ARYNews.tv | Urdu – Har Lamha Bakhabar

Tag: muhajir

  • جو لوگ پتنگ کاٹنا چاہتے تھے آج ان کی نیندیں حرام ہوگئیں: میئر کراچی

    جو لوگ پتنگ کاٹنا چاہتے تھے آج ان کی نیندیں حرام ہوگئیں: میئر کراچی

    کراچی: شہر قائد کے میئر وسیم اختر نے کہا ہے کہ جو لوگ پتنگ کاٹنا چاہتے تھے آج ان کی نیندیں حرام ہوگئی ہیں، ایم کیو ایم کو الیکشن کمیشن کی جانب سے پتنگ کا نشان دے دیا گیا ہے جس پر میں اہل کراچی کو مبارک باد پیش کرتا ہوں۔

    ان خیالات کا اظہار انہوں نے کراچی کے علاقے قذافی چوک میں منعقد جلسے سے خطاب کرتے ہوئے کیا، وسیم اختر کا کہنا تھا کہ الیکشن میں برساتی مینڈکوں کو شکست دیں گے، جو لوگ ایم کیو ایم کے خلاف سازش کر رہے تھے عام انتخابات میں عوام انہیں شکست دیں گے۔

    ان کا مزید کہنا تھا کہ سوائے سندھ کے سارے صوبے ترقی کر رہے ہیں، حکومت سندھ نے سندھ کے لیے کچھ نہیں کیا، نگران حکومت سے مطالبہ کرتا ہوں کہ وہ کراچی کا پیسہ کراچی پر خرچ کرے۔

    میئر کراچی کو نالوں کی صفائی کے لیے ایک ماہ کی مہلت

    خیال رہے کہ الیکشن کمیشن آف پاکستان کی جانب سے آئندہ عام انتخابات کے لیے سیاسی جماعتوں کوانتخابی نشان کی الاٹمنٹ کا عمل شروع کردیا گیا ہے جس کے تحت پہلے مرحلے میں بغیراعتراضات والی 77 سیاسی جماعتوں کو انتخابی نشان الاٹ کردیئے ہیں۔

    ایم کیو ایم پاکستان کو پتنگ کا نشان الاٹ کردیا گیا ہے، یہ نشان ایم کیوایم کے سینئر ڈپٹی کنوینیئر عامرخان کی درخواست پر الاٹ کیا گیا جبکہ فاروق ستار اور خالد مقبول دونوں کی کنوئینر شپ کی درخواستیں عدالت میں زیرسماعت ہیں۔

    الیکشن کمیشن نے متعدد سیاسی جماعتوں کوانتخابی نشان الاٹ کردیا

    واضح رہے کہ پارٹی آئین کے مطابق کنوینئر کی عدم موجودگی میں سینئر ڈپٹی کنوینئر کو تمام اختیارات حاصل ہیں، عامر خان نے سینئر ڈپٹی کنوینیئر کی حیثیت سے درخواست دی الیکشن کمیشن نے عامر خان کی درخواست منظور کرلی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • مہاجرہونے پرفخر ہے، بٹے رہنے سے ہمیں بہت نقصان ہوا، پرویزمشرف

    مہاجرہونے پرفخر ہے، بٹے رہنے سے ہمیں بہت نقصان ہوا، پرویزمشرف

    کراچی : سابق صدر جنرل (ر) پرویز مشرف نے کہا ہے کہ فخر سے کہتا ہوں میں مہاجر ہوں لیکن خود کو ایم کیو ایم کا نہیں سمجھتا، بٹے رہنے سے ہمیں بہت نقصان ہوا، عوام آپس میں لڑانے والے رہنماؤں سے چھٹکارا حاصل کریں۔

    ان خیالات کا اظہار انہوں نے کراچی کے علاقے لیاقت آباد میں آل پاکستان مسلم لیگ کے جلسے سے خطاب کرتے ہوئے کیا۔

    ویڈیو لنک کے ذریعے کیے جانے والے خطاب میں پرویز مشرف کا کہنا تھا کہ شہر قائد میں ہرقوم کے لوگ بستے ہیں، جو کراچی میں رہ رہا ہے وہ اسی شہر کا ہے، ہمیں قومتیں چھوڑنی پڑیں گی، بٹےرہنےسے ہمیں بہت نقصان ہوا۔

