کراچی : مصطفی عامر قتل کیس کے ملزم ارمغان کے والد کامران قریشی کے اسلحے سے متعلق تفتیشی رپورٹ پولیس نے عدالت میں جمع کرادی۔
انسداد دہشت گردی کی عدالت میں پیش کی گئی پولیس رپورٹ میں بتایا گیا ہے کہ ملزم ارمغان کے گھر سے برآمد ہونے والا اسنائپر سمیت جدید اسلحہ پشاور سے منگوایا گیا تھا۔
پولیس رپورٹ کے مطابق جدید اسلحہ ارمغان کے والد نے پشاور سے خریدا تھا، ملزم ارمغان قتل، اغوا برائے تاوان و دیگر مقدمات میں جوڈیشل کسٹڈی میں جیل میں ہے۔
مرکزی ملزم کا والد بھی منشیات، اسلحہ کیس میں جوڈیشل کسٹڈی میں ملیر جیل میں ہے، اس سے اسنائپر، رائفل سمیت بھاری مقدار میں گولیاں برآمد کی گئی تھیں۔
اس کے فون سے اسلحہ خریدنے، چیک کرنے کی ویڈیوز ملی ہیں، ملزم ویڈیو کال کے ذریعے اپنے بیٹے کو بھی اسلحہ دکھاتا رہا۔
ملزم کو اس مقدمہ میں اسلحہ ایکٹ کی دفعہ کا اضافہ کرتے ہوئے نامزد کیا گیا ہے، جوڈیشل مجسٹریٹ جنوبی کی عدالت سے بھی ملزم کی تفتیش کیلئے این او سی حاصل کی گئی۔
پولیس نے عدالت سے استدعا کی کہ مرکزی ملزم کا والد سے تفتیش کرنی ہے کہ اسلحہ کس سے خریدا ہے اور کس کے ذریعے سے کے پی سے کراچی منتقل کیا، ملزم کو ملیر جیل سے لینے کی اجازت دی جائے۔
یاد رہے کہ گزشتہ روز مصطفیٰ عامر قتل کیس کے مرکزی ملزم ارمغان کے والد کامران قریشی کو پولیس مقابلے اور غیر قانونی اسلحہ کیس میں نامزد کیا گیا تھا۔
تفتیشی افسر نے عدالت کو بتایا کہ ملزم ارمغان عرف آرمی پہلے ہی اس مقدمے میں گرفتار ہے، ملزم اسلحہ پشاور سے خرید کے سندھ لایا۔
