کراچی : متحدہ قومی موومنٹ (ایم کیو ایم) کے تمام دھڑوں کو ملا کر ایک کرنے کے کیلئے مشن پر کام تیزی سے جاری ہے اس سلسلے میں گورنر ہاؤس میں بڑی بیٹھک کا اہتمام کیا جارہا ہے۔
اس حوالے سے ذرائع کا کہنا ہے کہ اس کام کی تکمیل کیلئے گورنر سندھ کامران ٹیسوری مرکزی کردار ادا کررہے ہیں، گورنر ہاؤس میں خصوصی ملاقاتوں کا سلسلہ بھی جاری ہے۔
ذرائع کے مطابق ایم کیو ایم پاکستان کی رابطہ کمیٹی کے اراکین اورمتحدہ کے کنوینئیر ڈاکٹر خالد مقبول صدیقی کی سر براہی میں ایک وفد گورنر ہاؤس پہنچ گیا۔
ذرائع کا مزید کہنا ہے کہ گورنر سندھ کامران ٹیسوری سے ایم کیو ایم رابطہ کمیٹی کی اہم ملاقات شروع ہوگئی، ملاقات کنونئیر ایم کیو ایم ڈاکٹر خالد مقبول کی صدارت میں جاری ہے، ملاقات میں رابطہ کمیٹی کے 35 سے زائد اراکین موجود ہیں۔
ذرائع کے مطابق ملاقات میں ملکی سیاسی صورتحال اور بلدیاتی الیکشن سمیت ایم کیو ایم پی پی معاہدے پر عمل درآمد کے حوالے سے گفتگو کی گئی۔
ملاقات میں ایم کیو ایم ک ےدھڑوں پی ایس پی اور فاروق ستار کو ملانے کے حوالے سے بھی معاملہ زیر غور آیا، گورنر سندھ نے پی ایس پی رہنماؤں اور فاروق ستار سے ہونے والی ملاقات کے حوالے سے بھی خالد مقبول اور رابطہ کمیٹی کو آگاہ کیا۔
ایم کیو ایم پاکستان نے گورنر سندھ کو ایک بار پھر حلقہ بندیوں، بلدیاتی ترمیم ایکٹ اور سپریم کورٹ کے 140 اے کے فیصلے پر عمل درآمد کے حوالے سے وزیراعظم اور پیپلز پارٹی سے بات کرنے کا مطالبہ کیا۔
قبل ازیں گورنرسندھ کامران ٹیسوری نے کہا ہے کہ ہمیں عہد کرنا ہوگا کہ ہمیں ایک دوسرے کا ہاتھ اور سہارا بننا ہے ہمیں اس تقسیم کو ختم کرنا ہوگا،اس ملک اور صوبے کو ہم ہی آگے لے جاسکتے ہیں۔
انہوں نے کہا کہ کراچی میں سمندر ہے لیکن شہریوں کے لیے پینے کا پانی نہیں، یہ شہر پورے ملک کی معیشت چلاتا ہے لیکن خود پانی، بجلی اور گیس سے محروم ہے۔
گورنرسندھ کا کہنا تھا کہ کون ہے جو آگے بڑھ کر ان 3 کروڑ لوگوں کا ہاتھ تھامے گا۔ کراچی میں اسٹریٹ کرائم اور بےروزگاری بڑھ رہی ہے، جب روزگار، بجلی ،پانی نہ ہو تو لوگ سڑکوں پر نہ آئیں تو اورکیا کریں۔
کامران ٹیسوری نے کہا کہ تباہ کن سیلاب کے بعد صوبہ سندھ تباہ حالی کا شکار ہوگیا ہے، وسائل نہیں ہیں عوام مزید غریب ہوتے جارہے ہیں۔
انہوں نے کہا کہ میں آج اعلان کرتا ہوں کہ گورنر ہاؤس میں ایک سیل بنائیں گے، جو اس شہر کا درد رکھتے ہیں وہ آگے آئیں اور اس شہر کو اپنائیں، ہمیں لاکھوں قربانیوں کے بعد یہ ملک ملا ہے، مایوسی کو ختم کرکے آگے بڑھیں، اس ملک اور صوبے کو ہم ہی آگے لے کر جاسکتے ہیں۔
