ریاض : سعودی عرب میں حکومت کی جانب سے سیاحت کے فروغ کے لیے نئے منصوبے کا اعلان کیا گیا ہے، اس جدید منصوبے میں عوام کی دلچسپی کے لیے سہولیات دی جائیں گی۔
سعودی ولی عہد و نیوم بورڈ آف ڈائریکٹرز کے چیئرمین شہزادہ محمد بن سلمان بن عبدالعزیزآل سعود نے نیوم میں پہاڑی سیاحت کوفروغ دینے کے لیے نئے منصوبے ’تروجینا‘ کے قیام کا اعلان کردیا۔
سعودی خبررساں ایجنسی ’ایس پی اے‘ کے مطابق سیاحت کوفروغ دینے کےلیے ’تروجینا‘ فرنٹ کے منصوبے کے اعلان کے حوالے سے ولی عہد مملکت شہزادہ محمد بن سلمان نے کہا تروجینا فرنٹ کا قیام مملکت کے ویژن 2030 کے اہداف ومقاصد سے ہم آہنگ ہے۔
منصوبہ ماحولیاتی سیاحت کے اصولوں پرمبنی پہاڑی سیاحت کونئی جہت دینے میں انتہائی اہم کردار ادا کرے گاجس سے مملکت میں لوگوں کا معیار زندگی بلند ہوگا اور انہیں صحت مندانہ ماحول میسرآئے گا، منصوبہ عالمی سطح پرتحفظ ماحولیات کے حوالے سے ہماری کوششوں کو اجاگرکرے گا۔
دریں اثنا نیوم کمپنی کے سی ای او انجینئرنظمی النصر کا کہنا تھا کہ نیوم میں لانچ کیے جانے والا یہ منصوبہ انتہائی شاندار ہے جس کے تحت فطرت اور جدید ٹیکنالوجی کے اشتراک سے دنیا ایک نئے اورمثالی تجربے سے روشناس ہوگی۔
انہوں نے مزید کہا نیے منصوبے سے نیوم سٹی کے مقاصد کو بھی تقویت ملے گی اور اس کی افادیت میں بھی غیر معمولی اضافے کا باعث بنے گاجس سے نیوم عالمی سطح پرایک مثالی ، مکمل اورپرکشش فرنٹ کے طورپرسامنے آئے گا۔
واضح رہے ’تروجینا ‘ ترقیاتی منصوبہ اپنی نوعیت کا انتہائی منفرد منصوبہ ہے جسے عالمی معیار کے مطابق ڈیزائن کیا گیا ہے۔ یہ علاقہ قدرتی مناظر سے مالا مال ہے جسے جدید خطوط پراستوار کرکے عصر حاضر کی تمام سہولتوں سے مزین کیا جائے گا۔
تروجینا منصوبے کے تحت کھلی فضا میں "سنوبورڈنگ” کی سہولت فراہم کی جائے گی جو خطے میں بالعموم عرب ریاستوں میں بلخصوص منصوبے کی نمایاں خصوصیات میں سے ایک ہوگا۔
اس تفریحی سہولت کی افادیت و اہمیت میں اضافہ اس لیے بھی ہوگا کہ "سنوبورڈنگ” صحرائی اب وہوا میں پیش کیاجانے والا اپنی نوعیت کامنفرد تجربہ ہوگا۔
مجوزہ پروگرام کے مطابق یہ فرنٹ سال 2026 میں مکمل ہوجائے گا جہاں سمندری، پہاڑی اور صحرائی تفریحی گاہیں دنیا کے لیے باعث حیرت ہوگی۔
