اسلام آباد : پاکستان تحریک انصاف کے سربراہ عمران خان کا کہنا ہے کہ ملتان میٹرومنصوبہ عوام کے بجائے تجوریوں میں کمیشن منتقلی کے لیے بنایا گیا۔
تفصیلات کے مطابق چیئرمین پاکستان تحریک انصاف نے سماجی رابطے کی ویب سائٹ ٹویٹر پراپنے پیغام میں ملتان میٹرو منصوبے کوسفید ہاتھی قراردے دیا۔
عمران خان نے کہا کہ دورے میں میٹروملتان کی صورت میں سفید ہاتھی نگاہوں کے سامنے رہا، ملتان میں بسیں دکھائی دیں نہ ہی قابل ذکر مسافر جبکہ منصوبے کو زندہ رکھنےکے لیے بھی بڑی سبسڈی درکارہے۔
پاکستان تحریک انصاف کے سربراہ عمران خان نے کہا کہ ملتان میٹرو منصوبہ عوام کے بجائےتجوریوں میں کمیشن منتقلی کے لیے بنایا گیا۔
خیال رہے کہ گزشتہ روز ملتان میں کارکنوں سے خطاب کرتے ہوئے چیئرمین پاکستان تحریک انصاف عمران خان کا کہنا تھا کہ شہباز شریف کی کرپشن کو نا صرف بے نقاب کریں گے بلکہ انصاف کے کٹہرے میں لائیں گے، شریف برادران کی سیاست کا اندھیرا 2018 کے عام انتخابات میں ختم ہوجائے گا۔
میٹرو اور اورنج ٹرین منصوبوں کی تحقیقات ہونی چاہیئے،عمران خان
یاد رہے کہ گزشتہ ہفتے چیئرمین پی ٹی آئی عمران خان کا کہنا تھا کہ میٹرو اور اورنج لائن ٹرین منصوبوں کی تحقیقات ہونی چاہئیں، تحقیقات سے پتہ چلے گا میگا پراجیکٹس کی وجہ بڑے کک بیکس ہیں۔