    انہوں نے کہا کہ کراچی میں مہاجر 20 سے30 سال تک مصیبتوں میں رہے، ایم کیوایم کا نام پاکستان میں ایک دھبہ بن چکاہے، اس جماعت کی وجہ سے بچوں کونقصان ہوا، سڑک پرجاتے ہوئے مہاجر نوجوان کو بھتہ خور اور را کا ایجنٹ کہا جاتا ہے۔

    پرویز مشرف نے کہا کہ بھارت سے ہجرت کرکے آنے والی پڑھی لکھی قوم جاہل بنتی جارہی ہے، فخر سے کہتا ہوں کہ میں مہاجر ہوں لیکن خود کوایم کیوایم کا حصہ نہیں سمجھتا، ایم کیو ایم اور اے این پی والے ہتھیار دے کر کہتے تھے لو اور ایک دوسرے کوجان سے مارو۔

    سابق صدر کا کہنا تھا کہ کراچی کی قسمت میں صرف مرنا اور مارنا نہیں، یہاں ہر قوم کو ان کے سیاسی لیڈروں نے استعمال کیا اور قوم کو ہتھیار اورگولیاں دیتے رہے، عوام آپس میں لڑانے والے رہنماؤں سے چھٹکارا حاصل کریں۔

    انہوں نے واضح کیا کہ میں اس ملک میں آرمی چیف، صدراور چیف ایگزیکٹو رہا ہوں مجھے کچھ نہیں چاہئیے، مجھے صرف غریب عوام کی خوشی چاہیے، میں سیاست میں بنیادی تبدیلی لانا چاہتا ہوں۔

    پاکستان میں اصلی لیڈرشپ نہیں ہے، کامیاب ہوں گا یا نہیں، یہ بعد کی بات ہے آپ میرے ساتھ قدم اٹھاؤ آپ کو صحیح راستے پر لے جاؤں گا۔

    اپنے دور حکومت میں کیے جانے والے اقدامات کے حوالے سے انہوں نے کہا کہ لیاری میں اسٹیڈیم کو ٹھیک کیا، باکسر کو 50 لاکھ روپے دیئے، لیاری میں باکسنگ، سائیکل اور گدھا گاڑی ریس کروائی۔

  • مہاجروں نے بات مان لی لیکن شیطان ابھی زندہ ہے، مصطفیٰ کمال

    مہاجروں نے بات مان لی لیکن شیطان ابھی زندہ ہے، مصطفیٰ کمال

    کوئٹہ : پاک سرزمین پارٹی کے چیئرمین مصطفی کمال نے کہا ہے کہ مہاجروں نے میری کی بات مان لی ہے لیکن شیطان ابھی زندہ ہے،کراچی سے باہر سیٹ نہ جیتنے کا طعنہ دینے والے احمقوں کی جنت میں رہتےہیں۔

    ان خیالات کااظہارانہوں نے کوئٹہ میں پی ایس پی ورکرز کنونشن سے خطاب کرتے ہوئے کیا، کنونشن میں انیس قائم خانی، رضا ہارون سمیت دیگر مرکزی و مقامی رہنماء شریک ہوئے۔

    کنونشن سے خطاب کرتے ہوئے مصطفی کمال کا کہنا تھا کہ پرتپاک استقبال اور کنونشن میں کارکنوں کی تعداد نے ان کا حوصلہ بڑھایا ہے۔

    انہوں نے مزید کہا کہ مجھے طعنہ دیا جاتا ہے کہ پاکستان کے کسی شہر سے بھی سیٹ جیت کر دکھاؤ، طعنہ دینے والے احمقوں کی جنت میں رہتے ہیں۔

    مصطفیٰ کمال نے اپنے خطاب الزام لگایا کہ میئر کراچی وسیم اختر پنشن کے12لاکھ روپے کا چیک جاری کرنے پر چھ لاکھ روپے وصول کرتے ہیں۔

    انہوں نے مہاجروں کو مخاطب کرتے ہوئے کہا کہ نام نہاد لیڈر آپ کے کندھے استعمال کرکے نفرتیں پھیلاتے ہیں، تاہم مہاجراب ان کی بات مان چکے ہیں لیکن شیطان ابھی زندہ ہے۔

