کراچی: رکن سندھ اسمبلی اور ایم کیو ایم رابطہ کمیٹی ممبر فیصل سبزواری نے کہا ہے کہ اقربا پروری والی نہیں 1984 والی ایم کیو ایم بنائیں گے، تنظیم کو آگے لے کر جانا ہے تو پھر اصول کی بات ہوگی۔
ان خیالات کا اظہار انہوں نے ایم کیو ایم بہادر آباد گروپ کے نشترپارک جلسے سے خطاب کرتے ہوئے کیا، انہوں نے کہا کہ 5 فروری کے بعد سے آج تک ایک ایک قدم پھونک پھونک کر اٹھایا ہے۔
انہوں نے کہا کہ چند ناعاقبت اندیشوں کی وجہ سے ہم خوشی کا دن دو جگہ منارہے ہیں، افسوس ہے ہمارے کچھ ساتھی اصول اور ضابطے کو نہیں مان رہے، تنظیم کو آگے لے کر جانا ہے تو پھر اصول کی بات ہوگی۔
فیصل سبزواری نے کہا کہ آج نشتر پارک میں ہر شخص تنظیم کے نام اور پرچم تلے جمع ہوا ہے، نشترپارک میں 1984 کے کارکنان بھی موجود ہیں، سازشوں کے باوجود کارکنان پہلے کی طرح منظم بیٹھے ہیں۔
انہوں نے کہا کہ ایم کیو ایم کی روایت ہے پیسے کے بدلے نہیں کارکردگی پر عہدے دئیے جاتے ہیں، ہم گروہ بندی کرنے والوں کو تنظیم سے نکال باہر کرتے تھے۔
مخالفین نے کراچی میں ڈیرے ڈال رکھے ہیں: خواجہ اظہار الحسن
سندھ اسمبلی میں اپوزیشن لیڈر خواجہ اظہار الحسن نے کہا ہے کہ آج 2 مقامات پر یوم تاسیس منایا جارہا ہے، جب تک دونوں ایم کیو ایم کا پرچم تھامے ہیں کوئی تقسیم نہیں کرسکتا، مخالفین نے کراچی میں ڈیرے ڈال رکھے ہیں۔
انہوں نے کہا کہ سردار احمد پارٹی کا اثاثہ ہیں، ان سے گزارش ہے کہ ثالثی کا کردار ادا کرتے رہیں، مجھے بھی سید سردار احمد کی رہنمائی کی ضرورت ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
کراچی : سندھ اسمبلی میں قائد حزب اختلاف اورایم کیوایم بہادر آباد کے رہنما خواجہ اظہارالحسن ڈاکٹر فاروق ستارکو منانے کیلئے اہم پیغام لے کر پی آئی بی کالونی پہنچ گئے۔
تفصیلات کے مطابق ایم کیو ایم بہادرآباد کی جانب سے فاروق ستار کو منانے کی کوششیں تاحال جاری ہیں لیکن روٹھنے اور منانے کا یہ معاملہ اب تک کسی نتیجے پر نہیں پہنچ سکا۔
اس حوالے سے ذرائع کا کہنا ہے کہ خواجہ اظہارالحسن کی پی آئی بی کالونی میں ڈاکٹر فاروق ستار سے اہم ملاقات ہوئی ہے، ملاقات میں خواجہ اظہارالحسن نے بہادر آباد کا مصالحتی پیغام فاروق ستار کو پہنچادیا۔
خواجہ اظہار کا کہنا تھا کہ آپ یوم تاسیس سے پہلے بہادرآباد آجائیں، جواب میں فاروق ستار نے کہا کہ میری طرف سے کوئی ضد اور انا نہیں میں 18مارچ کو مشترکہ یوم تاسیس منانے کی پیشکش پہلے ہی کرچکاہوں کہ ایم کیو ایم کا یوم تاسیس مزارقائد باغ جناح میں مشترکہ طور پر منائیں۔
ان کا کہنا تھا کہ اس یوم تاسیس میں خالد مقبول صدیقی اور میں تقریرکریں، پارٹی معاملات اور رابطہ کمیٹی سے متعلق بھی خالد مقبول اور مجھے فیصلہ کرنے دیں، انہوں نے کہا کہ میں ثالثوں کی کوشش کو سراہتاہوں۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
