پشاور: محرم الحرام میں امن و امان برقرار رکھنے کیلئے دفعہ 144 نافذ جبکہ ڈبل سواری، افغان مہاجرین کی نقل وحرکت پر پابندی عائد کردی گئی ہے۔
ڈی سی آفس کے جاری کردہ نوٹیفکیشن میں کہا گیا ہے کہ ڈبل سواری، افغان مہاجرین کی نقل و حرکت پر پابندی عائد کردی گئی ہے، ہوائی فائرنگ، نفرت انگیز تقاریر، لاؤڈ اسپیکر کے غلط استعمال پر بھی پابندی لگادی گئی ہے۔
جاری کئے گئے نوٹیفکیشن میں کہا گیا ہے کہ پشاور سٹی میں سرائے، ہوٹلوں میں کمرے اور رینٹ اے کار کاروبار بھی بند رہے گا جبکہ جلوس و مجالس کے قرب وجوارمیں گیس سلنڈرز بھرنے والی دکانیں بند رہیں گی۔
فوج تعینات کرنے کا فیصلہ:
ملک میں محرم الحرام کے دوران سکیورٹی خدشات کے پیش نظر فوج تعینات کرنے کا فیصلہ کرلیا گیا، سول اداروں کی مددکیلئے فوج سیکیورٹی کے فرائض سر انجام دے گی۔
وزارت داخلہ نے اسلامی مہینے محرم الحرام کے دوران سیکیورٹی کو یقینی بنانے کے لیے ملک بھر میں پاک فوج کی تعیناتی کی منظوری دے دی ہے۔
آئین کے آرٹیکل 245 کے تحت فوج کی تعیناتی کا نوٹیفکیشن بھی جاری کر دیا گیا ہے، جس میں چاروں صوبوں، جی بی اور آزادکشمیرمیں فوج کی تعیناتی کا فیصلہ کیا گیا ہے۔
نوٹی فکیشن میں کہا گیا وفاقی دارالحکومت اسلام آباد میں بھی فوج تعینات کی جائے گی، محرم کے دوران سول اداروں کی مدد کیلئے فوج سیکیورٹی کے فرائض سر انجام دے گی۔
فوج کی تعیناتی کا مقصد ممکنہ سکیورٹی خطرات سے نمٹنا اور عوام کے تحفظ کو یقینی بنانا ہے، فوج کے دستے حساس علاقوں میں گشت کریں گے اور حفاظتی انتظامات کی نگرانی کریں گے۔
چاروں صوبوں اور گلگت بلتستان کی حکومتوں نے محرم میں فوج تعیناتی کی درخواست کی تھی۔
پنجاب بھر میں محرم الحرام کے دوران سیکیورٹی ہائی الرٹ
یاد رہے پنجاب حکومت نے صوبے بھر میں یکم سے 10محرم تک دفعہ 144 نافذ کرنے کا اعلان کیا ہے تاکہ اس مہینے میں امن و امان کو یقینی بنایا جا سکے۔
دفعہ 144 کے تحت سیکورٹی اور فرقہ وارانہ ہم آہنگی کو برقرار رکھنے کے لیے صوبے بھر میں سات قسم کی پابندیاں نافذ کی گئیں ہیں۔
موٹر سائیکل پر ڈبل سواری پر پابندی خاص طور پر 9 اور 10 محرم کو نافذ کی جائے گی۔ دیگر تمام پابندیاں پورے 10 دن کی مدت میں نافذ رہیں گی۔
