ARYNews.tv | Urdu – Har Lamha Bakhabar

Tag: Multan Sultans

  • پی ایس ایل6 کے آخری راؤنڈ میچ میں میں یونائیٹڈ کامیاب، ملتان سلطانز کو شکست

    پی ایس ایل6 کے آخری راؤنڈ میچ میں میں یونائیٹڈ کامیاب، ملتان سلطانز کو شکست

    ابوظبی: پاکستان سپر لیگ میں اسلام آباد یونائیٹڈ نے ملتان سلطانز کو 4 وکٹوں سے شکست دے کر فتح کے ساتھ راؤنڈ مرحلے کا اختتام کیا ہے۔

    ابوظبی میں کھیلے گئے آخری لیگ میچ میں اسلام آباد یونائیٹڈ نے ٹاس جیت کر پہلے بولنگ کا فیصلہ کیا جو ابتدا میں زیادہ اچھا ثابت نہ ہوا، ملتان سلطانز کے اوپنرز شان مسعود اور محمد رضوان نے اپنی ٹیم 93 رنز کا شاندار آغاز فراہم کیا خصوصاً شان بھرپور فارم میں نطر آئے اور 6 چوکوں اور 3 چھکوں کی مدد سے 59 رنز بنائے۔

    اس شراکت کا خاتمہ شان مسعود کے آؤٹ ہونے کے ساتھ ہوا جو افتخار احمد کے ہاتھوں آؤٹ ہوئے، اسلام آباد یونائیٹڈ کو اگلی وکٹ کے لیے زیادہ انتظار نہیں کرنا پڑا اور فواد احمد نے ایک ہی اوور میں ان فارم محمد رضوان اور صہیب مقصود کو چلتا کیا۔

    رائلی روسو ایک بار پھر بُری طرح ناکام ہوئے، صرف دو رنز بنانے کے بعد اسلام آباد کے کپتان نے ان کی وکٹ حاصل کی۔

    اس مرحلے پر جانسن چارلس کا ساتھ دینے حماد اعظم آئے اور دونوں کھلاڑیوں نے پانچویں وکٹ کے لئے 27 قیمتی رنز جوڑے لیکن 137 کے اسکور پر دونوں ہی کھلاڑی یکے بعد دیگرے پویلین لوٹ گئے۔

    اسلام آباد یونائیٹڈ کے سامنے ملتان سلطانز کے ٹیل اینڈرز زیادہ مزاحمت نہ کرسکے اور پوری ٹیم 149 رنز پر ڈھیر ہو گئی۔

    اسلام آباد یونائیٹڈ کی جانب سے محمد وسیم 4 وکٹوں کے ساتھ سب سے کامیاب باؤلر رہے جبکہ فواد احمد اور فہیم اشرف نے دو، دو کھلاڑیوں کو آؤٹ کیا۔

    اوپنرز نے اسلام آباد کو 39 رنز کا آغاز فراہم کر کے فتح کی راہ ہموار کی، محمد اخلاق نے 26 رنز کی برق رفتار اننگز کھیلی، عمر امین توقعات پر پورا نہ اتر سکے اور محمد رضوان کے شاندرا کیچ کے نتیجے میں صرف 13 رنز بنا کر شاہنواز دھانی کی دوسری وکٹ بنے۔

    اس مرحلے پر کپتان شاداب خان کا ساتھ دینے حسین طلعت آئے اور دونوں نے مل کر اسکور کو 92 تک پہنچا دیا، شاداب 35 رنز بنانے کے بعد وکٹ گنوا بیٹھے۔

    آصف علی نے روایتی جارحانہ انداز اپنایا اور حسین طلعت کے ساتھ مل کر 41 رنز جوڑ کر اپنی ٹیم کو فتح کی دہلیز پر پہنچا دیا، انہوں نے 25 رنز بنائے جبکہ برینڈن کنگ پانچ رنز بنا سکے۔

    اننگز کے آخری اوور میں حسین طلعت کی 34 رنز کی اننگز بھی تمام ہوئی لیکن یونائیٹڈ نے اعصاب قابو میں رکھتے ہوئے دو گیندوں قبل میچ میں فتح حاصل کر لی، شاندار بولنگ کرنے پر یونائیٹڈ کے محمد وسیم کو میچ کا بہترین کھلاڑی قرار دیا گیا.

