ARYNews.tv | Urdu – Har Lamha Bakhabar

Tag: Nab lahore

  • نیب لاہور نے والٹن ایئرپورٹ سے متعلق تحقیقات شروع کر دی

    نیب لاہور نے والٹن ایئرپورٹ سے متعلق تحقیقات شروع کر دی

    کراچی: سابق ڈی جی سول ایوی ایشن اتھارٹی خاقان مرتضٰی والٹن ایئرپورٹ لاہور کو بند کر کے کمرشل بنیاد پر زمین دینے کے معاملے میں نیب کے ریڈار پر آ گئے۔

    ذرائع کا کہنا ہے کہ نیب لاہور نے والٹن ایئرپورٹ سے متعلق تحقیقات شروع کر دی ہے، نیب نے تحقیقات میں سابق ڈی جی خاقان مرتضٰی سمیت دیگر سول ایوی ایشن افسران کو شامل کیا ہے۔

    نیب نے خاقان مرتضٰی سے تحقیقات کے لیے 13 سوالات تیار کر لیے، جن میں والٹن ایئرپورٹ لاہور کو بند کر کے کمرشل بنیاد پر دینے کے حوالے سے پوچھا گیا ہے، نیب نے پوچھا ہے کہ والٹن ایئرپورٹ کو بند کرنے کی کیا وجہ تھی؟

    نیب لاہور نے تحقیقات کے لیے ایئر کرافٹ اونرز اینڈ آپریٹرز ایسوسی ایشن سے مدد کے لیے بھی رابطہ کر لیا، نیب حکام نے کہا کہ والٹن ایئرپورٹ لاہور کے حوالے سے نیب تحقیقات کر رہا ہے، اس تحقیقات میں مدد کی جائے۔

    نیب لاہور نے 13 سوالات پر مشتمل سوال نامہ ایئر کرافٹس اونرز اینڈ آپریٹرز ایسوسی ایشن کو بھی بھیج دیا ہے۔

  • اسحاق ڈار کے گلبرگ بنگلے کی فروخت کے لیے نیب کا اہم قدم

    اسحاق ڈار کے گلبرگ بنگلے کی فروخت کے لیے نیب کا اہم قدم

    لاہور: اسحاق ڈار کے گلبرگ بنگلے کی فروخت کے لیے نیب لاہور نے اہم قدم اٹھا لیا۔

    اے آر وائی نیوز کے مطابق نیب لاہور نے اسحاق ڈار کے گلبرگ بنگلے کی فوری فروخت کے لیے کمشنر کو مراسلہ لکھ دیا ہے، جس میں بنگلے کی فروخت کے لیے ڈی سی لاہور کو سرکاری سطح پر ہدایات جاری کی گئی ہیں۔

    بنگلے کی کل مالیت 250 ملین تک شمار کی جا رہی ہے، اثاثہ جات کیس میں نیب لاہور کی جانب سے اسحاق ڈار کے خلاف یہ دوسری بڑی ریکوری ہوگی۔

    نیب لاہور اس سے قبل اسحاق ڈار کے اکاؤنٹ سے 50 کروڑ ریکور کرا کر قومی خزانےمیں جمع کرا چکا ہے۔

    اسحاق ڈار کی سینیٹ کی نشست، حکومت کا بڑا قدم

    خیال رہے کہ اسحاق ڈار کو کرپشن ریفرنس میں عدم پیروی پر دسمبر 2017 میں مفرور قرار دیا جا چکا ہے، ریفرنس میں ظاہر جائیدادیں بحق سرکار ضبط کرنے کے احکامات جاری کیے گئے تھے۔

    ملزم کی اہلیہ نے 2020 میں بنگلے کی فروخت پر اسلام آباد ہائیکورٹ میں درخواست دی تھی، لیکن رِٹ کی تنسیخ کے بعد اب نیب کی جانب سے یہ اہم پیش رفت سامنے آئی ہے۔

  • نیب کا چوہدری پرویزالٰہی پر اختیارات سے تجاوز کرنے کا الزام

    نیب کا چوہدری پرویزالٰہی پر اختیارات سے تجاوز کرنے کا الزام

    لاہور : قومی احتساب بیورو ( نیب ) نے اسپیکر پنجاب اسمبلی چوہدری پرویزالٰہی پراختیارات سے تجاوزکرنے کا الزام عائد کرتے ہوئے کہا ہے کہ انہوں نے نئی تقرریوں پرپابندی کےباوجود 29 افراد کو بھرتی کرایا۔