    پی ایس پی کے چیئرمین کا کہنا تھا کہ میرا نظریہ لوگوں کو جوڑنا ہے ،نفرتوں سے لیڈر نہیں غریب مرتے ہیں، انہوں نے کارکنوں کو ہدایت کہ وہ ان کا پیغام گھرگھر پہنچائیں۔

    مزید پڑھیں: ایم کیوایم قومی سلامتی کا مسئلہ ہے، دفن کرنا ضروری ہے، مصطفیٰ کمال

      کنونشن سے خطاب میں رضا ہارون اور دیگر رہنماؤں کا کہنا تھا کہ ملک کو ان حالات میں اتحاد و اتفاق لانے والی قیادت کی ضرورت ہے۔

  • تعلیم مہاجروں کی پہچان تھی اوراب انہیں واپس ملے گی، مصطفیٰ کمال

    تعلیم مہاجروں کی پہچان تھی اوراب انہیں واپس ملے گی، مصطفیٰ کمال

    کراچی : پی ایس پی کے سربراہ سید مصطفی کمال نے کہا ہے کہ علم سب سے بڑا ہتھیار ہے، تعلیم مہاجروں کی پہچان تھی اور اب واپس ملے گی۔

    ان خیالات کا اظہار انہوں نے اورنگی ٹاؤن کے دورے کے موقع پر مکینوں سے گفتگو کرتے ہوئے کیا۔ مصطفیٰ کمال کی اورنگی ٹاؤن آمد پر ان کا شاندار استقبال کیا گیا۔

    اس موقع پر پرچم کشائی بھی کی گئی۔ تقریب میں شاندار آتشبازی اور کبوتر چھوڑے گئے، مصطفیٰ کمال کا اپنے خطاب میں نیا نعرہ لگایا۔ کہا کہ ہتھیار پھینکو اور کتابیں خریدو۔

    انہوں نے کہا کہ کراچی میں ہزاروں افراد کو مرتے اور نوجوانوں کو در بدر ہوتے دیکھا ہے۔ اب کر اچی میں مرنے مارنے کا کاروبار بند کرنا ہوگا۔ ہم کسی یونٹ اور سیکٹر آفس پر قبضہ کرنے نہیں آئے ۔ہم عوام کی خدمت کرنے کے لئے آئے ہیں ۔

    مصطفی کمال نے کہا کہ کراچی پڑھے لکھے لوگوں کا شہر ہوتا تھا ،سب کو روزگار اور تعلیم ملتی تھی۔ سابق میئر کا کہنا تھا اگر بچوں کا مستقبل بنانا چاہتے ہو تو وطن پرستی کے قافلے میں شامل ہو جاؤ۔

    انہوں نے کہا کہ جو پاکستان کے جھنڈے کو مانتے ہیں وہ ہمارے بھائی ہیں۔ ایک نسل کٹ مر گئی اور ایک نسل جیلوں میں ہے ،پچھلے آٹھ سال میں اورنگی ٹاؤن تباہ ہوگیا ہے۔ اس پارٹی کے سربراہ نے ہماری جانوں کا سودا کرلیا ہے، تقریب میں شاندار آتش بازی کا مظاہرہ ہوا اور ملی نغمے بھی چلتے رہے۔

     

  • پی ایس پی ٹولے کا سرغنہ مہاجروں کا کھلا دشمن ہے، ترجمان متحدہ

    پی ایس پی ٹولے کا سرغنہ مہاجروں کا کھلا دشمن ہے، ترجمان متحدہ

    کراچی : متحدہ قومی موومنٹ کے ترجمان نے کہا ہے کہ پاک سرزمین پارٹی ٹولے کا سرغنہ مہاجروں کا کھلا دشمن ہے جو اسٹیبلشمنٹ کے ہاتھوں اپنا سودا کرکے ایم کیوایم کو ختم کرنے اور مہاجروں کے حقوق کی جدوجہد کو کچلنے کے ایجنڈے کی تکمیل کیلئے پاکستان آیا ہے۔

