٹارگٹ کلرز کا تعلق ایم کیو ایم لندن اور جماعت اسلامی سے بتایا گیا تھا۔
ایس پی سی ٹی ڈی کا کہنا تھا کہ گرفتار ٹارگٹ کلرز نے تفتیش کے دوران 8 سے زائد ٹارگٹ کلنگ کی وارداتوں کا اعتراف کیا ہے۔
اس سے قبل رینجرز اور پولیس نے ایم کیو ایم لندن کے کارکن سلیم بیلجئم کی ٹارگٹ کلنگ ٹیم کا اہم دہشت گرد گرفتار کیا تھا ، کارروائی انٹیلی جنس معلومات کی بنیاد پر کی گئی، ملزم دہشت گردی کی وارداتوں میں ملوث تھا۔
کراچی : رینجرز اور پولیس نے ایم کیو ایم لندن کے کارکن سلیم بیلجئم کی ٹارگٹ کلنگ ٹیم کا اہم دہشت گرد گرفتار کرلیا، کارروائی انٹیلی جنس معلومات کی بنیاد پر کی گئی، ملزم دہشت گردی کی وارداتوں میں ملوث ہے۔
تفصیلات کے مطابق رینجرز اور پولیس نے مشترکہ ایکشن لیتے ہوئے ایم کیو ایم لندن کے گرفتار ٹارگٹ کلر سلیم بیلجئم کی ٹیم کے اہم کارندے کو حراست میں لے لیا، گرفتار ملزم غفران احمد ٹارگٹ کلنگ اور دہشت گردی کی متعدد وارداتوں میں ملوث رہا ہے۔
اس حوالے سے ترجمان رینجرز کا کہنا ہے کہ رینجرز اور پولیس نے انٹیلی جنس معلومات کی بنیاد پر کامیاب مشترکہ کارروائی کی، ملزم نے23دسمبر کو پی ایس پی ٹاؤن آفس پر حملے کی سہولت کاری کی۔
ملزم نے پی ایس پی ٹاؤن آفس پر حملے کے لئے ریکی کی ، ترجمان رینجرز کا مزید کہنا ہے کہ ٹاؤن آفس پر فائرنگ میں پی ایس پی کے دو عہدیدار جاں بحق ہوئے تھے، ٹارگٹ کلنگ ٹیم کے8ملزمان پہلے ہی پولیس کی تحویل میں ہیں۔
کراچی: سندھ رینجرز نے ٹارگٹ کلنگ کی حالیہ وارداتوں میں ملوث ایم کیو ایم لندن کے 8 ملزمان کو گرفتار کرلیا جو واٹس ایپ کے ذریعے بیرون ملک مقیم سلیم بلیجیئم کے احکامات پر کارروائیاں کرتے تھے۔
کراچی رینجرز ہیڈکوارٹر میں پریس کانفرنس کرتے ہوئے کرنل فیصل کا کہنا تھا کہ حالیہ ٹارگٹ کلنگ میں ملوث ایم کیوایم لندن کے 8ملزمان کو گرفتار کرلیا جبکہ ابھی 7 مفرور ہیں جن کو جلد قانون کی گرفت میں لایا جائے گا، حراست میں لیے گئے تمام ملزمان لندن میں مقیم رہنما سلیم بیلجیئم کی ٹارگٹ کلنگ کا حصہ تھے۔
کرنل فیصل کا کہنا تھا کہ بانی ایم کیوایم کی ہدایت پر سلیم ٹارگٹ کلنگ ٹیم کو کنٹرول کرتا تھا اور انہیں ایم کیو ایم لندن کے حکم پر اسلحہ و مالی امداد فراہم کرتا تھا، ملزمان گرفتاری کے خوف سے موبائل نمبر سے نہیں بلکہ واٹس ایپ استعمال کر کے ایک دوسرے سے رابطے میں رہتے تھے جس کے دوران وہ مختلف چیزوں کے لیے خفیہ الفاظ استعمال کرتے تھے۔
رینجرز حکام کا کہنا تھا کہ ملزمان آئی ای ڈی کے لیے ڈبہ،دستی بم کیلئے آلو کوڈ ورڈ استعمال کرتے تھے،ٹارگٹ کلنگ کی ٹیم آصف پاشا نامی ملزم چلا رہا تھا جنہوں نے حالیہ وارداتوں کا اعتراف کیا اور پی ایس پی کے دفتر پر حملے کو بھی قبولا، حالیہ ٹارگٹ کلنگ کامقصدکراچی کے امن کو خراب کرنا تھا۔
اُن کا کہنا تھا کہ سلیم بیلجیئم عرف جنرل نے ملزمان کو موبائل فون استعمال نہ کرنے اور انڈر گراؤنڈ رہنے کی ہدایت کی، مالی معاونت اور رقم کی فراہمی کے لیے خواتین کو بھی استعمال کیا گیا جس کا اعتراف تفتیش کے دوران ملزمان نے خود کیا۔
