کراچی: ایم کیو ایم پاکستان کے رہنما خواجہ اظہار الحسن نے کہا ہے کہ ایم کیو ایم حقیقی کے 50 سے زائد ذمے داران پارٹی میں شامل ہورہے ہیں، شامل ہونے والے تمام افراد پر کوئی مقدمہ نہیں ہے۔
ان خیالات کا اظہار انہوں نے کراچی میں پریس کانفرنس کرتے ہوئے کیا، خواجہ اظہار الحسن نے کہا کہ ایم کیو ایم پاکستان کو نقصان پہنچانے کی کوشش کی جارہی ہے، آنکھوں پر پٹیاں باندھ کر ایم کیو ایم الیکشن میں اتر رہی ہے۔
[bs-quote quote=”ووٹنگ کے دن کارکن لائنیں لگا کر ایم کیو ایم پاکستان کو ووٹ دیں گے، ایم کیو ایم کو ہرانے کا خواب دیکھنے والوں کو دل کا دورہ پڑسکتا ہے” style=”style-2″ align=”left” author_name=”خواجہ اظہار الحسن”][/bs-quote]
انہوں نے کہا کہ حقیقی کے رہنما اور کارکنان تنظیم میں شامل ہورہے ہیں دباؤ کے تحت جانے والوں کی واپسی بھی شروع ہوگئی ہے، یہ ایم کیو ایم پاکستان میں شمولیت کی پہلی قسط ہے، پارٹی میں شامل ہونے والوں اور ووٹرز کو دھمکیوں کا نوٹس لیا جائے۔
خواجہ اظہار الحسن نے کہا کہ ساتھیوں سے کہتا ہوں اپنے گھر میں واپس آجائیں، ووٹنگ کے دن کارکن لائنیں لگا کر ایم کیو ایم پاکستان کو ووٹ دیں گے، ایم کیو ایم کو ہرانے کا خواب دیکھنے والوں کو دل کا دورہ پڑسکتا ہے۔
رہنما ایم کیو ایم پاکستان کے مطابق مخالفین جتنا پروپیگنڈا کرلیں، ہمارا ایک ایک کارکن جڑا ہوا ہے، ایم کیو ایم کی صورتحال پر کوئی خوش فہمی یا غلط فہمی میں نہ رہے۔
ان کا کہنا تھا کہ کچھ لوگ ایم کیوایم میں دراڑ ڈالنے کا سوچ رہے تھے، آج بھی ہمارے خلاف پروپیگنڈے کیے جا رہے ہیں، اس سلسلے کو روکا جائے، ہم نے سب سے زیادہ قربانی دی۔