    تفصیلات کے مطابق اسپیکر پنجاب اسمبلی چوہدری پرویز الٰہی کی مشکلات میں مزید اضافہ ہوگیا ، نیب لاہور نے چوہدری پرویز الٰہی کے خلاف اختیارات سے تجاوز کرنے کے کیس میں جواب جمع کرا دیا۔

    نیب لاہور نے 9 صفحات پر مشتمل تفصیلی جواب لاہور ہائی کورٹ میں جمع کرایا، جس میں کہا گیا کہ چوہدری پرویز الٰہی اختیارات کا ناجائز استعمال کر کے کرپشن اور کرپٹ پریکٹسز کے مرتکب ہوئے، چوہدری پرویز الٰہی 1988 سے 1993 کے درمیان دو بار وزیر لوکل گورنمنٹ رہے۔ انہوں نے بطور وزیر لوکل گورنمنٹ اختیارات کا ناجائز استعمال کر کے 29 افراد کو بھرتی کرایا۔

    نیب رپورٹ کے مطابق چوہدری پرویز الٰہی نے اپنے سرکاری لیٹر پیڈ کے ذریعے سیکرٹری لوکل گورنمنٹ کو مخلتف افراد بھرتی کرنے کا بھی حکم دیا جبکہ اختیارات کا غلط استعمال کرتے ہوئے گریڈ 16 اور گریڈ 17 میں اکاؤنٹس آفیسرز اور چیف آفیسرز بھرتی کرائے۔

    رپورٹ میں کہا گیا کہ پرویزالٰہی نے شریک ملزمان جاوید قریشی اور ڈاکٹر مشیر احمد سے مل کر غیر قانونی بھرتیاں کیں جبکہ دونوں شریک ملزمان وفات پا چکے ہیں، چوہدری پرویز الٰہی اور شریک ملزمان نے من پسند بھرتیوں کے لیے مقررہ عمر میں رعایت کے لیے بورڈ سے اجازت نہیں لی تھی اور نئی تقرریوں پر پابندی کے باوجود 29 افراد کو بھرتی کروایا۔

    نیب کا کہنا ہے کہ چوہدری پرویز الٰہی کے خلاف اختیارات کے ناجائز استعمال کی انوسٹی گیشن مکمل کر لی گئی ہے اور ریفرنس حتمی منظوری کے لیے چیئرمین نیب کو ارسال کر دیا گیا ہے۔ نیب کے پاس چوہدری پرویز الٰہی کے خلاف کیس ثابت کرنے کے لیے شواہد موجود ہیں۔ نیب نے تمام قانونی تقاضے پورے کرنے کے بعد چوہدری پرویز الٰہی کے خلاف تحقیقات کی ہیں۔

    نیب نے استدعا کی ہے کہ ہائیکورٹ چوہدری پرویز الٰہی کی درخواست خارج کرے۔

  • کینٹ ویوہاؤسنگ سوسائٹی سیالکوٹ کیس، خواجہ آصف کی کل نیب میں طلبی

    کینٹ ویوہاؤسنگ سوسائٹی سیالکوٹ کیس، خواجہ آصف کی کل نیب میں طلبی

    لاہور : قومی احتساب بیورو ( نیب ) نے کینٹ ویوہاؤسنگ سوسائٹی سیالکوٹ کیس میں مسلم لیگ ن کے رہنما خواجہ آصف کوکل طلب کرلیا، خواجہ آصف 26 جون کو طلبی پر پیش نہیں ہوئے تھے۔

    تفصیلات کے مطابق نیب لاہور نے مسلم لیگ ن کے سابق وفاقی وزیر خواجہ آصف کو کل طلب کرلیا، انھیں گیارہ بجے مطلوبہ دستاویزات سمیت پیش ہونےکی ہدایت کی گئی ہے، خواجہ آصف کوکینٹ ویوہاؤسنگ سوسائٹی سیالکوٹ کیس میں طلب کیاگیاہے۔

    نیب نوٹس کے مطابق خواجہ آصف سے کینٹ ویوسوسائٹی میں ان کی اوران کے اہلخانہ کی سرمایہ کاری کے ذرائع کا پوچھا گیا ہے۔

    مزید پڑھیں :کینٹ ہاوسنگ سو سائٹی سیالکوٹ کیس ،خواجہ آصف کی نیب میں پیش ہونے سے معذرت

