اسلام آباد: وفاقی دارالحکومت اسلام آباد کی 24 لاکھ آبادی مفت ایم آر آئی ٹیسٹ کی سہولت سے محروم ہو گئی ہے، ذرائع نے انکشاف کیا ہے کہ شہر کے کسی سرکاری اسپتال میں ایم آر آئی کی سہولت دستیاب نہیں ہے۔
تفصیلات کے مطابق وفاقی دارالحکومت اسلام آباد، بلوچستان کا کوئی دورہ افتادہ قصبہ بنا نظر آنے لگا ہے، شہر کے کسی سرکاری اسپتال میں ایم آر آئی کی سہولت دستیاب نہیں، اسلام آباد کے چاروں سرکاری اسپتال ایم آر آئی کی سہولت سے محروم ہیں۔
ذرائع وزارت صحت کا کہنا ہے کہ اسلام آباد کے پمز، این آئی آر ایم اسپتال میں ایم آر آئی موجود تھی، تاہم پمز اسپتال کی مشین 2021 سے خراب پڑی ہوئی ہے، پمز انتظامیہ نے ستمبر 2020 میں ایم آر آئی مشین خریداری کے لیے آرڈر دیا تھا، پمز ذرائع کے مطابق ایل سی اپریل 2021 میں کھولی گئی، تاہم کرونا وبا کے باعث کمپنی نے ایم آر آئی ڈلیوری میں تاخیر کی۔
دوسری طرف این آئی آر ایم کی ایم آر آئی 3 ماہ قبل خراب ہوئی ہے، قومی ادارہ بحالی معذوراں میں ایم آر آئی 1996 میں نصب ہوئی تھی، جو اب اپنی عمر پوری کر چکی ہے، ذرائع کا کہنا ہے کہ اس ادارے کے لیے ایم آر آئی مشین خریدی جا رہی ہے، اور متعلقہ فرم کو سپلائی آرڈر بھی جاری کر دیا گیا ہے۔
ادھر پولی کلینک اسپتال کے لیے بھی ایم آر آئی میشن کی خریداری کا عمل جاری ہے، اسے جاپانی امداد سے خریدا جا رہا ہے۔
