لاہور: الیکشن ٹریبونل نےحلقہ این اے ایک سو بائیس مبینہ دھاندلی کیس کی سماعت سولہ اپریل تک ملتوی کردی جبکہ حلقہ این اے ایک سو پچیس مبینہ دھاندلی کیس میں پی ٹی آئی کی جانب سے دائر تین درخواستیں مسترد کردیں۔
لاہور الیکشن ٹریبونل میں اسپیکر قومی اسمبلی ایاز صادق کے حلقے این اے ایک سو بائیس میں مبینہ دھاندلی کیس کی سماعت ہوئی، سماعت میں نادرا نے حلقے میں ووٹوں کی گنتی کی رپورٹ جمع نہیں کرائی ، جس پر عدالت نے کیس کی سماعت سولہ اپریل تک ملتوی کردی۔
الیکشن ٹریبونل نے عمران خان کی درخواست پر این اے ایک سو بائیس کے ووٹوں کی نادرا سے تصدیق کا حکم دیا تھا۔
دوسری جانب لاہور کے الیکشن ٹریبونل نے حلقہ این اے ایک سو پچیس مبینہ دھاندلی کیس میں پی ٹی آئی کی جانب سے دائر تین درخواستیں مسترد کردیں۔
تحریکِ انصاف کےامیدوار حامد خان نے کہا کہ چھبیس پولنگ اسٹیشنز میں بڑے پیمانے پر دھاندلی ہوئی، خواجہ سعد رفیق نے درخواستوں کی مخالفت کی ۔
خواجہ سعد رفیق کے وکیل کا کہنا تھا کہ ان درخواستوں کو منظور کرنے سے کیس کے فیصلے میں بلا وجہ تاخیر ہوگی، ٹریبونل نے وکلاء کے دلائل مکمل ہونے کے بعد تینوں درخواستیں مسترد کردیں۔