    یاد رہے خواجہ آصف کو چھبیس جون کوبھی طلب کیاگیاتھالیکن وہ پیش نہیں ہوئے تھے اور ان کے وکیل نے نیب میں پیش ہو کر جواب جمع کرایا تھا، جس میں خواجہ آصف نے قومی اسمبلی کے بجٹ اجلاس میں شرکت کے باعث نیب لاہور میں پیش ہونے سے معذرت کی تھی۔

    نیب ذرائع کے مطابق خواجہ آصف پر الزام ہے کہ انہوں نے موجودہ زمین سے زیادہ فروخت کر دی،خواجہ آصف پر اختیارات سے تجاوز کرنے کا بھی الزام ہے۔خواجہ آصف نے اختیارات کا استعمال کرتے ہوئے ہاؤسنگ سوسائٹی کےلیے ایک سو سینتیس کنال راضی پر مبینہ طور قبضہ کر کہ غیرقانونی فروخت کاالزام ہے۔ خواجہ آصف کی اہلیہ، بیٹے اور سابق میئرسیالکوٹ توحید اختر چودھری کو بھی شامل تفتیش کیا جا چکا ہے۔

    خیال رہے خواجہ آصف پراختیارات سےتجاوزکرنےکا الزام ہے جبکہ کیس میں خواجہ آصف کے اہلخانہ بھی نامزدہیں، ان کے اہلخانہ پہلےہی بیان ریکارڈ کرا چکے ہیں۔

  • نیب نے کرپشن کیسز میں 5 ارب 60 کروڑ روپے سے زائد قومی دولت وصول کرلی

    نیب نے کرپشن کیسز میں 5 ارب 60 کروڑ روپے سے زائد قومی دولت وصول کرلی

    لاہور : قومی احتساب بیورو لاہور نے گزشتہ 2 سالوں کے دوران مختلف کرپشن کیسز میں ملوث ملزمان سے 5 ارب 60 کروڑ روپے سے زائد قومی دولت وصول کر لی۔

    تفصیلات کے مطابق نیب لاہور کی جانب سے 2سالوں کے دوران کرپشن کیسز میں ملوث ملزمان سے دولت کی برآمدگی کے حوالے سے تفصیلات جاری کردیں۔

    نیب لاہور نے ڈائریکٹر جنرل شہزاد سلیم کی سربراہی میں اکتوبر 2017 سے تاحال مجموعی طور پر 8 ارب 11 کروڑ روپے سے زائد رقوم کی پلی بارگین کیں، جن میں سے 5 ارب 60 کروڑ سے زائد رقم وصول کی جا چکی ہے۔ 3 ارب 20 کروڑ 48 لاکھ روپے کی خطیر رقم متعلقہ متاثرین میں واپس تقسیم بھی کر دی گئی۔

    نیب لاہور کے مطابق ان ڈائریکٹ ریکوری کے طور پر 31 ارب مالیت کی ریکوری بھی ممکن بنائی گئی ہے، ہاؤسنگ سیکٹر میں بھی نیب لاہور نے 2 سال کے دوران مجموعی طور پر شاندار کارکردگی کا عملی مظاہرہ کرتے ہوئے زیر تفتیش 62 کیسز میں سے 40 کیسز کو پایہ تکمیل تک پہنچایا ہے۔

    نیب لاہور میں فی الوقت ہاؤسنگ سیکٹر کے 22 کیسز زیر تحقیقات ہیں، گزشتہ 2 سال کے دوران غیر قانونی ہاؤسنگ سوسائٹیوں کے 24300 متاثرین کیلئے 3000 ملین کی پلی بارگین ممکن بنائی گئی۔

    تفصیلات کے مطابق ڈی جی نیب لاہور کی سربراہی میں 2800 ملین کی رقوم صرف ہاؤسنگ سیکٹر میں ملزمان سے برآمد کروائی جا چکی ہے، افسران کی انتھک محنت کے باعث 25 ارب روپے مالیت کی بلواسطہ ریکوری پر عمل درآمد بھی کروایا جا چکا ہے۔

    اکتوبر 2017 سے اگست 2019 کے دوران نیب پراسیکیوشن ونگ نے 26 ارب مالیت پر مشتمل 7 ریفرنسز احتساب عدالتوں میں دائر کیے ہیں، مبینہ غیر قانونی ہاؤسنگ سوسائٹیوں کے ان 7 ریفرنسز میں متاثرین کی مجموعی تعداد 21 ہزار 750 ہے۔

