لاہور : امیر جماعت اسلامی سراج الحق نے کہا 126 دن کا دھرنا دینا مولانا فضل الرحمان کا بھی حق ہے، حکومت وعدے کے مطابق انہیں شربت کھانے کنٹینر مہیا کرے اور دھرنے کو نہ روکے۔
تفصیلات کے مطابق امیر جماعت اسلامی سینیٹرسراج الحق کی زیر صدارت منصورہ لاہور میں کشمیر، ناموس رسالت اور اتحاد امت کے موضوع پر مشائخ کانفرنس منعقد کی گئی۔
امیر جماعت اسلامی سراج الحق نے میڈیا سے گفتگو میں کہا کہ جو جتنا بااختیار ہے وہ اتنا ذمہ دار بھی ہے، کشمیری ہم سے توقعات رکھتے ہیں، کشمیر پر حکومت کی کوئی کارکردگی نظر نہیں آرہی، پوچھیں تو کہتے 27 ستمبر کی تقریربہت اچھی تھی۔
امیر جماعت اسلامی کا کہنا تھا کہ مودی نے بنگلادیش بنانے میں کردار کا اعتراف کیا اب بنگلہ دیش کا بدلہ لینے کا وقت آگیا ہے، مودی سے انتقام سری نگر کو لے کر پوراکریں گے۔
آزادی مارچ کے حوالے سے سراج الحق نے کہا حکومت جے یو آئی ف کے دھرنے کو نہ روکے، ایک سو 26 دن کا دھرنا دینا مولانا فضل الرحمان کا بھی حق ہے، حکومت وعدے کے مطابق انہیں شربت کھانے کنٹینر مہیا کرے، فردوس عاشق حلوے سمیت پیکج کا اعلان کریں گی تو کون نہیں آئے گا۔
سراج الحق نے قبل از وقت الیکشن کا مطالبہ کرنے والی جماعتوں کو پارلیمنٹ سے مستعفی ہونے کا مشورہ دے دیا۔
گذشتہ روز امیر جماعت اسلامی سراج الحق نے وزیر اعظم کی خطے میں امن کی کوششوں کا خیر مقدم کرتے ہوئے کہا تھا کہ وزیراعظم کی کوشش ہےایران اورسعودی عرب کی صلح ہو، خون کےآخری قطرےتک کشمیریوں کے ساتھ کھڑے ہیں۔