    اپنے بیان میں ترجمان نے کہا کہ ایم کیوایم کے کارکنان اور مہاجرعوام اچھی طرح جانتے ہیں کہ پاک سرزمین پارٹی نامی ٹولے کا سرغنہ ایک طرف تو ایم کیوایم کے لاپتہ کارکنوں کیلئے مگرمچھ کے آنسو بہارہا ہے اور دوسری جانب رینجرز کو ایم کیوایم کے کارکنوں کی فہرستیں اورنام پتے دے کرانہیں گرفتار کروا رہا ہے اورسرکاری ٹارچر سیلوں میں انہیں تشدد کانشانہ بنوارہا ہے تاکہ انہیں ایم کیوایم چھوڑنے اور مہاجروں کے خلاف کام کرنے پر مجبور کیا جائے۔

    ترجما ن نے کہا کہ کراچی میں پولیس اوررینجرزکے ہاتھوں ایم کیوایم کے بے گناہ کارکنوں کا ماورائے عدالت قتل کیا جاتارہا اور مگر پاک سرزمین ٹولے کاسرغنہ دبئی میں بیٹھ کرعیاشیاں کرتارہا۔

    اسے پولیس اوررینجرز کے ہاتھوں کراچی میں مہاجروں کی گرتی ہوئی لاشیں نظرنہیں آئیں اورآج یہ شخص اسٹیبلشمنٹ کے ہاتھوں اپنا سودا کرکے مہاجروں اوران کی جماعت کو کچلنے کے ایجنڈے پر عمل کرنے آیاہے اور مہاجروں کا قتل عام کرنے والوں کا دوست اور رفیق بناہوا ہے ۔

    اس شخص نے میرجعفر و میرصادق کوبھی پیچھے چھوڑ دیا ہے۔ یہ ٹولہ چاہے کتنی سازش اورکیسے ہی اوچھے ہتھکنڈے اختیارکرلے یہ اپنے ناپاک منصوبوں میں کامیاب نہیں ہوگا۔

     

  • مہاجروں کے قتل عام میں شریف برادران برابر کے شریک ہیں، ایم کیو ایم

    مہاجروں کے قتل عام میں شریف برادران برابر کے شریک ہیں، ایم کیو ایم

    کراچی : متحدہ قومی موومنٹ کی رابطہ کمیٹی نے کہاہے کہ کراچی آپریشن کی آڑ میں محب وطن مہاجروں کے سیاسی ، معاشی اور جسمانی قتل عام میں شریف برادران بھی برابر کے شریک ہیں اور انشاء اللہ بہت جلد ظالموں کو عبرتناک انجام کا سامنا کرنا پڑے گا ۔

    ایک بیان میں رابطہ کمیٹی نے وزیراعلیٰ پنجاب میاں شہباز شریف اور وزیراعلیٰ بلوچستان سرفراز بگٹی کے بیانات شدیدالفاظ میں مذمت کرتے ہوئے کہا کہ قائد تحریک الطاف حسین نے سچائی بیان کرکے پانچ کروڑ مہاجروں کے دلوں کی ترجمانی کی ہے ۔

    بین الاقوامی ذرائع ابلاغ اور انسانی حقوق کمیشن آف پاکستان کی رپورٹ سے ثابت ہوگیا ہے کہ کراچی آپریشن کی آڑ میں کروڑوں عوام کی منتخب نمائندہ جماعت ایم کیوایم کو کچلنے کی سازش کی جارہی ہے اورمہاجروں کے بنیادی انسانی حقوق پامال کیے جارہے ہیں لیکن اس ظلم کے خلاف میاں شہبازشریف اور سرفراز بگٹی کو ایک لفظ تک بولنے کی توفیق نہیں ہوئی ۔

    رابطہ کمیٹی نے کہاکہ ہم مذہب اورہم وطن شہریوں پر ڈھائے جانے والے مظالم کی حمایت کرنے والے خود پاکستان کے سب سے بڑے دشمن اور بدمعاش ہیں۔رابطہ کمیٹی نے کہاکہ جب قانون نافذ کرنے والے ادارے اور حکومت اپنے شہریوں کی جان ومال کی دشمن بن جائے تو ظلم کا شکار مہاجر عوام کو انصاف کون فراہم کرے گا؟

    رابطہ کمیٹی نے کہاکہ بانیان پاکستان کی اولادوں نے عزت سے جینے اور عزت سے مرنے کا فیصلہ کرلیا ہے اور انشاء اللہ بہت ظالموں اور ان کا ساتھ دینے والوں کو انجام عبرتناک ہوگا۔

