Tag: muree

راولپنڈی: مری جانے والے سیاحوں نے انکشاف کیا ہے کہ ہوٹل مالکان برف باری میں پھنسنے والے سیاحوں کو بے رحمی سے لوٹتے رہے، اور کمرے کا کرایہ 50 ہزار روپے تک بڑھا دیا۔

تفصیلات کے مطابق مری میں پھنسنے والے سیاحوں نے اے آر وائی نیوز سے گفتگو کرتے ہوئے کہا کہ ہوٹل مالکان نے کمرے کا کرایہ 50 ہزار تک بڑھا دیا ہے، سیاحوں سے کمرے کا کرایہ 50 ہزار لیا جاتا رہا، پیسے نہ ہونے پر ہم گاڑیوں میں پھنسے رہے۔

واضح رہے کہ مری میں شدید برف باری کے باعث ہزاروں سیاح گاڑیوں میں پھنسے ہوئے ہیں، جنھیں نکالنے کی کوششیں کی جا رہی ہیں، جب کہ 22 افراد جاں بحق ہو گئے ہیں، جی ڈی اے کے ترجمان کا کہنا ہے کہ گلیات، نتھیاگلی، ایوبیہ، چھانگلہ گلی میں 10 ہزار سے زائد سیاح اس وقت موجود ہیں، اور زیادہ تر فیملیز ہیں، مری روڈ کھلنے کے بعد ہی یہ سیاح ہوٹلز سے نکل سکیں گے۔

حویلی لکھا کی بھی ایک فیملی مری میں پھنس گئی ہے، 7 افراد پر مشتمل فیملی کلڈانہ چوک واپڈا ریسٹ ہاؤس میں موجود ہے، شہری فرقان نے بتایا کہ ہوٹل انتظامیہ نے فیملی کو ہوٹل چھوڑنے کا حکم دے دیا ہے، اور انتظامیہ رابطے کے باوجود مدد نہیں کر رہی، میری فیملی کے علاوہ مزید 3 فیملیز بھی ہیں، متاثرین کی تعداد 25 کے قریب ہے، ہمیں ریسکیو کیا جائے۔

پاک فضائیہ کا سیاحوں کو نکالنے کیلئے ہیلی کاپٹر آپریشن شروع کرنے کا فیصلہ

مری میں برف باری میں جاں بحق 2 افراد کوٹ لکھپت کے رہائشی تھے، 31 سال کے معروف اور 40 سال کے ظفر جمعرات کو مری گئے تھے، اہل خانہ کا کہنا ہے کہ ان سے رات 12 بجے سے رابطہ منقطع تھا، صبح کال کی جو ریسکیو اہل کار نے اٹھائی اور اموات سے آگاہ کیا۔

مری برفباری میں جاں بحق ہونے والا محمد اشفاق کامونکی کا رہائشی تھا، اشفاق اور اس کے ساتھیوں کی آخری ویڈیو بھی منظر عام پر آ گئی ہے، متوفی اشفاق کامونکی نئی آبادی میں رہائش پذیر تھا، اشفاق اور اس کے لاہور کے رہائشی 2 دوست اکٹھے مری گئے تھے۔

مری کے کشمیر پوائنٹ پر نارووال کی فیملی پھنس گئی

ادھر ترجمان پنجاب پولیس نے کہا ہے کہ مری کی 90 فی صد سڑکیں کلیئر کرا لی گئی ہیں، گاڑیوں میں سے بچوں اور فیملیز کو نکال لیا گیا ہے، جنھیں سرکاری گیسٹ ہاؤس اور محفوظ مقامات پر منتقل کر دیا گیا ہے، شہریوں کو خوراک، ادویات، گرم کپڑے فراہم کیے جا رہے ہیں۔

ترجمان پولیس کے مطابق مری میں ایک لاکھ 57 ہزار 665 گاڑیاں داخل ہوئیں، جب کہ کل شام تک مری سے ایک لاکھ 23 ہزار 920 گاڑیاں باہر گئیں، اور کل تک مری میں 33 ہزار 745 گاڑیاں موجود تھیں، مری میں اس وقت سیاحوں کی خالی گاڑیاں برف میں پھنسی ہیں، ایکسپریس ہائی وے مکمل طور پر کلیئر ہے، پرانا جی ٹی روڈ پر ٹریفک آہستہ آہستہ چل رہی ہے، کلڈنہ سے باڑیاں تک روڈ سے برف ہٹانے کا سلسلہ جاری ہے۔