کراچی : میئر کراچی وسیم اختر نے کہا ہے کہ یوم پاکستان اور پی ایس ایل تھری کے فائنل کو یادگار بنائیں گے، پورے شہر کو برقی قمقموں اور خوش آمدید کے بینرز سے سجا کر کھلاڑیوں کا پرتپاک استقبال کیا جائے گا، بلدیہ عظمیٰ نے انتظامات مکمل کرلئے ہیں۔
یہ بات انہوں نے کراچی میں میڈیا سے گفتگو کرتے ہوئے کہی، وسیم اختر نے کہا کہ پی ایس ایل تھری میں شرکت کیلئے آنے والے تمام کھلاڑیوں کا استقبال کرنے کیلئے شارع فیصل پر ہوٹل سے ایئرپورٹ تک خوش آمدید بینرز لگائیں گے، اس کے علاوہ برقی قمقمے، کھلاڑیوں کی تصاویر،ایل ای ڈی لائٹس بھی لگائی جائیں گی۔
میئر کراچی کا مزید کہنا تھا کہ پی ایس ایل کا فائنل کراچی میں ہونا شہریوں کیلئے بڑی خوشی کاباعث ہے، یوم پاکستان کے موقع پر کراچی میں پی ایس ایل فائنل کا انعقاد شہریوں کی خوشیوں کو دوبالا کردے گا، فائنل میچ کو یادگاربنانے کیلئے بلدیہ عظمیٰ کراچی ہرممکن اقدامات کرے گی۔
وسیم اختر نے کہا کہ شہر کی شاہراہوں کو سجانے کے انتظامات بلدیہ عظمیٰ نے مکمل کرلئے ہیں، اس حوالے سے کھلاڑیوں کے روٹس کی سڑکوں کی صفائی کا آغاز کر دیا گیا ہے، حکومتی اداروں کا ایک دوسرے سے رابطہ اور باہمی تعاون ہے۔
مزید پڑھیں: پی ایس ایل فائنل کے لیے سیکیورٹی انتظامات مکمل
علاوہ ازیں وزیراعلیٰ سندھ سید مراد علی شاہ نے فائنل کے موقع پر کے ایم سی کو شہر میں فیومی گیشن کرنے کی ہدایت بھی جاری کردی ہے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
کراچی : نون لیگ کے وفد نے گورنر سندھ کی قیادت میں ایم کیوایم پی آئی بی اور بہادرآباد گروپ سے الگ الگ ملاقات کی ہے۔ دونوں گروپ نے واضح جواب تو نہیں دیا لیکن باہمی اختلافات پھر کھل کر سامنے آگئے۔
تفصیلات کے مطابق مسلم لیگ نون اپنا چیئرمین سینیٹ لانے کے لیے سرگرم عمل ہے، اس حوالے سے گورنرسندھ محمد زبیر نے لیگی وفد کے ہمراہ ایم کیوایم بہادرآباد اور پی آئی بی مراکز کا دورہ کیا۔
ذرائع کے مطابق ایم کیوایم بہادرآباد کے دفتر میں خالد مقبول صدیقی نے لیگی وفد کو مبینہ طور پر حمایت کی یقین دہانی کرادی ہے، یقین دہانی کے ساتھ ہی میئر کراچی وسیم اختر نے گورنر سندھ کے سامنے شکایتوں کی پٹاری بھی کھول دی، انہوں نے کراچی پیکیج پر مثبت پیش رفت نہ ہونے کا شکوہ بھی کیا۔
بعد ازاں ن لیگ کا وفد پی آئی بی کالونی پہنچا تو فاروق ستار بہادرآباد والوں پر چڑھ دوڑے، فاروق ستار نے کہا کہ پتہ چلا ہے کہ بہادرآباد والے پیپلزپارٹی کے حامی ہیں، ایسا کرکے بہادرآباد والے سنگین غلطی کر رہے ہیں۔
