اسلام آباد : حریت رہنما یاسین ملک کی اہلیہ مشعال ملک کا کہنا ہے کہ بھارت میں جانوروں کے بھی حقوق بارے قوانین موجود ہیں لیکن کشمیریوں کے ساتھ جانوروں سے بھی بد تر سلوک کیا جا رہا ہے۔
تفیصلات کے مطابق کشمیریوں کے ساتھ اظہار یکجہتی کے لئے مشعال ملک اور اقلیتی رہنما جے سالک نے نیشنل پریس کلب کے باہر ایک روزہ علامتی دھرنا دیا ، جے سالک نے سر پر مٹی ڈال کر منفرد احتجاج کیا۔
حریت رہنما یاسین ملک کی اہلیہ مشعال ملک نے میڈیا سے گفتگو کرتے ہوئے کہا ہے کہ اکیسویں صدی میں بھی کشمیریوں پر مظالم ڈھائے جا رہے تھے، بھارت میں جانوروں کے بھی حقوق بارے قوانین موجود ہیں لیکن کشمیر یوں کے ساتھ جانوروں سے بھی بد تر سلوک کیا جا رہا ہے۔
مشعال ملک نے کہا کہ کشمیریوں کو علاج کروانے، کھانے پینے اور سوگ تک کرنے کا حق حاصل نہیں ہیں۔
ان کا کہنا تھا کہ صبح گیارہ تا پانچ بجے شام تک علامتی دھرنا دیں گے۔
مشعال ملک نے کہا کہ یاسین ملک سمیت حریت قائدین کو غیر قانونی طور پر جیلوں میں ڈالا گیا ہے، یاسین ملک کی صحت انتہائی خراب ہے، بھارت کشمیریوں پر بے پناہ مظالم ڈھا رہا ہے۔
انھوں نے عالمی برادری سے سواک کیا کہ اخر کب تک عالمی برادری بھارتی مظالم پر چپ رہے گی۔
مزید پڑھیں : جموریت کا نام نہاد دعویدار بھارت دنیا کا سب سے بڑا دہشتگرد ہے، مشعال ملک
یاد رہے کہ چند روز قبل یوم شہدائے جموں و کشمیر کے موقع پر نیشنل پریس کلب اسلام آباد کے باہر پر احتجاجی مظاہرہ کیا گیا تھا، جس میں مشعال ملک کا کہنا تھا کہ جموریت کا نام نہاد دعویدار بھارت دنیا کا سب سے بڑا دہشتگرد ہے، جبکہ مظالم پر چپ سادھی عالمی برادری برابر کی مجرم ہے۔
مشعال ملک کا کہنا تھا کہ گذشتہ چار ماہ سے مقبوضہ کشمیر میں بدترین مظالم کا سلسلہ جاری ہے، اسکول جلانے سمیت ہسپتالوں پر حملے کئے جا رہے ہیں جبکہ حریت قائدین کو قید رکھا گیا ہے۔
