ملتان: ملتان پولیس نے تعلیمی اداروں میں منشیات سپلائی کرنے والے 2 افراد کو گرفتار کر لیا۔
تفصیلات کے مطابق ملتان پولیس نے تعلیمی اداروں میں منشیات فروخت کرنے والے گروہ کے 2 ارکان کو گرفتار کر لیا ہے، اور ان کے قبضے سے 20 کلو گرام چرس، 2 کلو گرام آئس اور 2 کلو گرام افیون برآمد کر لی۔
ایس پی کیپٹن ریٹائرڈ قاضی علی رضا کے مطابق ملزمان کوئٹہ سے منشیات لاتے تھے، منشیات فروشوں کا نیٹ ورک توڑ دیا گیا ہے، اور ملزمان کے باقی ساتھیوں کو جلد گرفتار کر لیا جائے گا۔
واضح رہے کہ اسلامیہ یونیورسٹی بہاولپور میں ایک شرمناک ڈرگ اسکینڈل سامنے آیا ہے، یونیورسٹی کے گرفتار چیف سیکیورٹی افسر اعجاز شاہ کے موبائل سے ساڑھے پانچ ہزار نازیبا ویڈیوز بھی برآمد ہوئیں۔
اے آر وائی نیوز کے مطابق پولیس حکام کی جانب سے ویڈیوز کا معاملہ دبانے کی کوشش کی جا رہی ہے، دوسری طرف اسلامیہ یونیورسٹی نے اپنے تین افسروں کی گرفتاری کو سازش قرار دے دیا ہے، اس سلسلے میں یونیورسٹی کے ڈائریکٹر فنانس ڈاکٹر ابو بکر، چیف سیکیورٹی آفیسر سید اعجاز شاہ اور ٹرانسپورٹ آفیسر الطاف گرفتار ہیں۔