فاروق ستار نے کہا کہ ڈپٹی اسپیکر سندھ اسمبلی شہلارضا نے گزشتہ روز کراچی کے ارکان اسمبلی کی تضحیک کی، بہادرآباد والوں کو سیاسی طور پر معاف نہیں کروں گا، کہا تو ہے کہ سینیٹ چیئرمین کیلئے ایم کیوایم کی جانب سے مشاورت سے فیصلہ ہونا چاہیے لیکن حالات کچھ اور بتارہے ہیں۔
فاروق ستار نے مزید کہا کہ چیئرمین سینیٹ کے ووٹ کیلئے فیصلہ خالد مقبول صدیقی کے ساتھ مل کر کرنا چاہتا ہوں، خالد مقبول کو مشاورت کا کہا لیکن تاحال ان کاجواب نہیں آیا۔
پی پی نے ہمیں بدترین ہارس ٹریڈنگ کا نشانہ بنایا، بہادرآباد والوں کو چاہیے کہ پہلے پی پی سے معافی منگوائیں، ہارس ٹریڈنگ پر معافی کے بغیر بہادر آباد کے ساتھیوں نے پی پی کو ووٹ دیا تو انہیں نہیں چھوڑوں گا۔
اسلام آباد: ایم کیو ایم کے باہمی اختلافات کے باعث سینئر رہنما طاہر مشہدی نے پارٹی کو خیرباد کہہ دیا، متحدہ رہنما کہتے ہیں کہ عوامی مینڈیٹ کی مزید توہین نہیں دیکھ سکتا۔
ان خیالات کا اظہار انہوں نے میڈیا سے گفتگو کرتے ہوئے کیا، طاہر مشہدی نے کہا کہ پارٹی میں شامل لوگ آج اقتدار کے لیے دست و گریبان ہیں، اقتدار کے لیے لڑنے والے دونوں گروپ لالچی ہیں۔
طاہر مشہدی نے کہا کہ ایم کیو ایم قیادت سے متوسط طبقے کی نمائندگی کی توقع نہیں ہے، ایم کیو ایم پاکستان کا کوئی مستقبل نظر نہیں آرہا، رہنماؤں کے طرز عمل نے پارٹی کو ناقابل تلافی نقصان پہنچایا۔
انہوں نے کہا کہ پی آئی بی اور بہادر آباد گروپس کی جانب سے عوامی مینڈیٹ کی توہین نہیں دیکھ سکتا، رابطہ کمیٹی کی انا، خود غرضی، ہٹ دھرمی نقصان کی وجہ ہے۔
طاہر مشہدی نے کہا کہ رابطہ کمیٹی نے عوامی اختیار، باہمی اعتماد کو ناقابل تلافی نقصان پہنچایا، ایماندار لوگ ایم کیو ایم پاکستان کی باگ ڈور سنبھالیں۔
انہوں نے کہا کہ دونوں گروپس نے جھوٹ بول کر عوامی اختیارات کا غلط استعمال کیا، رابطہ کمیٹی اراکین عوامی اختیار کو پیسہ بنانے میں ضائع کررہے ہیں۔
واضح رہے کہ ایم کیو ایم کے پی آئی بی اور بہادر آباد دھڑوں کی لڑائی کے باعث سینیٹ الیکشن میں بھی متحدہ صرف ایک نشست حاصل کرسکی تھی۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
کراچی : ایم کیو ایم پاکستان کے رہنما سینیٹر فروغ نسیم نے کہا ہے کہ فاروق ستار پر میرے کئی احسانات ہیں، مجھ پر لگائے گئے الزامات بے بنیاد ہیں، میں نے تو ان کو امریکی صدر بننے کا بھی مشورہ دیا تھا، عامر خان یا خواجہ اظہار کو نکالنے کیلئے کبھی نہیں کہا۔
یہ بات انہوں نے اے آر وائی نیوز سے خصوصی گفتگو کرتے ہوئے کہی، بیرسٹر فروغ نسیم نے فاروق ستار کے الزامات کو جھوٹ قرار دیتے ہوئے کہا کہ فاروق ستار کی بات میں وزن نہیں ہے، ان کے پاس اب کچھ ہے نہیں، جوالزامات وہ لگارہے ہیں میں نے ان کو اس کے برعکس مشورے دیئے۔