    اس کے ساتھ ہی پی ایس ایل کے چھٹے ایڈیشن کے راؤنڈ میچز کا اختتام ہوا ، ایونٹ میں یونائیٹڈ 8 فتوحات کے ساتھ 16 پوائنٹس لے کر سرفہرست جبکہ سلطانز دوسرے نمبر پر ہیں۔

  • اہم معرکے میں آج لاہور قلندرز اور ملتان سلطانز مدمقابل

    اہم معرکے میں آج لاہور قلندرز اور ملتان سلطانز مدمقابل

    ابوظبی: پاکستان سُپر لیگ میں فائنل فور تک رسائی کی جنگ جاری ہے، ایونٹ میں آج ایک اور میچ کھیلا جائے گا۔

    تفصیلات کے مطابق ابوظبی میں ملتان سلطانر اور لاہور قلندرز کے درمیان زور کا جوڑ پڑے گا، آج کا میچ لاہور کے لئے ڈو اینڈ ڈائی والی صورت حال ہے، قلندرز کا راؤنڈ مرحلےکا یہ آخری میچ ہے، آج کا میچ جیتنے کی صورت میں پی ایس ایل سیزن فائیو کی فائنلسٹ پلے آف مرحلے کے لئے کوالیفائی کرلے گی، شکست کی صورت میں فیصلہ رن ریٹ پر چلا جائے گا۔

    ملتان سلطانز کے دو گروپ میچز باقی ہے اگر آج سلطانز نےلاہور قلندرز کوہرادیا تو انہیں پلےآف میں جانےکیلئےآخری میچ میں اسلام آباد کو بھی ہرانا ہوگا۔

    ملتان سلطانز اگر لاہور قلندرز سےہارگئےتوپھر ان کیلئے اسلام آباد یونائیٹڈ سےمیچ ڈو اور ڈائی ہوجائےگا، ہیڈ ٹو ہیڈ مقابلوں میں دونوں ٹیموں نے چارچار میچ جیت رکھےہیں، میچ پاکستانی وقت کے مطابق رات نو بجے شروع ہوگا۔

  • پی ایس ایل6: ملتان سلطانز اور کوئٹہ گلیڈی ایٹرز آج اہم معرکہ میں مدمقابل

    پی ایس ایل6: ملتان سلطانز اور کوئٹہ گلیڈی ایٹرز آج اہم معرکہ میں مدمقابل

    ابوظبی: پی ایس ایل کا اہم ترین میچ آج کوئٹہ گلیڈی ایٹرز اور ملتان سلطانز کے درمیان کھیلا جائے گا۔

    تفصیلات کے مطابق کوئٹہ گلیڈی ایٹرز آج بقا کی جنگ کے لئے ملتان سلطانز سے نبردآزما ہوگی، پلے آف کی امیدوں کو زندہ رکھنے کیلئے سرفراز الیون کو آج کا میچ جیتنا لازمی ہے، شکست ہوئی تو پی ایس ایل کے بقیہ میچز ان کے لئے بے معنی ہوجائیں گے۔

    کوئٹہ گلیڈی ایٹرز پی ایس ایل میں اب تک اپنے آٹھ میچز کھیل چکی ہے، جس میں سے وہ صرف دو میں کامیاب ہوسکی ہے، پوائنٹس ٹیبل پر کوئٹہ چار پوائنٹس کے ساتھ آخری نمبر پر ہے، آج کے میچ میں کامیابی کی صورت میں اس کے چھ پوائنٹس ہوجائیں گے۔

    دوسری جانب ملتان سلطانز کیلئے آج کا میچ نہایت اہمیت کا حامل ہے، اگر سلطانزہارتے ہیں تو پلے آف تک رسائی کیلئے انہیں آخری دونوں میچ بڑے مارجن سےجیتنا ہوں گے۔