کرنل فیصل کا کہنا تھا کہ ملزمان نےگزشتہ چندماہ کےواقعات میں ملوث ہونےکا اعتراف کیا، سلیم بیلجیئم نارتھ کراچی کارہائشی اور ٹارگٹ کلنگ میں ملوث رہا ہے، اُسے 2011میں رینجرز نےگرفتار کرکے پولیس کو حوالے کیا تھا جس کے بعد ملزم مقدمات کا سامنا کرکے بیرون ملک فرار ہوگیا تھا۔
رینجرز حکام کا کہنا تھا کہ ملزم سلیم جنوبی افریقا سمیت دیگر ممالک میں فرار ملزمان کو جمع کرتا ہے اور اُس نے کراچی میں آصف پاشا عرف میجر کو بانی ایم کیو ایم کی ہدایت پر ٹارگٹ کلنگ ٹیم کا سربراہ بنایا، الطاف حسین نے اپنی حالیہ تقاریر میں علیحدگی اختیار کرنے والے ارکان کو نشانہ بنانے کا ذکر بھی کیا۔
کرنل فیصل کا کہنا تھا کہ ایم کیوایم لندن ارکان کو واضح کرتا ہوں کہ اب کراچی میں کوئی نوگوایریا نہیں ہے، متحدہ لندن کے بقیہ رہ جانے والے اراکین بھی قانون کی گرفت سے بچ نہیں سکیں گے، پاکستان رینجرز سندھ کراچی کا امن برقرار رکھنے کے لیے ہر ممکن اقدامات کرےگی۔
اُن کا کہنا تھا کہ بانی ایم کیوایم اپنی تقاریر میں فرقہ واریت پھیلانے کی کوشش کررہےہیں، ایم کیوایم پاکستان اور پی ایس پی کے دفاتر پر ہونے والے حملوں میں زیر استعمال اسلحہ ملزم رضا علی کے گھر سے برآمد ہوا جبکہ آصف پاشا کے گھر سے بھی نائن ایم ایم پستول برآمد کیا گیا۔
رینجرز کے کرنل کا کہنا تھا کہ ملزمان ایم کیو ایم پاکستان کے ممبر شکیل انصاری کے قتل میں بھی ملوث ہیں، اُن کے قتل کے خلاف ایم کیو ایم نے 14 فروری کو احتجاج کا اعلان کیا جس میں بم دھماکا کرنے کی منصوبہ بندی بھی سلیم اور اُس کے ساتھیوں نے کی تاہم وہ سخت سیکیورٹی کی وجہ سے ناکام رہے جبکہ ملزمان نےفاروق ستار پر حملےکے لیے بھی آئی ای ڈی بنائی لی تھی جسے کارروائی کے دوران برآمد کرلیا گیا۔
ملزمان نے اعتراف کیا کہ انہوں نے 23 دسمبر کو پی ایس پی کے دفتر پر حملہ، ایم کیو ایم کے محفل میلاد پر بم دھماکے کا منصوبہ بھی آصف پاشا اور رحمان عرف شارق نامی ملزم نے بنایا۔
کرنل فیصل کا کہنا تھاکہ ’ آپریشن کےذریعےکراچی میں امن قائم ہوا مگر ملک دشمن عناصر کو شہر کا امن قبول نہیں، ہم شہریوں اور شہر کے حق میں ہر قسم کے اقدامات کریں گے‘۔
اس موقع پر رینجرز حکام نے ملزمان اور سلیم بیلجیئم کے درمیان ہونے والی واٹس ایپ گفتگو بھی سنائی جس میں واضح طور پر احکامات دیے گئے ہیں۔
کراچی : بہادر آباد پولیس نے جرائم پیشہ عناصر کے خلاف کارروائی کرتے ہوئے 42 افراد کے قتل میں ملوث ٹارگٹ کلر کو گرفتار کرلیا۔
تفصیلات کے مطابق بہادر پولیس نے خفیہ اطلاع موصول ہونے پر کارروائی کرتے ہوئے متعدد افراد کی ٹارگٹ کلنگ میں ملوث ملزم کو حراست میں لےلیا، ملزم سرکاری ملازم ہے اور ہیلتھ ڈپارٹمنٹ میں ملازمت کرتا ہے۔
ایس ایس پی ایسٹ اظفر مہیسر نے پریس کانفرنس سے خطاب کرتے ہوئے بتایا کہ گرفتار ملزم کا تعلق ایم کیو ایم لندن سے ہے، ملزم اپنی جماعت کے کارکنوں کو قتل کرکے مقدمہ مخالف گروپوں کے خلاف درج کرواتا تھا۔
ایس ایس پی ایسٹ اظفر مہیسر نے بتایا کہ ایم کیو ایم لندن سے منسلک ملزم سنی تحریک اور پیپلز پارٹی کے کارکنان کو قتل کیا ہے۔
ایس ایس پی ایسٹ نے میڈیا کو بتایا کہ ملزم کو ٹارگٹ کلنگ کےلیے سیکڑ آفس سے احکامات ملتے تھے، ملزم سے 2 پستول اور دستی بم بھی برآمد ہوا ہے۔
خیال رہ کہ گزشتہ ماہ ایم کیو ایم لندن کے گرفتار ٹارگٹ کلر نے جیل میں ایم کیو ایم لندن کا سیٹ اپ جیل میں فعال ہونے کا اعتراف کیا تھا۔
