لندن: پاکستان کی دو سیاسی جماعتیں مسلم لیگ ن اور تحریک انصاف لندن میں ایک دوسرے کیخلاف صف آراء ہیں۔ پاکستان تحریک انصاف نے وزیراعظم نواز شریف کے گھر واقع پارک لین کے باہر احتجاجی مظاہرہ کیا۔ ن لیگ نے بھی جواباً کپتان کی سابق اہلیہ کے گھر کے باہر مظاہرے کا اعلان کردیا۔
تفصیلات کے مطابق تحریک انصاف نے وزیر اعظم نواز شریف کے صاحبزادے حسین نواز کی رہائش گاہ کے باہر احتجاجی مظاہرہ کیا۔ مظاہرے میں کارکنان کی بڑی تعداد نے شرکت کی۔
اس موقع پر مظاہرین نے وزیر اعظم نواز شریف کیخلاف اور پاناما لیکس میں نام آنے پر حسین نواز کیخلاف شدید نعرے بازی کرتے ہوئے گو نواز گو کے نعرے لگائے۔
تحریک انصاف کے کارکنان نے مطالبہ کیا کہ وزیراعظم نواز شریف کا احتساب کیا جائے۔ کارکنان نے اہنے ہاتھوں میں پلے کارڈز اٹھارکھے تھے، جن پر مختلف نعرے درج تھے۔ پی ٹی آئی برطانیہ کے عہدیداران نے کہا کہ یہ مظاہرہ وزیراعظم پاکستان میاں محمد نواز شریف کے پانامہ لیکس میں نام آنے اورغیرقانونی طور پر بنائے گئے اثاثوں کے خلاف کیا جارہاہے۔
دوسری جانب مسلم لیگ ن لندن کے صدر زبیر گُل نے سنیئر نائب صدر ناصر بٹ کے ہمراہ پریس کانفرنس کرتے ہوئے اعلان کیا ہے کہ لندن وقت کے مطابق شام 7 بجے مسلم لیگ کے کارکنان جمائما گولڈ اسمتھ کی رہائش گاہ رچمنڈ پارک کے باہر مظاہرہ کریں گے۔
انہوں نے مزید کہا کہ جب تحریک انصاف کی جانب سے وزیراعظم نوازشریف باہر کے خلاف لندن میں مظاہرہ کیا جائے گا تو مسلم لیگ ن کے کارکنان بھی جواباً عمران خان کی سابقہ بیوی اوران کے بچوں کی رہائش گاہ کے باہر مظاہرہ کریں گے۔
اس موقع پر مسلم لیگ کے سنیئر نائب صدر ناصر بٹ نے بتایا کہ جمائما گولڈ اسمتھ کی رہائش گاہ کے باہر اُس وقت تک مظاہرے جاری رہیں گے جب تک عمران خان کی سابقہ اہلیہ اُن سے مکمل رابطے ختم کرنے کا اعلان نہیں کردیتیں۔