لاہور: مری میں شدید برف باری کے باعث سانحہ رونما ہونے پر وزیر اعلیٰ پنجاب عثمان بزدار انتظامیہ اور پولیس پر شدید برہم ہو گئے۔

اے آر وائی نیوز کے مطابق وزیر اعلیٰ پنجاب کی زیر صدارت مری سے متعلق ہنگامی اجلاس کی اندرونی کہانی سامنے آ گئی ہے، ذرائع کا کہنا ہے کہ اجلاس میں عثمان بزدار نے راولپنڈی انتظامیہ اور پولیس پر اظہار برہمی کیا۔

ذرائع کے مطابق عثمان بزدار نے چیف سیکریٹری اور آئی جی پنجاب پر بھی برہمی کا اظہار کیا، اور کہا کہ محکمہ موسمیات کی وارننگ کے باوجود انتظامیہ اور پولیس نے کچھ نہ کیا، راولپنڈی انتظامیہ اور پولیس نے انتظامات کیوں نہ کیے۔

وزیر اعلیٰ آفس کے ذرائع نے بتایا کہ عثمان بزدار نے استفسار کیا کہ سیاحوں کی تعداد بڑھنے پر گاڑیاں روکی کیوں نہیں گئیں، ابتدائی رپورٹ کے مطابق سردی، طوفان، اور راستے بند ہونے سے اموات ہوئیں۔

اجلاس میں وزیر اعلیٰ عثمان بزدار نے معاملے کی انکوائری کے احکامات صادر کیے، اور غفلت برتنے والوں کے خلاف کارروائی کا حکم دے دیا۔

مری میں سانحہ، وزیر اعلیٰ پنجاب پارٹی کی تنظیم سازی میں مصروف رہے

واضح رہے کہ ملک کے اہم ترین سیاحتی مقام مری میں جب شدید سرد موسم اور برف باری کی وجہ بڑا سانحہ پیش آیا، وہاں وزیر اعلیٰ پنجاب پارٹی کے لیے تنظیم سازی میں مصروف تھے، اس حوالے سے ان پر شدید تنقید کی جا رہی ہے۔

واضح رہے کہ مری میں شدید برفباری کے باعث 22 افراد جاں بحق ہو گئے ہیں، جو اپنی نوعیت کا ایک بڑا اور سنگین واقعہ ہے، جس میں 2 خواتین اور 8 بچے بھی شامل ہیں۔

اسلام آباد: وزیر اطلاعات فواد چوہدری نے سانحہ مری کے حوالے سے کہا ہے کہ سیاحت کا مطلب یہ نہیں ہے کہ 48 گھنٹے میں لاکھوں لوگ آ جائیں۔

آج اسلام آباد میں پریس کانفرنس کے دوران وفاقی وزیر اطلاعات نے مری میں برفباری میں پھنس کر 22 افراد کی ہلاکت کے سانحے پر کہا کہ انتظامیہ ایک ہفتے سے درخواست کر رہی تھی مری نہ جائیں، لیکن برف باری کے دوران لاکھوں کی تعداد میں لوگ چلے آئے۔

فواد چوہدری کا کہنا تھا مری میں 48 گھنٹے تک مسلسل اور غیر معمولی برف باری ہوئی ہے، فوجی دستے کام کر رہے ہیں، ایف ڈبلیو او کی مشنری بھی پہنچ گئی ہے۔

مری میں سانحہ، وزیر اعلیٰ پنجاب پارٹی کی تنظیم سازی میں مصروف رہے

انھوں نے کہا سیاحت کا مطلب یہ نہیں کہ 48 گھنٹے میں لاکھوں لوگ آ جائیں، جتنا بھی بہتر مینج کریں اتنی زیادہ تعداد میں لوگ آئیں گے تو مشکل ہوگی، سسٹم کام کرنا چھوڑے گا ہی۔

مری میں شدید برفباری سے 21 سیاحوں کے جاں بحق ہونے کی تصدیق

وزیر اطلاعات نے ایک صحافی کے سوال کے جواب میں کہا مری میں گاڑیاں ہفتوں، مہینوں نہیں بلکہ صرف 24 گھنٹے میں داخل ہوئیں، اس سانحے سے ہمیں سیکھنا چاہیے، سانحے سے سیکھ کر اگلی مینجمنٹ کی ضرورت ہے۔

فواد چوہدری نے کہا بدقسمتی سے اس سانحے پر بھی اپوزیشن سیاست کر رہی ہے، شاہد خاقان عباسی کو اس وقت اپنے حلقے میں ہونا چاہیے تھا۔