فاروق ستارنے ایک بات آپ کو نہیں بتائی، میں نے تو فاروق ستار کو امریکا کا صدر بننے کا مشورہ بھی دیا تھا، فروغ نسیم کا کہنا تھا کہ فاروق ستار نے جو پرچہ دیا وہ میری لکھائی نہیں ہے، فاروق ستار اپنی خواہش دوسرے پر ڈال رہے ہیں، اگرپرچہ اصلی ہے توان کے پاس کیسےآیا؟ پروگرام کے دوران فروغ نسیم نے ایک پرچے پر اپنی ہاتھ کی تحریر لکھ کر بھی دکھائی۔
انہوں نے کہا کہ فاروق ستار گزشتہ11سال سے میرے دفتر آرہے ہیں، وکیل اور ڈاکٹر اپنے کلائنٹ کے نوٹس لکھتا ہے ، اب ان ہی سے ان سے پوچھا جائے ان کے پاس میرے نوٹس کیسے آئے؟ وہ نوٹس کہیں فاروق ستار چوری چھپے اٹھا کرتو نہیں لےگئے؟
انہوں نے کہا کہ خواجہ اظہار چھوٹے بھائیوں کی طرح ہیں،ان کو ہٹانےکی بات کیسے کروں گا، عامرخان اور خواجہ اظہار کو پارٹی سے نکال کر کامران ٹیسوری کو چیمپئن بنانے سے مجھے کیا فائدہ ہوگا؟ فاروق ستارکو چھوڑ کرجو بھی لوگ مجھے جانتے ہیں ان سے میرا کردار کے بارے میں پوچھ لیں۔
فروغ نسیم کا مزید کہنا تھا کہ فاروق ستار اور کامران ٹیسوری کو کہا تھا کہ میں نسینیٹ کا امیدوارنہیں ہوں لیکن ان دونوں نے ضد کی کہ فروغ نسیم ہی سینیٹ کے امیدوارہوں گے، بہادر آباد والوں نے بحالت مجبوری کہا تھا کہ فروغ نسیم اور کامران ٹیسوری کو ڈراپ کردیں، لیکن فاروق ستار نہیں مانے۔
ایک سوال کے جواب میں سینیٹر فروغ نسیم نے کہا کہ فاروق ستار پر میرے کئی احسانات ہیں، اےٹی سی کے40کیسز اور فاروق ستارسمیت 3لوگوں کو سپریم کورٹ میں معافی میں نے دلوائی تھی، حضرت علیؓ کا یہ قول کبھی غلط نہیں ہوسکتا کہ جس پراحسان کرو اس کےشر سے ڈرو۔
پارٹی آئین میں ترمیم سے متعلق ان کا کہنا تھا کہ فاروق ستار مجھ سے مسلسل یہ شکایت کررہے تھے کہ عامرخان پارٹی نہیں چلانے دے رہے، وہ آئین میں ترمیم کے لئے میرے پاس آئے، میں نے فاروق ستارکے کہنے پر پارٹی آئین کے3سے4ڈرافٹ تیار کیے۔
بعد ازاں رابطہ کمیٹی کے شور مچانے پر فاروق ستار نے آئین میں تبدیلی کا ملبہ مجھ پر ڈالنے کی کوشش کی، جس پر میں نے رابطہ کمیٹی کو وضاحت دی کہ ڈرافٹ فاروق ستار کے کہنے پر بنائے، رابطہ کمیٹی کو یقین دلایا کہ ڈرافٹ ان کے سامنے رکھوں گا، فاروق ستار کو ویٹو پاور ملنے سے میرا کیا فائدہ ہے؟
فروغ نسیم کا مزید کہنا تھا کہ ایم کیوایم صرف وہ ہے جو بہادرآباد میں ہے،اس پر فاروق ستار ایسا ردعمل دے رہے ہیں، اس تحریرکا مجھ سے کوئی تعلق نہیں، فاروق ستار معاملے کو طول دے رہے ہیں، ایک مشترکہ دوست نے فون کیا اور کہا کہ یہ لکھائی فاروق ستار کے ایک کوآرڈینیٹرکی ہے۔
فروغ نسیم نے میرے سامنے فاروق ستار کو مشورے دیئے، کامران ٹیسوری کا دعویٰ
دوسری جانب پروگرام کے دوران ایم کیو ایم کے رہنما کامران ٹیسوری نے رابطہ کرکے انکشاف کیا کہ میں حلفیہ کہہ سکتا ہوں فروغ نسیم نے ہی فاروق ستار کو مشورے دیئے تھے، یہ تمام مشورے میرے سامنے دیئے گئے اس کا چشم دید گواہ ہوں۔
