لاہور کی احتساب عدالت نے آمدن سے زائد اثاثے کیس میں سابق وزیراعلیٰ سردار عثمان بزدار کو گرفتار کرنے سے روک دیا،30نومبر تک عبوری ضمانت منظور کرلی گئی۔
تفصیلات کے مطابق احتساب عدالت کے جج ذوالقرنین اعوان نے سابق وزیر اعلیٰ پنجاب عثمان بزدار کی عبوری ضمانت پر سماعت کی۔
درخواست گزار کی جانب سے مومن ملک ایڈووکیٹ پیش ہوئے اور مؤقف اختیار کیا کہ نیب نے سیاسی بنیادوں پر میرے مؤکل عثمان بزدار کے خلاف آمدن سے زائد اثاثوں کی تحقیقات شروع کر رکھی ہیں۔
وکیل کا کہنا تھا کہ ہمیں ڈر ہے کہ انہیں نیب گرفتار کرلے گا لہٰذا عدالت سے استدعا ہے کہ میرے مؤکل کی عبوری ضمانت منظور کی جائے۔
عدالت نے فریقین کے دلائل مکمل ہونے پر سابق وزیراعلیٰ کی 30نومبر تک عبوری ضمانت منظور کرتے ہوئے نیب کو انہیں گرفتار کرنے سے روک دیا۔
واضح رہے کہ اس سے قبل سردار عثمان بزدار نے شراب لائسنس کیس میں احتساب عدالت سے ضمانت حاصل کر رکھی ہے۔
