ARYNews.tv | Urdu – Har Lamha Bakhabar

Tag: MS MARVEL

  • پاکستان لڑکی سپر ہیرو بننے میں کس طرح کامیاب ہوئی؟

    پاکستان لڑکی سپر ہیرو بننے میں کس طرح کامیاب ہوئی؟

    ہالی ووڈ کی تاریخ میں پہلی مسلمان اور پہلی پاکستانی نژاد خاتون سپر ہیرو کردار کمالہ خان پر بنائی گئی ویب سیریز مس مارول 8 جون کو دنیا بھر میں ڈزنی پلس پر ریلیز ہو رہی ہے جس کا چرچا دنیا بھر میں جاری ہے۔

    مذکورہ ویب سیریز کا مرکزی کردار کمالہ خان کا ہے جو کہ پاکستانی نژاد امریکی ریاست نیو جرسی کی منفرد صلاحیتوں کی مالک لڑکی ہوتی ہیں، جس طرح ویب سیریز کا مرکزی کردار پاکستانی ہے، اسی طرح اس کردار کو تخلیق کرنے والی خاتون ثنا امانت بھی پاکستانی نژاد ہیں۔

    ثنا امانت نے کمالہ خان کے کردار کو پہلی بار مارول کے کامک بکس میں سنہ 2013 میں متعارف کروایا تھا اور اب اس پر پہلی ویب سیریز بنائی گئی ہے۔

    کمالہ خان کے کردار کو ادا کرنے والی 19 سالہ لڑکی ایمان ولانی بھی پاکستانی نژاد ہیں جو صوبہ سندھ کے دارالحکومت کراچی میں پیدا ہونے کے بعد کینیڈا منتقل ہوگئی تھیں۔

    علاوہ ازیں مس مارول کے چار ہدایت کاروں میں سے ایک ہدایت کار شرمین عبید چنائے بھی پاکستانی ہیں جب کہ ویب سیریز کے دیگر اداکار بھی پاکستان سے لیے گئے ہیں۔

    مس مارول ویب سیریز کا حصہ بننے والے دیگر پاکستانی اداکاروں میں ثنا بچہ خان، مہوش حیات، فواد خان اور ثمینہ احمد بھی شامل ہیں۔

    مس مارول ویب سیریز کا حصہ بننے والی باقی تمام شخصیات پہلے ہی شوبز کا حصہ تھیں مگر ایمان ولانی پہلی بار اسکرین ڈیبیو کرنے جا رہی ہیں۔

    ایمان ولانی نے برطانوی اخبار دی گارجین کو بتایا کہ ان کی پیدائش کراچی میں ہوئی مگر پیدائش کے فوری بعد وہ والدین کے ہمراہ کینیڈا منتقل ہوگئیں اور وہ بچپن سے ہی کامک کرداروں کی دلدادہ تھیں۔

    ان کے مطابق وہ والدہ کی جانب سے ملنے والے خرچ کے 20 ڈالرز کو کامک کتابوں اور مکڈونلڈ کے کھانوں میں خرچ کرتی رہی ہیں مگر انہوں نے کبھی کامک کردار ادا کرنے یا اداکاری سے متعلق نہیں سوچا تھا۔

    ہائی اسکول کی تعلیم مکمل کرنے والی ایمان ولانی کے مطابق انہیں 2020 میں اپنی رشتے دار خاتون نے ایک واٹس ایپ میسیج بھیجا، جس میں مس مارول کے کردار کے آڈیشن کا ذکر تھا، جسے انہوں نے نظر انداز کردیا تھا۔

    ان کے مطابق بعد ازاں ان کی خاتون رشتے دار نے انہیں مکمل تفصیلات ای میل پر بھیجیں، جس کے بعد انہوں نے آڈیشن دینے کا سوچا اور 2020 کے آغاز میں ان کا ورچوئل آڈیشن ہوا۔

    ایمان ولانی نے بتایا کہ ہائی اسکول کے آخری دن انہیں معلوم ہوا کہ انہیں کمالہ خان کے کردار کے لیے منتخب کرلیا گیا ہے اور وہ دن ان کی زندگی کا سب سے اہم دن تھا۔

    مس مارول ویب سیریز کو پاکستان میں رواں ماہ کے اختتام پر سینما گھروں میں پیش کیا جائے گا، کیوں کہ یہاں ڈزنی پلس ویب سائٹ کی سروس دستیاب نہیں۔

  • ویب سیریز ’مس مارول‘ میں کوک اسٹوڈیو کا مشہور گانا شامل

    ویب سیریز ’مس مارول‘ میں کوک اسٹوڈیو کا مشہور گانا شامل

    مارول سنیمیٹک اسٹوڈیوز اور ڈزنی پلس کی اگلی ویب سیریز ‘مس مارول’ کے حوالے سے دل چسپ تفصیلات سامنے آ رہی ہیں، اس سیریز کا شدت سے انتظار کرنے والے شائقین کو حیرت بھری خوشی ہوگی یہ جان کر کے اس میں کوک اسٹوڈیو کا ایک مشہور گانا بھی شامل کیا گیا ہے۔