    نیب لاہور کے تفتیشی افسران اور پراسیکیوٹرز ان تمام متاثرین کے حقوق انہیں واپس دلوانے کیلئے عدالتوں میں کیسز لڑ رہے ہیں۔

    2 سالہ کارکردگی کے اجراء پر ڈی جی نیب لاہور نے کہا کہ نیب کی تمام تر کاوشیں عوام اور صرف عوام کے مفادات ہیں۔

  • حمزہ شہباز کی بیوی ہونے کی دعویدار عائشہ احد نے اپنا بیان نیب میں جمع کرادیا

    حمزہ شہباز کی بیوی ہونے کی دعویدار عائشہ احد نے اپنا بیان نیب میں جمع کرادیا

    لاہور : عائشہ احد ملک نے نیب لاہور میں حمزہ شہباز شریف کے خلاف کیس میں اپنا بیان نیب میں جمع کرا دیا، جس میں کہا نیب نے ماڈل ٹاون میں موجود جس پلاٹ سے متعلق جواب طلب کیا ہے اس کا کوئی ریکارڈ موجود نہیں۔

    تفصیلات کے مطابق حمزہ شہباز شریف کے خلاف نیب میں زیر تفتیش کیس میں اہم پیش رفت ہوئی، عائشہ احد ملک نے نیب لاہور میں حمزہ شہباز شریف کے خلاف کیس میں اپنا بیان نیب میں جمع کرا دیا۔

    عائشہ احد ملک نے اپنے وکیل کے ذریعے تحریری جواب نیب لاہور میں جمع کرایا۔

    عائشہ احد نے اپنے بیان میں کہا نیب لاہور نے ماڈل ٹاون میں موجود جس پلاٹ سے متعلق جواب طلب کیا ہے اس کا کوئی ریکارڈ موجود نہیں۔

    نیب نے عائشہ احد سے سوال کیا تھا کہ عائشہ احد کے والد ملک عبد الاحد نے ماڈل ٹاون سوسائٹی میں موجود پلاٹ نمبر نائن بی 2014 میں محمود الحسن بٹ کو منتقل کیا۔

    عائشہ احد سے پوچھا گیا نیب لاہور حمزہ شہباز شریف کے خلاف اینٹی منی لانڈرنگ کے کیس کی تحقیقات کر رہا ہے شک ہے کہ ماڈل ٹاون کا پلاٹ بھی منی لانڈرنگ سے خریدا گیا، ماڈل ٹاون سوسائٹی سے متعدد بار پلاٹ کا پلاٹ فراہم کرنے کے لئے رابطہ کیا گیا لیکن سوسائٹی انتظامیہ تعاون نہیں کر رہی۔

    ائشہ احد نے نیب کو جواب دیا کہ نیب لاہور کے پاس اختیار موجود ہے، جس کا استعمال کرتے ہوئے وہ سوسائٹی سے ریکارڈ حاصل کرے اور ہمیں بھی ریکارڈ کی تفصیل مہیا کیا جائے۔

  • پنجاب یوتھ فیسٹیول میں کرپشن : سابق ڈی جی اسپورٹس عثمان انور گرفتار

    پنجاب یوتھ فیسٹیول میں کرپشن : سابق ڈی جی اسپورٹس عثمان انور گرفتار

    لاہور : قومی احتساب بیورو نے پنجاب اسپورٹس فیسٹیول کرپشن کیس میں کارروائی کرتے ہوئے سابق ڈی جی اسپورٹس بورڈ پنجاب عثمان انور کو گرفتار کرلیا۔ آج عدالت میں پیش کیا جائے گا۔

    تفصیلات کے مطابق قومی احتساب بیورو (نیب) لاہور نے پنجاب یوتھ فیسٹیول میں مبینہ طور پر کروڑوں روپے کی کرپشن کے کیس میں سابق ڈی جی اسپورٹس ملزم عثمان انور کو گرفتار کرلیا۔

    دوہزار گیارہ اور بارہ کے یوتھ فیسٹیولز میں مبینہ طورپر مختلف معاہدوں کی مد میں کروڑوں روپے کی کرپشن کی گئی۔ نیب حکام کے مطابق سابق ڈی جی اسپورٹس عثمان انور مبینہ طور پر اختیارات کا ناجائز استعمال کرتے ہوئے یوتھ ایونٹ کیلئے کئے گئے ٹھیکوں میں مالی بے ضابطگیوں کے مرتکب ٹھہرے۔