    ایونٹ میں دونوں ٹیموں کا یہ دوسرا میچ ہے، پہلے راؤنڈ میں کوئٹہ نے واحد کامیابی سلطانز کے خلاف ہی حاصل کی تھی،رات گئے کوئٹہ نے لاہور قلندرز کو 18 رنز سے ہرا کر دوسری فتح حاصل کی تھی، ہیڈ ٹوہیڈ مقابلوں میں سرفراز الیون کو برتری حاصل ہے، میچ پاکستانی وقت کے مطابق رات نو بجے شروع ہوگا۔

  • پی ایس ایل 6: وارم اپ میچ میں پشاور زلمی نے اپنے عزائم ظاہر کردئیے

    پی ایس ایل 6: وارم اپ میچ میں پشاور زلمی نے اپنے عزائم ظاہر کردئیے

    دبئی: پی ایس ایل کے بقیہ میچز سے قبل پشاور زلمی نے اپنے عزائم ظاہر کردئیے، وارم اپ میچ میں ملتان سلطانز کو ہرا دیا۔

    تفصیلات کے مطابق رات گئے پاکستان سپر لیگ (پی ایس ایل) کے چھٹے ایڈیشن کے بقیہ میچز کی تیاری کے سلسلے میں پشاور زلمی اور ملتان سلطانز کے درمیان وارم اپ میچ کھیلا گیا۔

    ابوظبی میں ہونے والے اس میچ میں ملتان سلطانز نے ٹاس جیت کر پہلے بیٹنگ کرتے ہوئے پانچ وکٹوں پر 198رنز بنائے، صہیب مقصود نے 88 اور شان مسعود نے 37 رنز کی شاندار اننگز کھیلی، جبکہ عمید آصف نے تین وکٹیں حاصل کیں۔

    جواب میں پشاور زلمی نے مذکورہ ہدف صرف تین وکٹوں کے نقصان پر ہی حاصل کرلیا، پشاور زلمی کے آل راؤنڈر شعیب ملک نے شاندار 59 رنز بناکر ٹیم کی فتح میں اہم کردار ادا کیا، حیدر علی 46 اور ڈیوڈ ملر 45 رنز بنا کر نمایاں رہے۔

  • ملتان سلطانز کی ٹیم میں 2 اہم کھلاڑیوں کی شمولیت

    ملتان سلطانز کی ٹیم میں 2 اہم کھلاڑیوں کی شمولیت

    کراچی: پاکستان سپر لیگ (پی ایس ایل) پلے آف مرحلے کے لیے ملتان سلطانز کی ٹیم میں 2 کھلاڑیوں کی شمولیت ہوئی ہے۔

    تفصیلات کے مطابق پی ایس ایل پلے آف مرحلے کے لیے ملتان سلطانز کی ٹیم میں انگلش اوپنر جو ڈینلی اور زمبابوین کھلاڑی برینڈن ٹیلر کو شامل کرلیا گیا۔

    دونوں کھلاڑیوں کو بنگلہ دیش کے آل راؤنڈر محمود اللہ اور انگلش اوپنر جیمز ونس کی جگہ شامل کیا گیا ہے۔

    واضح رہے کہ انگلش کھلاڑی جیمز ونس کورونا وائرس کا شکار ہوگئے تھے جس کے بعد انہوں نے خود کو قرنطینہ کرلیا تھا۔

    اس سے قبل ملتان سلطانز کے لیے کھیلنے والے محمود اللہ بھی کورونا کا شکار ہوگئے تھے جس کی وجہ سے پی ایس ایل پلے آف مرحلے میں شرکت نہیں کرسکیں گے۔

    یاد رہے کہ پی ایس ایل فائیو کے پلے آف مرحلے کیلئے غیر ملکی کھلاڑیوں کی پاکستان آمد کا سلسلہ جاری ہے اور کراچی کنگز کے تین غیر ملکی کھلاڑی کراچی پہنچ گئے ہیں۔

    پلے آف میچز14 اور15 نومبر کو کھیلے جائیں گے اور چیمپئن ٹیم کا فیصلہ17 نومبرکو ہو گا۔