کراچی : ایم کیو ایم پاکستان کے رہنما فیصل سبزواری اور خواجہ اظہارالحسن نے کہا ہے کہ ہم ایم کیوایم کے ووٹرزاور کارکنان سے شرمندہ ہیں، سینیٹ الیکشن میں ووٹ نہ دینے والے اراکین کو اظہار وجوہ کا نوٹس دیں گے، ایم کیوایم کسی صورت نہیں بکے گی۔
ان خیالات کا اظہار انہوں نے ایم کیو ایم پاکستان کے عارضی مرکز بہادرآباد کراچی میں پریس کانفرنس سے خطاب کرتے ہوئے کیا۔
فیصل سبزواری نے کہا کہ جن ساتھیوں نے سینیٹ الیکشن میں اپنے امیدوار کو ووٹ نہیں دیا انہیں اظہار وجوہ کا نوٹس جاری کیا جائے گا،2013میں ہم نے دیگرجماعتوں کے تعاون سے مخصوص نشستیں لی تھیں، جو وقت دیگر جماعتوں کو قائل کرنے میں لگانا تھا وہ آپس کے تنازع میں گزرگیا۔
جو کارکنان اور عوام سمجھ رہے ہیں کہ ایم کیوایم برائے فروخت ہے ایسا ہرگز نہیں ہے، موجودہ صورتحال میں ہم ایم کیوایم کے ووٹرزاور کارکنان سے بے حد شرمندہ ہیں۔
فیصل سبزواری کا مزید کہنا تھا کہ ایم کیوایم کے 51 میں سے 4 ارکان اسمبلی ملک میں نہیں ہیں، 9 ارکان نے دیگر جماعتوں میں شمولیت اختیار کرلی۔
جمہوریت کے دعویداروں نے اسمبلی میں جمہوریت کو پامال کیا، پیسوں کی بوریاں کھول کرارکان کو خریدنے کی کوشش کی گئی، پیپلز پارٹی کارویہ جمہوریت کش ہے لیکن ایم کیوایم برائے فروخت نہیں ہے۔
ایک سوال کے جواب میں ان کا کہنا تھا کہ تقسیم سے ہم کمزوراورسیاسی مخالفین مضبوط ہونگے، بہادر آباد اور پی آئی بی والےسب مل کر تنظیم کو دوبارہ فعال کرینگے، سیاسی اور تنظیمی نقصان کےازالے کیلئے مل کر کام کریں گے، مخالفین نے کمزور فصیل دیکھ کر پارٹی میں نقب لگانے کی کوشش کی۔
اس موقع پر سندھ اسمبلی میں قائد حزب اختلاف خواجہ اظہارالحسن نے کہا کہ متوسط طبقہ ہی پیسے سے ٹکرانے کی جرات رکھتا ہے، اختلافات کو وجہ بنا کرارکان نے مخالفین کو ووٹ دیئے، ان لوگوں کو ووٹ دیا گیا جنہوں نے ایم کیوایم کو کچلنےکیلئے ریاستی طاقت استعمال کی۔
خواجہ اظہار نے مزید کہا کہ جن اراکین کو دونوں امیدوار پسند نہیں تھے تو وہ گھربیٹھ جاتے، جنہوں نے جواز بنا کر دوسروں کو ووٹ دیا اب وہ جانیں اور عوام کی عدالت جانے۔
ایک سوال کے جواب میں خواجہ اظہار نے کہا کہ میں یہ نہیں کہہ سکتا کہ مخالفین کو ووٹ دینے والے نہیں بکے، چاروں صوبوں میں سینیٹ الیکشن کیلئے ایم پی اے بکے ہیں، ہارس ٹریڈنگ کارونا رونے والی پیپلز پارٹی نے سندھ میں کیا کیا؟
خواجہ اظہارالحسن کا کہنا تھا کہ سینیٹ الیکشن دھاندلی زدہ اورہارس ٹریڈنگ سے بھرپور ہیں، پی پی کو ہماری یہ تعداد بھی ناکوں چنے چبوائے گی، ایم کیوایم کے اصل مالک رابطہ کمیٹی یا ارکان اسمبلی کا نہیں بلکہ کارکنان ہیں۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
