اسلام آباد: سپریم کورٹ نے ممتاز قادری کی سزائے موت کے خلاف اپیل کی سماعت چودہ مئی تک ملتوی کر دی ہے۔
جسٹس دوست محمد کھوسہ کی سربراہی میں دو رکنی بنچ نے کیس کی سماعت کی، ممتاز قادری کی جانب سے خواجہ شریف اور میاں نذیر اختر پیش ہوئے۔
عدالت کا کہنا تھا کہ ممتاز قادری کیس میں ریاست کی جانب سے بھی اپیل فائل کی گئی ہے جو درستگی کیلئے واپس لی گئی ہے، ریاست اور ممتاز قادری کی جانب سے فائل کی اپیلوں میں اہم قانونی نکات ہیں، اس لئے انھیں اکٹھے سنا جانا چاہیئے۔
ممتاز قادری کے وکلاء کا کہنا تھا کہ انھیں اس پر کوئی اعتراض نہیں، عدالت نے سماعت چودہ مئی تک ملتوی کر دی ہے۔
واضح رہے کہ مجرم ممتاز قادری نے 2011 میں گورنر پنجاب سلمان تاثیر کو اسلام آباد میں گولیاں مار کر قتل کر دیا تھا۔