  • پاکستان سپرلیگ فائیو : ملتان سلطانز اور پشاور زلمی آج جیت کیلئے پنجہ آزمائی کریں گے

    پاکستان سپرلیگ فائیو : ملتان سلطانز اور پشاور زلمی آج جیت کیلئے پنجہ آزمائی کریں گے

    کراچی : نیشنل اسٹیڈیم کراچی میں آج لاہور قلندرز کا ٹاکرا پشاور زلمی سے ہوگا، ایونٹ میں شامل رہنے کیلئے پشاور زلمی کیلئے جیتنا لازمی ہے، میچ شام 7 بجے شروع ہوگا۔

    تفصیلات کے مطابق پاکستان سپرلیگ میں سنسنی سے بھرپور مقابلے جاری ہیں۔ آج اہم میچ میں پشاور زلمی اور ملتان سلطانز نیشنل اسٹیڈیم کراچی میں مدمقابل آئیں گے۔

    اگلے مرحلے میں کوالیفائی کرنے کے لیے پشاور زلمی کیلئے میچ جیتنا لازمی ہے۔ شکست کی صورت میں پشاور زلمی کیلئے ٹاپ فور میں جگہ بنانا مشکل بہت ہوجائے گا۔

    ملتان سلطانز پہلے ہی پلےآف میں اپنی جگہ بناچکی ہے، میچ شائقین کے بغیر کھیلاجائے گا، یہ اہم مقابلہ آج شام سات بجے شروع ہوگا۔

    واضح رہے کہ کورونا وائرس کے خدشے کے پیش نظر پاکستان سپر لیگ کے کراچی میں ہونے والے بقیہ میچز تماشائیوں کے بغیر خالی اسٹیڈیم میں کرانے کا اعلان کیا گیا ہے جس سے پاکستان کرکٹ بورڈ کو 10 کروڑ روپے کا نقصان کا سامنا کرنا پڑے گا۔

    مزید پڑھیں : کراچی کنگز نے لاہور قلندرز کو 10 وکٹوں سے شکست دے دی

    پی ایس ایل فائیو کے26ویں میچ میں گزشتہ روز کراچی کنگز نے لاہور قلندرز کو باآسانی دس وکٹوں سے شکست دے دی، کراچی میں کھیلے جانے والے میچ میں کراچی کنگز نے لاہور قلندرز کی جانب سے دیا جانے والا 151 رنز کا ہدف 17.1 اوور میں بغیر کسی نقصان کے حاصل کرلیا۔

  • بارش نے کراچی کنگز کی محنت پر پانی پھیر دیا، سلطانز یقینی شکست سے بچ گئے

    بارش نے کراچی کنگز کی محنت پر پانی پھیر دیا، سلطانز یقینی شکست سے بچ گئے

    لاہور: کراچی کنگز اور ملتان سلطانز کا میچ بارش کی نذر ہوگیا، دونوں ٹیموں کا ایک، ایک پوائنٹ دے دیا گیا۔

     لاہور: پی ایس ایل فائیو کا 19واں میچ بارش کے باعث منسوخ کردیا گیا، ملتان سلطانز نے 6 وکٹوں کے نقصان پر 16.5 اوورز میں 102 رنز بنائے تھے، شاہدخان آفریدی 35 اور سہیل تنویر 10 رنز کے ساتھ کریز پر موجود تھے۔

    کراچی کنگز اور ملتان سلطانز کی ٹیموں کو ایک، ایک پوائنٹ دے دیا گیا۔ذیشان اشرف2، شان مسعود9، معین علی 29، روسو بغیر کوئی رن بنائے پویلین لوٹ گئے۔

    کراچی کنگز کی جانب سے عماد وسیم اور عامر یامین نے دو، دو وکٹیں حاصل کیں جبکہ عمر خان اور محمد عامر کے حصے میں ایک، ایک وکٹ آئی۔

    اس سے قبل کراچی کنگز نے ٹاس جیت کر ملتان سلطانز کو پہلے بیٹنگ کی دعوت دے دی، کراچی کنگز میں ایک تبدیلی کی گئی ہے۔