کراچی : ایم کیو ایم کے رہنما ڈاکٹر فاروق ستار نے کہا ہے کہ سینیٹ الیکشن میں کارکنوں کوجو توقع تھی وہ نتائج نہ دے سکے، چودہ ارکان اسمبلی نے اپنے ضمیر کا سودا کیا، ایک سیٹ کی فتح کاجشن مناناافسوس کی بات اور بے حسی ہے۔
ان خیالات کا اظہار انہوں نے پی آئی بی کالونی میں پریس کانفرنس سے خطاب کرتے ہوئے کیا، انہوں نے کہا کہ پانچ خواتین رکن اسمبلی اور سلیم بندھانی نے صبح ہی کہیں اور ووٹ بھگتا دیا تھا، کامران ٹیسوری کو ووٹ دینے والوں نے بھی دھوکا دیا۔
تین ارکان نے ووٹ مسترد کرایا اور پانچ نے بھی کسی اور کو ووٹ ڈال دیا۔ 6ایم پی ایزکا ہمیں پتہ ہے، باقی کیلئے بہادرآباد والےساتھ دیں، جن کے بارےمیں پتہ ہے ان کےخلاف تادیبی کارروائی کا آغاز کریں، سلیم بندھانی اور5بہنوں کےخلاف کارروائی کاآغازکیاجائے۔
انہوں نے کاہ کہ کس نے کتنے پیسے دیئےاور کس نے لئے، اس کی بھی تحقیقات ہونی چاہیے، پروپیگنڈے میں پارٹی سربراہ، تنظیمی بحران کو مورد الزام ٹھہرایا جارہا ہے، ایم کیوایم کے12اراکین کی وفاداری تبدیل کرائی گئی، پہلی بارسندھ کو بلوچستان کی طرح ہارس ٹریڈنگ کا حب بنایا گیا۔
فاروق ستار نے سوال کیا کہ جن جماعتوں کا مینڈیٹ چھینا گیا کیا وہ خاموش رہیں گی؟ کیا سینیٹ الیکشن کےایسے نتائج کومان لیاجائے؟ دھاندلی زدہ الیکشن کوکالعدم قراردینے کیلئےالیکشن کمیشن کردار ادا نہیں کریگا؟ کیا ارباب اختیار اور الیکشن کمیشن کوئی ایکشن نہیں لیں گے؟ کیا چیف جسٹس بھی وفاداری تبدیل کرانےکا نوٹس نہیں لیں گے؟
بہادر آباد والوں سے متعلق گفتگو کرتے ہوئے انہوں نے کہا کہ بہادرآباد والوں نےایک سیٹ کی کامیابی پرجشن منایا، جشن منانا افسوس کی بات ہے، یہ بےحسی ہے، شرم، رونے اور مرنےکا مقام ہے۔
کیا یہ میری کوتاہی ہے کہ ہمارےایم پی ایز پرندوں کی طرح پھڑپھڑاتے ہوئے اڑگئے، خریدنے والا منہ بولے دام اور بکنےوالا دھڑلے سےخود کو بیچ رہاہے، وفاداری تبدیل کرنے یاخود کو بیچنےکی ایسی تعلیم دی جارہی ہے۔
فاروق ستار نے کہا کہ بکنےوالوں کے گھروں کے شہداء کا الزام راؤانوار جیسےافسران پر ہے، ایسا غصہ نکالا گیا کہ مہاجروں کے شہداء کا ہی سودا کرلیا گیا، خود کو ہر قسم کے احتساب کیلئے کارکنوں کی عدالت میں پیش کرونگا۔
فاروق ستار نے کہا کہ بانی کےپاس22اگست سے پہلے کیاطریقہ تھا کوئی بکنے کاسوچتا بھی نہیں تھا، بہادر آباد والے ساتھی اتفاق کریں تو کیا وہی پالیسی یا طریقہ اختیارکریں؟
کراچی : فیصل واوڈا کی ایم کیوایم کے حوالے سے پیش گوئی درست نکلی، ایک ماہ قبل ان کا کہنا تھا کہ فاروق ستار نے سینیٹ کی ساری نشستیں بیچ دی ہیں، تاہم فروغ نسیم جیت سکتے ہیں۔
تفصیلات کے مطابق تحریک انصاف کے رہنما فیصل واوڈا کی ایم کیوایم پاکستان کے حوالے سے ایک ماہ قبل کی گئی پیش گوئی حرف بہ حرف درست ثابت ہوئی.