    رابطہ کمیٹی نے کہاکہ میاں شہبا زشریف ، قوم کو جواب دیں کہ وزیراعظم میاں محمد نوازشریف اور وفاقی وزیرداخلہ چوہدری نثارعلی خان کی باربار یقین دہانیوں کے باوجود کراچی آپریشن کیلئے آج تک مانیٹرنگ کمیٹی کیوں تشکیل نہیں دی گئی؟

    میاں شہبازشریف کو کراچی میں رینجرز کی جانب سے ایم کیوایم کے بے گناہ رہنماوٴں ، ذمہ داروں اور کارکنوں کی غیرقانونی گرفتاریاں، حراست کے دوران ان پرکیا گیابہیمانہ تشدد،گرفتارشدہ کارکنان کی گمشدگی اوربے گناہ کارکنان کے ماورائے عدالت قتل کے واقعات کیوں دکھائی نہیں دیئے؟

    بانیان پاکستان کی اولادوں کو مسلسل غیرقانونی اورغیرانسانی ظلم کا نشانہ بناکر کیا پاکستان دشمنی کامظاہرہ نہیں کیاجارہا؟ شہبازشریف ،خواجہ آصف کی جانب سے مسلح افواج کے خلاف توہین آمیز زبان استعمال کرنے پر کیوں خاموش رہے؟

    رابطہ کمیٹی نے کہاکہ عدالت کی جانب سے رابطہ کمیٹی کے اسیررکن قمرمنصور کو طبی معائنہ کیلئے اسپتال بھیجنے کا حکم دینے کے باوجود انہیں کو علاج ومعالجہ کی سہولت سے محروم رکھنے کاعمل کیا توہین عدالت نہیں ہے؟ اور توہین عدالت کے اس عمل پر میاں شہباز شریف کی زبان پر کیوں تالے لگے ہوئے ہیں؟

  • خواجہ آصف کا اپنے بیان پرمعافی مانگنے سے انکار

    خواجہ آصف کا اپنے بیان پرمعافی مانگنے سے انکار

    اسلام آباد: وزیردفاع خواجہ آصف نے مہاجروں کے حوالے سے اپنے بیان پر معافی مانگنے سے انکارکردیا، خواجہ آصف کے بیان ہپر ایم کیو ایم شدید ردعمل کا اظہارکررہی ہے۔

    خواجہ آصف نے اپنےحالیہ بیان میں کہا ہے کہ ’’ میں نے ایسا کچھ نہیں کہا جس کے لئے معافی مانگنی پڑے‘‘۔

    ایم کیو ایم نے گزشتہ روز منگل کو اعلان کیا تھا کہ وزیردفاع کی غیرمشروط معافی تک ان کی جماعت قومی اسمبلی اورسینٹ سےبائیکاٹ کے گی۔

    ایم کیو ایم کے کارکنان نے کثیرتعداد میں گزشتہ روزعورتوں اوربچوں کے ہمراہ کراچی پریس کلب کے سامنے خواجہ آصف کے بیان کے خلاف احتجاج کیا تھا۔

    وزیر دفاع خواجہ آصف نے قومی اسمبلی میں اپنی تقریر میں کہا تھا کہ ’’ اصل مہاجر صرف وہ ہیں جنہوں نے جالندھراورلدھیانے سے ہجرت کی تھی‘‘۔

  • وزیر دفاع پانچ کروڑ مہاجرعوام سے معافی مانگیں، ڈاکٹر فاروق ستار

    وزیر دفاع پانچ کروڑ مہاجرعوام سے معافی مانگیں، ڈاکٹر فاروق ستار

    کراچی : وزیر دفاع خواجہ آصف کے بیان کے خلاف ایم کیو ایم نے کراچی سمیت ملک بھر میں احتجاجی مظاہرے کئے اور ریلیاں نکالیں۔

    متحدہ رہنماؤں نے خواجہ آصف سے معافی کا مطالبہ کرتے ہوئے کہا ہے کہ مہاجروں کو تقسیم کرنے کی سازش کو بند کیا جائے۔

    انہوں نے کہا کہ اگر معافی نہ مانگی گئی تو احتجاج بھی ہوگا اور کاروبار بھی بند ہوگا۔ تفصیلات کے مطابق وزیر دفاع خواجہ آصف کے بیان کے خلاف ایم کیو ایم سراپا احتجاج بن گئی۔

