اسلام آباد: متحدہ قومی موومنٹ(پاکستان) کا وفد آج وزیر اعظم عمران خان سے اسلام آباد میں ملاقات کرے گا، کراچی سمیت اہم موضوعات پر تبادلہ خیال کیا جائے گا۔
تفصیلات کے مطابق ایم کیو ایم کا وفد عمران خان سے ملنے اسلام آباد آئے گا، ملاقات دو پہر میں ہوگی جبکہ ڈاکٹر خالد مقبول صدیقی ایم کیو ایم کی قیادت کریں گے۔
ذرائع کا کہنا ہے کہ ڈاکٹر خالد مقبول صدیقی وفد کی قیادت کریں گے جبکہ ایم کیو ایم وفد میں وسیم اختر، نسرین جلیل، امین الحق اور دیگر اہم رہنما شامل ہوں گے۔
ذرائع کے مطابق عمران خان سے ملاقات میں سیاسی صورت حال، کراچی پیکیج، صدارتی الیکشن اور دیگر امور پر گفتگو ہوگی۔
ذرائع کا یہ بھی کہنا تھا کہ ایم کیو ایم اور پی ٹی آئی میں ورکنگ ریلیشن شپ پر بھی مشاورت ہوگی، جبکہ تحریری معاہدے پر عملدر آمد اور بلدیاتی اختیارات پر بات چیت بھی متوقع ہے۔
ایم کیو ایم نے پی ٹی آئی کے ساتھ چلنے کے وعدے پر کئی شرائط رکھ دیے
وزیر اعظم سے ملاقات کے دوران کراچی میں وفاق کے ترقیاتی منصوبوں کی جلد تکمیل پر بھی تبادلہ خیال کیا جائے گا۔
خیال رہے کہ رواں ماہ کے آغاز میں متحدہ قومی موومنٹ(پاکستان) نے تحریک انصاف کے ساتھ چلنے کے وعدے پر کئی شرائط رکھے تھے، ایم کیو ایم نے کراچی کے بارہ حلقے کھولنے کا مطالبہ بھی کیا تھا۔
واضح رہے کہ ایم کیو ایم نے کارکنوں کی بازیابی، ٹارگٹڈآپریشن بند کرنے پر زور، کراچی کے بارہ حلقے کھولنے جبکہ حیدرآباد میں یونیورسٹی کے قیام اور کوٹہ سسٹم کے خاتمے کے مطالبے پر زور دیا تھا۔