    عماد وسیم کا کہنا ہے کہ کیمرون ڈیلپورٹ کی جگہ مچل میکلینیگن ہے، ملتان سلطانز سے شکست کا بدلہ لینے کے لیے تیار ہیں۔واضح رہے کہ اس سے قبل گروپ میچ ہی ملتان سلطانز نے کراچی کنگز کو ہوم گراؤنڈ پر شکست دی تھی۔

    فائنل الیون

     

  • ملتان سلطانز نے پشاور زلمی کو 6 وکٹوں‌ سے شکست دے دی

    ملتان سلطانز نے پشاور زلمی کو 6 وکٹوں‌ سے شکست دے دی

    ملتان: پی ایس ایل فائیو کے آٹھویں میچ میں ملتان سلطانز نے پشاور زلمی کو باآسانی چھ وکٹوں سے شکست دے دی۔

    تفصیلات کے مطابق ملتان سلطانز نے پشاور زلمی کی جانب سے دیا جانے والا 124 رنز کا ہدف باآسانی 14.5 اوورز میں چار وکٹوں کے نقصان پر حاصل کرلیا۔

    ملتان سلطانز کی جانب سے روسو نے 49 اور خوشدل شاہ نے 43 رنز کی ناقابل شکست اننگز کھیلی۔

    زلمی کے وہاب ریاض نے دوکھلاڑیوں کو پویلین کی راہ دکھائی،، حسن علی اور راحت علی نے ایک، ایک وکٹ حاصل کی۔

    اس سے قبل سہیل تنویر اور الیاس کی شاندار بولنگ کی بدولت پشاور زلمی 18.3 اوورز میں صرف 123 رنز پر ڈھیر ہوگئی اور پشاور زلمی کو جیت کے لیے 124 رنز کا ہدف ملا۔

    پشاور زلمی کے صرف 3 کھلاڑی ڈبل فگر میں داخل ہوسکے، حیدر علی 47 رنز بنا کر نمایاں رہے، ڈوسن نے 22 اور کامران اکمل نے 15 رنز کی اننگز کھیلی۔

    پشاور زلمی کے کپتان ڈیرن سیمی 2 رنز بنا کر پویلین لوٹ گئے، ملتان سلطانز کی جانب سے سہیل تنویر نے چار کھلاڑیوں کو پویلین کی راہ دکھائی، محمد عرفان اور الیاس نے دو ، دو وکٹیں حاصل کیں،شاہد آفریدی اور عمران طاہر نے ایک وکٹ حاصل کی۔

    اس سے قبل ملتان سلطانز کے کپتان شان مسعود نے پشاور زلمی کے خلاف ٹاس جیت کر پہلے بولنگ کا فیصلہ کیا ہے، ملتان سلطانز پہلی بار ہوم گراؤنڈ پر میچ کھیل رہی ہے.

    میچ میں دونوں ٹیموں کی جانب سے کوئی تبدیلی نہیں کی گئی ہے اور پہلے دونوں میچز کی فائنل الیون کو کھلایا گیا ہے۔

    واضح رہے کہ ملتان سلطانز اور پشاور زلمی کی ٹیموں نے ایونٹ میں دو میچز کھیلے ہیں اور ایک ، ایک کامیابی حاصل کی ہے۔

    ملتان سلطانز اسکواڈ

    پشاور زلمی اسکواڈ

  • پی ایس ایل 4 : کراچی کنگز اور کوئٹہ گلیڈی ایٹرز آج مدمقابل ہوں گے

    پی ایس ایل 4 : کراچی کنگز اور کوئٹہ گلیڈی ایٹرز آج مدمقابل ہوں گے

    شارجہ : پاکستان سپر لیگ کے چوتھے سیزن میں آج کراچی کنگز اور کوئٹہ گلیڈی ایٹرز ایک دوسرے کے مدمقابل ہوں گے جبکہ ملتان سلطان شعیب ملک کی قیادت میں پشاور زلمی سے ٹکرائیں گے۔