      اس حوالے سے کراچی سمیت پورے ملک میں متحدہ قومی موومنٹ نے خواجہ آصف کے خلاف مظاہرے کئے اور ریلیاں نکالیں۔

    پریس کلب کے باہر مظاہرے میں متحدہ رہنماؤں نے وزیر دفاع کے بیان کو بانیان پاکستان کی تذلیل اور مہاجر قوم کے لئے متعصبانہ، اشتعال انگیز قرار دیا۔

    مظاہرے سے خطاب کرتے ہوئے ڈاکٹر فاروق ستار نے کہا کہ وزیر دفاع نے مہاجر قوم کو تقسیم کرنے کی سازش کی ہے، وہ پانچ کروڑ مہاجر عوام سے معافی مانگیں ۔

    ڈاکٹر خالد مقبول صدیقی نے کہا کہ کراچی کے نوجوان شہید ہوں گے تو کراچی بار بار بند ہوگا، خواجہ آصف جیسے لوگوں کی وجہ سے پاکستان تقسیم ہوا،وزیر دفاع نے دو قومی نظرئیے اور پاکستان کے وجود کی نفی کی ہے۔

    حیدر عباس رضوی نے اپنے خطاب میں کہا کہ مہاجروں کو مختلف القاب دے کر ان کی قربانیوں کا اعتراف کرنے کے بجائے ان کا تمسخر اڑایا جا رہا ہے، جسے برداشت نہیں کیا جائے گا ۔

    متحدہ رہنماؤں کا کہنا تھا کہ وزیر اعظم وزیر دفاع کے بیان پر پارٹی پالیسی واضح کریں ،ہجرت کرکے آنے والے لوگ اپنی شناخت اور اپنے حصے کا پاکستان لے کر آئے تھے۔

  • قائد تحریک کی تقریر پر واویلامچانے والے عقل کے دشمن ہیں،ارکان اسمبلی

    قائد تحریک کی تقریر پر واویلامچانے والے عقل کے دشمن ہیں،ارکان اسمبلی

    کراچی : متحدہ قومی موومنٹ کے ارکان اسمبلی نے کہاہے کہ جوعناصر بھی قائدتحریک الطاف حسین کی تقریرسنے بغیراس پرواویلامچارہے ہیں وہ عقل کے دشمن ہیں جن کے ذہن ودل مہاجروںسے نفرت اورتعصب کے زہرمیں بجھے ہوئے ہیں۔

    اپنے ایک بیان میں ارکان اسمبلی نے کہاکہ جولوگ بھی لکیرکے فقیربن کرمحض ایم کیوایم دشمنی اورمہاجروںسے اپنے ازلی تعصب کااظہارکرنے کیلئے اپناقومی فریضہ سمجھتے ہوئے قائدتحریک الطاف حسین کے خلاف بیانات دے رہے ہیں۔

    ہم یہ دعوے سے کہتے ہیں کہ ان میں سے کسی نے بھی قائدتحریک الطاف حسین کی پوری تقریرنہیں سنی بلکہ وہ محض تعصب کی بنیادپر زہراگل رہے ہیں اور اس طرح اپنی نوکری پکی کررہے ہیں۔

    انہوں نے بلوچستان اسمبلی کی قرارداد کے بارے میںکہا کہ بلوچستان اسمبلی کے ارکان میں واقعی غیرت اور پاکستان سے محبت ہے توپہلے اپنے گھربلوچستان کی خبرلیں جہاں کے بیشترعلاقوں میں آج بھی ریاست کی رٹ نام کی کوئی چیزنہیں ہے۔

    ارکان اسمبلی نے پی ٹی آئی کی جانب سے اسمبلیوں میں قراردادیں پیش کرنے کے بارے میں کہاکہ اگرپی ٹی آئی کے ارکان اسمبلی کوواقعی فوج کی عزت وناموس کاکوئی پاس ہے تووہ سب سے پہلے ا پنے اپنے گریبانوں میں جھانکیں ۔