ملزم نے اپنے بیان میں کہا کہ جیل میں متحدہ لندن کا سیٹ اپ سرگرم ہونے کی کوشش کررہا ہے، قید ملزمان سے متحدہ لندن کے رہنماؤں نے رابطے بحال کرنے کی کوشش کی ہے۔
ملزم نے حیدری میں 4 پولیس اہلکاروں کو قتل کرنے کا اعتراف کیا، زمان ٹاؤن میں بھی 2 پولیس اہلکاروں کو قتل کرنے کا جرم قبول کیا جبکہ قتل کے احکامات سابق سیکٹر انچارج رئیس مما دیتا تھا۔
کراچی : قتل سمیت دیگر متعدد سنگین وارداتوں میں ملوث متحدہ لندن کا کارکن گرفتار کرلیا گیا، ملیر پولیس نے ملزم کے قبضے اسلحہ اور منشیات برآمد کرکے مقدمات درج کرلیے۔
تفصیلات کے مطابق ملیر پولیس نے کامیاب کارروائی کرتے ہوئے غازی ٹاؤن سے متحدہ لندن کا کارکن گرفتار کرلیا، اس حوالے سے ایس ایس پی ملیر نے صحافیوں کو بتایا کہ ملزم شہباز عرف ماما نے سعید بھرم کے کہنے پر قتل کی وارداتوں کیلئے سہولت کاری کی۔
ملزم نے2013میں سنی تحریک کے کارکن کے قتل میں سہولت کاری کی، ایس ٹی کے کارکن کاشف قادری کو شاہ فیصل کالونی میں قتل کیا گیا تھا، ایس ایس پی ملیر کے مطابق کاشف قادری کو کالا دانش، کالی بلوچ، ثاقب اور ارشد نے قتل کیا۔
ملزم2010میں متحدہ لندن کیلئے مختلف علاقوں سے بھتہ وصول کرتا تھا، ملزم متحدہ لندن کے کارکن اصغر اور حامد پیا کا قریبی دوست ہے، انہوں نے بتایا کہ ملزم نے انکشاف کیا ہے کہ وارداتوں کے لئے اسلحہ پارٹی دیاکرتی تھی،۔
ملزم شہباز عرف ماما بھتہ لینے آیا تو پولیس نے گرفتارکرلیا، ملزم سے اسلحہ، آوان بم اور ایک کلو سے زائد چرس برآمد ہوئی ہے، ملزم کے خلاف منشیات، غیر قانونی اسلحہ اور د ہشت گردی کے تحت مقدمات کا اندراج کرلیا گیا ہے۔
کراچی : شہر قائد کے علاقے نیوکراچی میں پولیس نے کارروائی کے دوران ایم کیوایم لندن کے 2 ٹارگٹ کلرز گرفتار کرلیے۔
تفصیلات کے مطابق شہر قائد کے علاقے نیو کراچی میں سندھ پولیس نے چھاپہ مار کارروائی کرتے ہوئے ایم کیوایم لندن سے تعلق رکھنے والے دو ٹارگٹ کلرز آصف رضا عرف میٹھا اور کاشف علی عرف کالا کو گرفتارکرلیا۔
ایس ایس پی سینٹرل کا کہنا ہے کہ ملزمان نے 2011 اور 2012 میں قتل کیے، ملزمان چائنا کٹنگ، جلاؤ گھیراؤ، اسلحے کی ترسیل میں بھی ملوث تھے۔
ترجمان کے مطابق ملزم کاشف علی عرف کالا نے 13 افراد جبکہ ملزم آصف رضا عرف میٹھا نے 2 افراد کو قتل کیا جبکہ ملزم آصف رضاجئےسندھ کی ریلی پرفائرنگ میں ملوث ہے۔
ایس ایس پی سینٹرل عارف اسلم کا کہنا ہے کہ ملزمان 2013 ہڑتالوں میں عوامی املاک کوجلانےمیں بھی ملوث ہیں۔
ایس ایس پی عارف اسلم کے مطابق کارروائی کے دوران ملزمان سے 2 کلاشنکوف اور دستی بھی برآمد ہوئے ہیں۔
یاد رہے کہ 2 دسمبر کو کراچی کے علاقے گلشن اقبال میں ڈسکو بیکری کے قریب رینجرز نے کارروائی کرتے ہوئے ایم کیوایم لندن سے تعلق رکھنے والے ٹارگٹ کلر فاروق کو گرفتارکیا تھا۔
ترجمان رینجرز کا کہنا ہے کہ ملزم2007 میں آگرہ تاج سیکٹرکی ٹارگٹ کلنگ ٹیم کا حصہ بنا، ملزم ایم کیوایم اور لیاری گینگ وارمیں تصادم میں ملوث رہا تھا۔
ترجمان کے مطابق ملزم نے2013 میں گینگ وارکارندے یوسف گھانچی کو قتل کیا، ملزم 2013 میں قتل کی 8 دیگروارداتوں میں بھی ملوث رہا تھا۔
