ریاض: سعودی حکومت نے روشن خیالی میں ایک اور قدم آگے بڑھاتے ہوئے سرکاری چینل پر میوزک کنسرٹ نشر کردیا۔
تفصیلات کے مطابق سعودی ولی عہد کی جانب سے خواتین کو گاڑی چلانے کی اجازت دینے، تعلیمی اداروں میں طالبات کو موبائل فون استعمال کی اجازت اور دسمبر سے قبل سنیما گھر کھولنے کا عندیہ دینے کے بعد اب حکومت نے سرکاری ٹی وی پر عرب لیجنڈ گلوکارہ ام کلثوم کا کنسرٹ نشر کردیا۔
بی بی سی کے مطابق سعودی ولی عہد نے ویژن 2030 کے منصوبے کے تحت خواتین کو معاشرے میں اہم کردار دینے کا فیصلہ کیا ہے جس کے تحت انہیں گاڑی چلانے کی اجازت دی گئی ہے۔
سعودی سرکاری چینل الثقافیہ نے میوزیکل کنسرٹ کو سماجی رابطے کی ویب سائٹ پر شیئر کیا جس پر اب تک سیکڑوں لوگ اپنے ردعمل کا اظہار کرچکے ہیں۔
کچھ لوگوں نے اس اقدام کو سراہا تاہم زیادہ تر افراد نے قرآنی آیات کا حوالہ دے دے کر اس عمل کو انتہائی بڑا گناہ اور قرب قیامت کی نشانیوں میں سے ایک نشانی قرار دیا۔
بعض لوگوں نے کہا کہ حجاز مقدس کی زمین پر موسیقی کی اجازت دینا انتہائی لغو اور بے ہودہ عمل ہے جس کی سرے سے کوئی اجازت نہیں ہونی چاہیے۔
نعرض لكم اليوم عند 12:00صباحاً #السهرة_الفنية لسيدة الغناء العربي #أم_كلثوم تابعونا…#كلثوميات#الثقافية pic.twitter.com/EUGWhjl6vZ
— القناة الثقافية (@Thaqafiya) October 2, 2017
واضح رہے کہ کچھ روز قبل سعودی ولی عہد نے خواتین کو گاڑی چلانے کی اجازت دینے کا حکم نامہ جاری کیا تھا جس کے بعد دنیا بھر میں سعودی حکومت کے اس اقدام کو سراہا گیا تھا۔
اطلاعات ہیں کہ سعودی حکومت سینما گھروں کی بندش پر سے بھی پابندی اٹھانے کا ارادہ رکھتی ہے۔
