کراچی : وزیر اعظم کے معاون خصوصی زلفی بخاری کا کہنا ہے کہ ان کے خلاف نیب کی انکوائری آف شور سے متعلق تھی کرپشن سے متعلق نہیں، ، میرانام گوگل کریں میری تمام کمپنیوں سامنے آجائیں گی، میراموازنہ حسن اورحسین نوازکےساتھ نہیں کیاجاسکتا۔
تفصیلات کے مطابق وزیر اعظم کے معاون خصوصی زلفی بخاری نے آر وائی نیوز کے پروگرام الیونتھ آور میں گفتگو کرتےہوئے کہا جیل میں کوئی بھی مجرم ہو حکومت سب کی صحت دیکھتی ہے، نوازشریف کے ماضی میں جھوٹ سے شاید فردوس عاشق نے یقین نہ کیا ہو، نوازشریف کی طبیعت سےمتعلق ہم سب دعاگو ہیں۔
وزیر اعظم کے معاون خصوصی کا کہنا تھا میں ہرقسم کےعلاج کی سہولت موجودہے، نوازشریف پہلے رہا ہوئے تھے تو بیرون ملک سے ڈاکٹرز طلب کر سکتے تھے، کیونکہ ان کی ضد ہے بیرون ملک کے ڈاکٹرز بیرون ملک ہی دیکھیں گے۔
زلفی بخاری نے کہا کہ پی ٹی آئی نے دھرنا 4 حلقے کھولنے کے لیے دیا تھا، جے یو آئی ف کے مارچ کے بیانیے کا انہیں خود بھی نہیں پتہ، مولانا فضل الرحمان اسمبلی میں نہیں اسی لیے انہیں تکلیف ہے اور مارچ کررہے ہیں، پہلے ہی مسلح جتھہ بنایا جارہا ہو تو احتجاج کے مقصد کا پتہ چل جاتا ہے، فضل الرحمان پرامن احتجاج کی گارنٹی دیں تو بے شک احتجاج کریں۔
ان کا کہنا تھا کہ وزیراعظم عمران خان سے پہلے تعلق دوستی،پھرچیریٹی اورپھرسیاسی ہے، میری پوری فیملی نےعمران خان کےساتھ وقت گزارا ہے، 2011میں پی ٹی آئی کو فیملی کی طرح جوائن کیا، کوئی ٹاسک نہیں تھا جو عمران خان نے دیا ہو اور میں نے پورا نہ کیا ہو۔
معاون خصوصی نے کہا 2018 کے الیکشن میں این اے 53 کی انتخابی مہم میرے ذمے تھی، این اے53 میں عمران خان نے شاہد خاقان کو 50 ہزار ووٹوں سے ہرایا۔
زلفی بخاری کا کہنا تھا کہ دنیا ایک گلوبل ولیج بن گئی ہے، انفارمیشن دینے کے باؤنڈ نہیں ہوتے، دہری شہریت کا یہ مطلب نہیں کہ ایک ملک کی انفارمیشن دوسرے کو دیں، سمری دی ہے دہری شہریت والے کو الیکشن لڑنے کا حق دینا چاہیے، اس معاملے پر بحث ابھی جاری ہے۔
انھوں نے مزید کہا کہ آف شورکمپنی کوڈیکلیئرکریں توکہاں سےکرپشن ہوگئی، وزیراعظم آف شورکمپنی چھپاکررکھیں تویہ واضح قانون شکنی ہے، آف شور کمپنی پرعمران خان کابیان پاکستانی سیاسی تناظرمیں تھا۔
وزیر اعظم کے معاون خصوصی کا کہنا تھا کہ نیب پراسیکیوٹرسےعدالت کےباہرکوئی تلخ کلامی نہیں ہوئی تھی، نیب کی میرےخلاف ایک سادہ سی انکوائری تھی، انکوائری آف شورسےمتعلق تھی کرپشن سے متعلق نہیں، انکوائری میں پیش نہ ہونا یہ سراسرغلط ہے،9،10مرتبہ پیش ہوا اور نیب کیساتھ تمام تفصیلات شیئرکی ہیں۔
زلفی بخاری نے کہا کہ آف شورکمپنی کی منی ٹریل سمیت تمام ریکارڈ نیب کوفراہم کیا ہے، ایک شومیں بھی اس قسم کے الزامات لگے، جسے پیمرا نےنوٹس دیا، مارٹن کیمپ نامی کمپنی کامالک ہوں اورہرجگہ بتاچکاہوں اور یہ کمپنی آف شورکمپنی نہیں، یورپ میں رجسٹرڈہے، نیب کی انکوائری مارٹن کیمپ نامی کمپنی کےخلاف نہیں تھی، پروگرام میں ایک لاکھ پاؤنڈ کی جگہ ایک کروڑپاؤنڈ بتائےگئے۔
ان کا مزید کہنا تھا کہ حسین حقانی بیرون ملک پاکستان کے خلاف سازشیں کرتا ہے، موجودہ معاون خصوصی کوحسین حقانی سے ملانے کی کوشش کی گئی، میرا نام گوگل کریں میری تمام کمپنیوں سامنے آجائیں گی۔
معاون خصوصی نے کہا کہ عمران خان اس وقت پاکستان کےلیےبہت محنت کررہےہیں، ایک پروگرام پربیٹھ کرمیرےخلاف بےبنیادپروپیگنڈاکیاگیا، پروگرام کے دونوں ہوسٹ کسی اورملک میں ہوتے تو جھوٹ بولنے پر جیل میں ہوتے، یہ نہیں ہوسکتا کہ خورشید شاہ پکڑے گئے تو زلفی بخاری کوبھی پکڑیں۔
زلفی بخاری کا کہنا تھا کہ نیب نےمجھے2ماہ پہلے بلایا تھا، افسوس ہےمیراموازنہ کرپٹ سیاستدانوں سےکیاجارہاہے ، نیب کی پہلی انکوائری کےوقت پاکستان میں نہیں رہتاتھا، میرے وکلا نے نیب خطوط لکھے کہ معاملہ کیاہے، میراموازنہ حسن اورحسین نوازکےساتھ نہیں کیاجاسکتا، میرا موازنہ ان سے کیا جارہا ہے ، جن کے والد وزیراعظم تھے۔
انھوں نے کہا کہ حسین نواز نے جو جائیداد بنائی اسے وہ ثابت نہیں کرسکے، میں اپنی جائیدادوں سے متعلق سب کچھ ثابت کرچکا ہوں۔
