کراچی : سندھ کے مشیراطلاعات مرتضیٰ وہاب نے کہا ہے کہ تجاوزات کے خلاف آپریشن پر سب کھڑے ہوجاتے ہیں لیکن کراچی کے عوام کو ریلیف دینے کیلئے کوئی سامنے نہیں آتا۔
ان خیالات کا اظہار انہوں نے کراچی میں میڈیا سے گفتگو کرتے ہوئے کیا، مرتضیٰ وہاب کا کہنا تھا کہ تجاوزات کے خلاف آپریشن کا ملبہ بھی سندھ حکومت نے اٹھایا ہے، کیونکہ ملبہ اٹھانے کیلئے کے ایم سی کے پاس پیسے نہیں تھے۔
کراچی والوں کیلئے صرف پیپلزپارٹی نے اقدامات کیے، ووٹ لینے کی تو بات سب کرتے ہیں لیکن مسائل پر سامنے کوئی نہیں آتا۔
ایک سوال کے جواب میں ان کا کہنا تھا کہ غیرقانونی معاملات کو سپورٹ نہیں کریں گے ،سارے پلاٹ غیرقانونی نہیں، مشرف دور میں رہائشی عمارتوں اور کئی سڑکوں کو کمرشل کیا گیا تھا، سپریم کورٹ کو بتائیں گے عمارتوں کے کمرشل کرنے کا کیاطریقہ کار رہا۔
سٹی کونسل سے منظورشدہ فیصلے کو عدالت میں چیلنج کیا گیا تھا، عدالت نے ان درخواستوں کو نمٹا کرشہری حکومت کے حق میں فیصلہ دیا۔
مرتضیٰ وہاب نے کہا کہ کراچی والے پریشان ہیں، اس مسئلے پر سیاست نہ کی جائے، سیاست کے بجائے عوام کے مسائل پرتوجہ دینی ہوگی، شہریوں نے اربوں روپے خرچ کرکے کاروبارشروع کیا اور چھت حاصل کی، سیاسی پوائنٹ اسکورنگ کے بجائے سب کو مل بیٹھنا چاہیے۔