    ان معاہدوں میں پیپرا رولز سے بھی انحراف کیا گیا، ملزم محمد عثمان انور کو جسمانی ریمانڈ کے حصول کیلئے آج احتساب عدالت کے روبرو پیش کرینگے۔

    مزید پڑھیں: نیب نے پنجاب کے وزیر جنگلات سبطین خان کو گرفتار کر لیا

    واضح رہے کہ گزشتہ ہفتے قومی احتساب بیورو (نیب) لاہور نے صوبائی وزیر جنگلات سبطین خان کو بھی غیر قانونی ٹھیکوں کا الزام پر گرفتار کیا تھا، وہ وزیر اعظم کے آبائی حلقے میانوالی سے ایم پی اے منتخب ہوئے تھے۔

  • ڈی جی نیب جعلی ڈگری کیس، تمام دستاویزات کا جائزہ لے کر کیس کا فیصلہ کریں گے، جسٹس عظمت سعید

    ڈی جی نیب جعلی ڈگری کیس، تمام دستاویزات کا جائزہ لے کر کیس کا فیصلہ کریں گے، جسٹس عظمت سعید

    اسلام آباد : ڈی جی نیب سلیم شہزاد کی جعلی ڈگری کیس میں نیب نے عدالت عظمیٰ میں اپنی رپورٹ پیش کر دی، جسٹس عظمت سعید شیخ نے ریمارکس دیے کہ تمام دستاویزات کا جائزہ لے کر کیس کا فیصلہ کریں گے۔

    تفصیلات کے مطابق سپریم کورٹ میں جسٹس عظمت سعید شیخ کی سربراہی میں تین رکنی بنچ نے قومی احتساب بیورو لاہور کے ڈی جی سلیم شہزاد کی جعلی ڈگری سے متعلق کیس کی سماعت کی۔

    نیب کی جانب سے رپورٹ عدالت میں بند لفافے میں پیش کی گئی، وکیل اظہر صدیق نے کہا سپریم کورٹ کے فیصلے پر عمل درآمد ہو چکا ہے، درخواست گزار کوئی نیا پینڈورا بوکس کھولنا چاہتے ہیں، جس پر جسٹس عظمت سعید نے ریمارکس دیے ڈائیلوگ بولیں گے تو نہیں سنیں گے، دھیمی آواز میں بات کریں۔

    ایڈیشنل ڈائریکٹر نیب نے بتایا شہزاد سلیم کی ڈگری پر رپورٹ اور جواب جمع کرایا ہے، جس پر جسٹس عظمت سعد شیخ نے ریمارکس دیے کہ تمام دستاویزات کا جائزہ لے کر کیس کا فیصلہ کریں گے، جس کے بعد عدالت نے کیس کی مزید سماعت 2 ہفتوں کے لئے ملتوی کردی۔

    خیال رہے ڈی جی نیب لاہور کی مبینہ جعلی ڈگری کے خلاف اسد کھرل نے سپریم کورٹ میں درخواست دائر کی تھی۔

    واضح رہے کہ شہزاد سلیم کی ڈگری جعلی ہونے کی خبروں کو نیب کے ترجمان مسترد کرچکے ہیں، نیب کے ترجمان نےوضاحتی بیان میں کہا تھا کہ نیب افسر کی ڈگری 2002ء میں جاری ہوئی اور ہائر ایجوکیشن کمیشن سے باقاعدہ تصدیق شدہ ہے، جس کے بعد ایچ ای سی نے بھی نیب کے مؤقف کی تصدیق کی تھی۔

    خیال رہے ڈی جی نیب لاہور شہزاد سلیم نے لندن فلیٹس ریفرنس تیار کیا تھا اور شریف خاندان کی ٹرسٹ ڈیڈ کو جعلی قرار دیا تھا۔

  • لاہور: سرگودھا یونیورسٹی کے پروفیسر جاوید اقبال کیمپ جیل میں انتقال کر گئے

    لاہور: سرگودھا یونیورسٹی کے پروفیسر جاوید اقبال کیمپ جیل میں انتقال کر گئے

    لاہور : ‏سرگودھا یونیورسٹی لاہور کیمپس کے ڈائریکٹر پروفیسر جاوید اقبال کیمپ جیل میں انتقال کر گئے، جیل انتظامیہ کا کہنا ہے کہ دل کا دورہ جان لیوا ثابت ہوا۔