    یہ پاکستانی سپر ہیرو لڑکی پر بنائی جانے والی پہلی ویب سیریز ہے، اس میں پہلی پاکستانی نژاد امریکی سپر ہیرو کمالہ خان کو متعارف کرایا گیا ہے، یہ کردار پاکستانی نژاد امریکی اداکارہ ایمان ویلانی نے ادا کیا ہے، اور اب اس میں کوک اسٹوڈیو کا گانا ‘پیچھے ہٹ’ شامل کیے جانے کی اطلاعات ہیں۔

    برطانوی نشریاتی ادارے کے صحافی ہارون رشید نے اپنے ایک ٹوئٹ میں انکشاف کیا ہے کہ مس مارول میں نہ صرف پاکستانی گانا شامل ہے بلکہ اس میں بالی ووڈ فلموں کے ڈائیلاگز بھی شامل ہیں، اور سپر ہیرو لڑکی کمالہ بالی ووڈ کنگ شاہ رخ خان کی زبردست فین ہے۔

    انٹرٹینمنٹ رپورٹر نے لکھا کہ مس مارول کی دو قسطیں انھوں نے دیکھ لیں اور انھیں ویب سیریز میں جنوبی ایشیائی تڑکا دیکھ کر مزہ آ گیا۔

    واضح رہے کہ مس مارول کو امریکا سمیت دنیا بھر میں آئندہ ماہ 8 جون کو ڈزنی پلس پر ریلیز کیا جائے گا۔ ‘پیچھے ہٹ’ گانا رواں برس ریلیز ہونے والے کوک اسٹوڈیو کے سیزن میں شامل کیا گیا تھا، جسے نوجوان گلوکار حسن رحیم، طلعت قریشی اور جسٹن بیبز نے گایا۔

  • پہلی مسلمان سپر ہیرو مس مارول کا ٹریلر جاری، مداح خوشی سے دیوانے

    پہلی مسلمان سپر ہیرو مس مارول کا ٹریلر جاری، مداح خوشی سے دیوانے

    سائنس فکشن اور سپر ہیرو فلمیں اور ویب سیریز بنانے والے امریکی ہولی وڈ اسٹوڈیو مارول نے ڈزنی کے اشتراک کے ساتھ آنے والی مختصر ویب سیریز مس مارول کا ٹریلر جاری کردیا جس نے مداحوں کو دیوانہ کردیا۔

    مس مارول ویب سیریز کی مرکزی کہانی کمالہ خان نامی سپر ہیرو لڑکی کے گرد گھومتی ہے جو کہ دراصل ایک پاکستانی نژاد لڑکی ہے۔

    یہ پہلا موقع ہے کہ کسی بھی ویب سیریز کی کہانی نہ صرف پاکستانی بلکہ مسلم لڑکی کے گرد گھومے گی۔

    ٹریلر میں دکھایا گیا ہے کہ کس طرح سپر ہیروز سے متاثر نوعمر مسلمان لڑکی انہی کے جیسا بننے کی خواہش رکھتی ہے، لیکن ایک موقع پر وہ مایوسی سے کہتی ہے، ایسا نہیں ہوسکتا کہ نیو جرسی کی براؤن لڑکیاں دنیا کو بچانے لگیں۔

    لیکن جلد ہی اسے غیر معمولی طاقتیں حاصل ہوجاتی ہیں جس کے بعد وہ سپر ہیرو بن جاتی ہے۔

    فلم میں پاکستانی اداکارہ نمرہ بچہ کی جھلک بھی موجود ہے جن کے کردار کا نام نجمہ ہے، علاوہ ازیں کئی مسلمان کردار دکھائے گئے ہیں جبکہ نماز ادا کیے جانے کے مناظر بھی فلم میں شامل ہیں۔

    کمالہ خان کا کردار 16 سالہ ایمان ولانی ادا کر رہی ہیں، وہ اس سے قبل بھی امریکی ڈراموں میں کام کرچکی ہیں۔

    ٹریلر کے مطابق سیریز کو رواں برس جون میں پیش کردیا جائے گا۔

  • فواد خان کی مس مارول کا حصہ بننے کی تصدیق

    فواد خان کی مس مارول کا حصہ بننے کی تصدیق

    معروف پاکستانی اداکار فواد خان نے امریکی ویب سیریز مس مارول کا حصہ ہونے کی تصدیق کرتے ہوئے کہا کہ اس سیریز کی شوٹنگ ان کے لیے ایک زبردست تجربہ تھا۔

    تفصیلات کے مطابق فواد خان نے بھارتی میڈیا کو انٹرویو دیتے ہوئے تصدیق کی کہ وہ سیریز مس مارول کا حصہ ہیں۔

    انہوں نے کہا کہ وہ اس بات سے انکار نہیں کر سکتے، اور اب تو وہ جھوٹ بھی نہیں بول سکتے کیونکہ پروڈکشن ٹیم نے خود ہی یہ خبر پھیلا دی ہے۔