    انہوں نے کہا کہ پہلے اپنے لیڈرعمران خان سے لاتعلقی کااظہارکریں جنہوںنے پاکستان کے جرنیلوں کے بارے میں جو تحقیر آمیز گفتگوکی ہے اس کی وڈیوسوشل میڈیا پر موجود ہے جس سے انکارنہیں کیاجاسکتا۔

    ارکان اسمبلی نے کہاکہ جماعت اسلامی کے سابق امیرمنورحسن، مسلم لیگ ن کے رہنمااوروزیردفاع خواجہ آصف، وزیرداخلہ چوہدری نثار، پیپلزپارٹی کے سابق رہنمااورسابق گورنرپنجاب غلام مصطفیٰ کھر اور ان دیگر رہنماؤں نے مسلح افواج کے بارے میں جن خیالات کااظہارکیاہے وہ سب ریکارڈکاحصہ ہیں۔

    لیکن ان جماعتوں سے تعلق رکھنے والے افراد صرف اورصرف ایم کیوایم اور مہاجردشمنی میں متعصبانہ بیانات دے رہے ہیں عوام اچھی طرح دیکھ رہے ہیںکہ ان کے بارے میں کس جماعت کے کیاخیالات ہیں۔

  • جاگیرداروں کو نئے صوبوں سے جاگیریں جانے کا ڈر ہے، الطاف حسین

    جاگیرداروں کو نئے صوبوں سے جاگیریں جانے کا ڈر ہے، الطاف حسین

    کراچی: ایم کیو ایم کے قائد الطاف حسین کا کہنا ہے کہ انتظامی یونٹس یا نئے صوبے نہیں بنانا چاہتے تو نہ بناؤ، سندھ نہ دیں مگرایم کیو ایم کوسندھ دس سال کیلئےدے دیں۔

    کراچی میں ایم کیو ایم کے سندھی بولنے والے کارکنوں سے ٹیلی فونک خطاب کرتے ہوئے ایم کیو ایم کے قائد الطاف حسین نے کہا کہ سندھی بھی ہیں اور سندھ دھرتی کے وارث بھی، غیر کیوں سمجھا جا رہا ہے؟ مرسوں مرسوں سندھ نہ ڈیسوں کے نعرے لگانے والے صوبے اور انتظامی یونٹ نہیں بنانا چاہتے تو نہ بنائیں، سندھ بھی نہ دیں لیکن سندھ کو دس سال کیلئے ایم کیو ایم کو دے دیں۔

    انہوں کے کہا کہ سندھ کے تمام مستقل باشندے اس دھرتی کے وارث ہیں، یقین دلاتا ہوں سندھ دھرتی سے محبت کا حق ادا کریں گے، آخر کیوں اپنوں کو غیر اور غیروں کو اپنا سمجھتے ہو۔

    الطاف حسین کا کہنا تھا کہ سندھ کی آبادی پہلے کے مقابلے میں بہت بڑھ گئی ہے، آج سندھ کی آبادی ساڑھے 4 کروڑ سے زائد ہوگئی ہے، تعلیم حاصل کرنیوالے ہاریوں کی شرح 1947ء سے زیادہ ہے، وڈیرے الزام لگاتے ہیں کہ سندھیوں کا حق مہاجروں نے مارا، سندھی بھائیو! لاڑکانہ اور رتو ڈیرو سے ایم کیو ایم جیتی تھی یا پیپلزپارٹی؟۔

      الطاف حسین نے کہا کہ سندھ میں کچھ عناصر لڑاؤ اور حکومت کرو کی پالیسی اپنارہےہیں، ہندوستان کی تقسیم کے وقت معاہدہ ہوا تھاکہ جو زمین ہندوؤں نے چھوڑی اس پرمہاجروں کو بسایا جائیگا لیکن ہندوؤں کے جانے کے بعد جاگیرداروں نے زمینوں پر قبضہ کرلیا۔ بھارت جانیوالے ہندوؤں کی زمینوں کو وڈیروں اور جاگیرداروں سے خالی کرائینگے۔

    الطاف حسین کا کہنا تھا کہ ایم کیوایم کے وزیرتعلیم کے دور میں 400 نئے اسکول بنے لیکن اب ان اسکولوں میں اوطاقیں بنادی گئیں۔ وڈیرے اور جاگیردار اس لیے بلدیاتی انتخابات نہیں ہونے دیتے کیونکہ اس سے وہ کمزور ہوتے ہیں۔