    تفصیلات کے مطابق پاکستان سپر لیگ کے چوتھے سیزن میں آج 2 میچز کھیلے جائیں گے، شارجہ کے اسٹیڈیم میں پہلا میچ پشاور زلمی اور ملتان شلطان کے درمیان مقامی وقت کے مطابق ساڑھے 4 بجے کھیلا جائے گا۔

    ایونٹ کا دوسرا میچ کراچی کنگز اور کوئٹہ گلیڈی ایٹرز کے درمیان 9 بجے کھیلا جائے گا۔

    مزید پڑھیں : کوئٹہ گلیڈی ایٹرز نے سنسنی خیز مقابلے کے بعد لاہور قلندرز کو 3 وکٹوں سے شکست دے دی

    خیال رہے کہ گزشتہ روز پاکستان سپرلیگ کے بارویں میچ میں کوئٹہ گلیڈی ایٹرز نے کپتان سرفراز احمد کی ناقابل شکست نصف سنچری کی بدولت لاہور قلندرز کو 3 وکٹوں سے شکست دے دی۔

    شارجہ میں کھیلے جانے والے میچ میں لاہور قلندرز نے کوئٹہ گلیڈی ایٹرز کو جیت کے لیے 144 رنز کا ہدف دیا جسے کوئٹہ گلیڈی ایٹرز نے 7 وکٹوں کے نقصان پر حاصل کرلیا۔

    مزید پڑھیں : اسلام آباد یونائیٹڈ نے کراچی کنگز کو 7 وکٹوں سے شکست دے دی

    یاد رہے کہ گزشتہ روز پی ایس ایل کے چوتھے ایڈیشن کے 13 ویں میچ میں اسلام آباد یونائیٹڈ نے کراچی کنگز کو سات وکٹوں سے شکست دی تھی۔

    کراچی کنگز نے اسلام آباد یونائیٹڈ کو 144 رنز کا ہدف دیا، اسلام آباد یونائیٹڈ نے ہدف 16.1 اوورز میں 3 وکٹوں کے نقصان پر حاصل کرلیا، عماد وسیم نے دو وکٹیں حاصل کیں۔

  • چوتھا پی ایس ایل : پی سی بی نے ملتان سلطانز کا معاہدہ ختم کرکے معاملات سنبھال لیے

    چوتھا پی ایس ایل : پی سی بی نے ملتان سلطانز کا معاہدہ ختم کرکے معاملات سنبھال لیے

    لاہور : پی سی بی نے ملتان سلطانز کا پی ایس ایل معاہدہ ختم کردیا، پاکستان کرکٹ بورڈ چھٹی ٹیم کے انتظاماتکی نگرانی خود کرے گا، ٹیم کو چھٹی ٹیم کے نام سے پکارا جائے گا۔

    تفصیلات کے مطابق پاکستان کرکٹ بورڈ نے پاکستان سپر لیگ کی ٹیم ملتان سلطانز کا فرنچائز معاہدہ منسوخ کردیا ہے، معاہدے کی منسوخی کی وجہ فرنچائز کا رقم کی ادائیگی نہ کرنا تھا جس کے بعد ملتان سلطانز کے تمام حقوق پاکستان کرکٹ بورڈ کو واپس مل گئے ہیں۔

    پی سی بی کا کہنا ہے کہ اب کھلاڑیوں اور کوچز کی تمام تر ذمہ داری بورڈ پر ہوگی، چھٹی ٹیم کے بارے میں دیگر معلومات بعد میں فراہم کی جائیں گی۔

    اوپن بڈنگ کے ذریعے چھٹی ٹیم کو فروخت کیا جائے گا، پی ایس ایل کا چوتھا ایڈیشن چھ ٹیموں کے ساتھ ہی ہوگا، واضح رہے کہ پی ایس ایل کے چونتیس میچوں کا چوتھا ایڈیشن چودہ فروری دوہزار انیس سے شروع ہوگا۔

    واضح رہے کہ پاکستان سپر لیگ کے چوتھے ایڈیشن کے لیے ڈرافٹ کا عمل 20نومبر کو ہو گا اور اس میں پاکستان کرکٹ بورڈ ’چھٹی ٹیم کے لیے کھلاڑیوں کا انتخاب خود کرے گا۔