    تفصیلات کے مطابق سرگودھا یونیورسٹی کرپشن کیس میں نیب کے زیر حراست پروفیسر جاوید حرکت قلب بند ہوجانے کے باعث انتقال کرگئے۔

    اس حوالے سے جیل حکام کا کہنا ہے کہ پروفیسر جاوید  اقبال کو اچانک طبیعت خراب ہونے پر سروسز اسپتال لے جایا گیا تھا ان ابتدائی طبی امداد کے بعد اسپتال سے روانہ کردیا گیا تھا ، وہ  اسپتال سے جیل پہنچے جہاں وہ دل کا دورہ پڑنے سے جاں بحق ہوئے۔

    بعد ازاں ان کی لاش کو پوسٹ مارٹم کیلئے اسپتال منتقل کردیا گیاہے، یاد رہے کہ پروفیسر جاوید سرگودھا یونیورسٹی کے غیرقانونی کیمپسز کھولنے کے الزام میں جوڈیشل ریمانڈ پر جیل میں تھے۔

    میڈیا میں چلنے والی خبروں پر قومی احتساب بیورو نے اپنے ردعمل میں اس تاثر کی سختی سے تردید کی ہے کہ مرحوم جاوید اقبال کا انتقال نیب کی حراست میں نہیں ہوا۔

    احتساب عدالت نے جاوید احمد کو اکتوبر2018 میں ہی جوڈیشل کردیا تھا اور کیمپ جیل لاہور حکام نے ملزم کی کسٹڈی لیتے وقت مرحوم کی صحت کے حوالے سے باقاعدہ تصدیق بھی دی گئی تھی، ترجمان نیب کی جانب سے مرحوم کی وفات پر گہرے دکھ کا اظہار کیا گیا ہے۔ یاد رہے کہ پروفیسر میاں محمد جاوید سمیت دیگر افراد کو نیب نے اکتوبر میں گرفتار کیا تھا۔

    واضح رہے کہ کچھ روز قبل نیب کی جانب سے ریٹائرڈ اساتذہ کو ہتھکڑیوں میں جکڑ کر عدالت میں پیش کیا گیا تھا جس پر پورے ملک میں طوفان برپا ہوگیا تھا۔

    چیف جسٹس آف پاکستان کی جانب سے بھی اس واقعے کا نوٹس لیا گیا تھا جس پر ڈی جی نیب لاہور نے روتے ہوئے معافی مانگی تھی۔

  • پیراگون ہاؤسنگ سوسائٹی : خواجہ سعد رفیق اور سلمان رفیق کو نیب نے طلب کرلیا

    پیراگون ہاؤسنگ سوسائٹی : خواجہ سعد رفیق اور سلمان رفیق کو نیب نے طلب کرلیا

    لاہور : قومی احتساب بیورو لاہور نے خواجہ سعد رفیق اور ان کے بھائی سلمان رفیق کو طلب کرلیا، دونوں افراد کو پیراگون سٹی کیس میں طلب کیا گیا ہے۔

    تفصیلات کے مطابق سابق وزیر ریلوے خواجہ سعد رفیق، ان کے بھائی اور سابق صوبائی وزیر برائے صحت خواجہ سلمان رفیق کو نیب لاہور نے پیراگون ہاؤسنگ سوسائٹی اسکینڈل کیس میں پوچھ گچھ کیلئے طلب کیا ہے۔

    قومی احتساب بیورو نے دونوں بھائیوں کو15اگست کو خود پیش ہونے کا حکم جاری کردیا، اس حوالے سے ذرائع کا کہنا ہے کہ حکم نامے میں دونوں شخصیات کو ہدایت کی گئی ہے کہ اپنے ساتھ پیراگون ہاؤسنگ سوسائٹی کا ریکارڈ لے کرآئیں۔

    یاد رہے کہ اس سے قبل بھی سعد رفیق اور ان کے بھائی مشیر صحت سلمان رفیق محکمہ صحت میں ہونے والی کرپشن سے متعلق نیب میں پیشی بھگت چکے ہیں۔

    مزید پڑھیں: پنجاب کمپنیز اسکینڈل، نیب نے شہباز شریف کو پھر طلب کرلیا

    واضح رہے کہ سابق وزیر اعلیٰ پنجاب شہباز شریف کو بھی پنجاب کمپنیز اسکینڈل میں قومی احتساب بیورو نے ایک بار پھر طلب کر لیا، شہباز شریف کو بیس اگست کو پیش ہونے کا نوٹس جاری کیا گیا ہے۔