اے آر وائی نیوز سے گفتگو کرتے ہوئے فیصل واوڈا نے کہا تھا کہ ایم کیوایم نے اپنی ساری نشستیں فروخت کردیں ہیں، اگر ایم کیوایم کی طرف سے کوئی جیتا بھی تو وہ فروغ نسیم ہوں گے، رہنما پی ٹی آئی نے یہ پیش گوئی9جنوری کو کی تھی۔
واضح رہے کہ نو فروری کو فیصل واوڈا نے فاروق ستار پر سنگین الزامات عائد کرتے ہوئے اپنے دعوے میں کہا تھا کہ ایم کیو ایم سربراہ ڈاکٹر فاروق ستار نے سینیٹ کی چار نشستیں فروخت کردی ہیں اورعامر خان کو اس ڈیل کا پتہ چل گیا تھا۔
ان کا مزید کہنا تھا کہ ایم کیو ایم پاکستان میں ہونے والا اختلاف سب محض ڈرامہ اور تماشہ ہے، سربراہ ایم کیو ایم نے سینیٹ کی سیٹوں کا جو سودا کیا ہے اس کا خریدار کوئی اورنہیں پیپلزپارٹی ہے، ایم کیوایم کی چار سیٹیں کوڑیوں کے دام پیپلزپارٹی کو ہی ملیں گی۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
کراچی : متحدہ قومی موومنٹ پاکستان کے رہنما فیصل سبزواری نے کہا ہے کہ متحدہ کی5 خواتین ارکان نے فروغ نسیم کو ووٹ نہیں دیا، اپوزیشن جماعتوں نے بھی زبان دینے کے باوجود ایم کیو ایم کے امیدوار کو ووٹ نہیں دیئے۔
یہ بات انہوں نے سینیٹ انتخابات کے غیر سرکاری نتائج کے اعلان کے بعد کراچی میں میڈیا سے گفتگو کرتے ہوئے کہی۔
انہوں نے کہا کہ 20 ارکان اسمبلی نے کامران ٹیسوری اور 18نےفروغ نسیم کو ووٹ ڈالنے تھے، ایم کیوایم کی5خواتین ارکان نے فروغ نسیم کو ووٹ نہ دینے کا فیصلہ کیا، قوی امکان ہے کہ پانچوں ارکان نے پیپلز پارٹی کو ووٹ دیئے۔
اس طرح فروغ نسیم کو ووٹ دینے والوں کی تعداد13رہ گئی تھی، فیصل سبزواری نے کہا کہ بیرسٹر فروغ نسیم کیلئے ن لیگ، فنکشنل لیگ کے دوستوں سے درخواست کی تھی لیکن زبان دینے کے باوجود انہوں نے ایم کیو ایم کے امیدوار کو ووٹ نہیں دیئے۔
رہنما ایم کیو ایم پاکستان نے مزید کہا کہ کامران ٹیسوری کو ووٹ دینے والے ایم پی ایز کی تعداد 20 تھی، ان کی فہرست کے ایک ساتھی نے پیپلزپارٹی کو ووٹ دیا، فیصل سبزواری نے کہا کہ ہماری دعا ہے کہ صورتحال جلد بہتر ہو، تنظیم متحد اور مضبوط رہے گی۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