    فواد خان کا کہنا تھا کہ انہوں نے جس کاسٹ کے ساتھ اور جن لوگوں کے ساتھ کام کیا، وہ بہت اچھے تھے لیکن انہیں افسوس ہے کہ اس وقت وہ اس سے زیادہ کچھ نہیں کہہ سکتے۔

    یاد رہے کہ پچھلے کچھ عرصے سے فواد خان کے بارے میں یہ خبریں گردش کررہی تھیں کہ انہیں امریکی ویب سیریز مس مارول کی کاسٹ میں شامل کیا گیا ہے۔

    ڈزنی پلس کی یہ سیریز مس مارول، مارول اسٹوڈیوز کے پہلے مسلمان کردار کے بارے میں ہے۔

  • سپرہیرو فلمز: مارول کا پاکستانی نژاد کامک کردار ’کمالہ خان‘ پر فلم بنانے کا فیصلہ

    سپرہیرو فلمز: مارول کا پاکستانی نژاد کامک کردار ’کمالہ خان‘ پر فلم بنانے کا فیصلہ

    کیلی فورنیا: سپرہیرو ایکشن فلموں میں پہلی بار پاکستانی لڑکی سپر ہیرو کے روپ میں جلوہ گر ہوگی، مارول اسٹوڈیوز نے اس پر فلم بنانے کی تیاری کرلی۔

    تفصیلات کے مطابق مارول فلمز نے اپنی سپر ہیرو سیریز میں ایک مسلم سپر ہیرو کو شامل کرنے کا حتمی فیصلہ کرلیا ہے جسے مس مارول کا نام دیا گیا ہے۔

    مس مارویل کے کردار کو کمالہ خان کے روپ میں ڈھالا جائے گا جو خود بھی روپ بدلنے کی صلاحیت رکھتی ہے۔ کمالہ خان سپر ہیروز میں شامل ہونے والا ایک اور فرضی کردار ہے۔

    اوینجرز سیریز کی نئی فلم انفنٹی وار کے فلم ساز کیون فیج کا کہنا ہے کہ کمالہ خان کے کردار پر کام جاری ہے، یہ کامک کردار ہے اور کیپٹن مارول سے متاثر ہے۔

    یہ بھی پڑھیں:  کمالہ خان: مارول کامکس کی پاکستانی سپر ہیرو

    واضح رہے کہ کمالہ پاکستانی نژاد امریکی لڑکی کے طور پر مارول سیریز کی کہانیوں میں پہلے ہی سے شامل ہے۔ اب مارول سینی میٹک یونیورس میں پاکستانی لڑکی بھی سپر ہیروز کے ساتھ جلوہ گر ہوگی۔

    یہ بھی پڑھیں:  کینز کے ریڈ کارپٹ پر ماہرہ خان کے جلوے

    اینی میٹیڈ کریکٹر کمالہ خان کی آواز کے لیے ماہرہ خان یا پریانکا چوپڑا کو لینے پر غور کیا جارہا ہے، تاہم اس سلسلے میں کوئی حتمی فیصلہ نہیں کیا گیا ہے۔

    مداحوں کی طرف سے پریانکا کو مذکورہ کردار کے لیے موزوں سمجھا رہا ہے تاہم وہ پاکستانی نہیں بلکہ ہندوستانی اداکارہ ہے جب کہ کمالہ ٹین ایجر پاکستانی ہے، جس کے لیے پاکستانی اداکارہ تلاش کی جائے گی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • کمالہ خان: مارول کامکس کی پاکستانی سپر ہیرو

    کمالہ خان: مارول کامکس کی پاکستانی سپر ہیرو

    افسانوی سپر ہیرو ہم میں سے ہر کسی کے بچپن کی محبت رہے ہیں لیکن کیا آپ جانتے ہیں کہ ایک مسلم پاکستانی سپر ہیرو ’کمالہ خان‘ بھی کامکس کی دنیا میں اپنا وجود رکھتی ہے۔

    یہ ایک افسانوی سپر ہیرو کردار ہے جسے امریکی کامک بک سیریز ’مارول کامک ‘ میں تخلیق کیا ہے۔ اس کے تخلیق کار ثنا امانت اور اسٹیفن ویکر ہیں کامک کے مصنف جی ویلو ولسن ہیں اور اس ک ی تراش خراش اور خد و خال آرٹسٹ ایڈرین الفونا کی مرہونِ منت ہیں۔

    کمالہ خان ایک پاکستانی ںژاد امریکی ٹین ایجر ہیں جو کہ اپنی ہیٔت بدلنے پرقادر ہیں اور ان کی یہی خداداد صلاحیت ان کی کہانی کی بنیاد ہے۔

    کمالہ خان مارول کی پہلی مسلم سپر ہیرو کردار ہیں جن کی اپنی کامک ہے پہلی بار کمالہ اگست 2013 میں پبلش ہونے والی کیپٹن امریکہ کامک میں جلوہ گر ہوئی بعد ازاں 2014 میں مس مارول کے نام سے ان کی اپنی کامک منظر عام پر آئی جو کہ بعد میں سب سے زیادہ فروخت ہونے والی کامکس کی فہرست میں شامل ہوئی۔