لاہور : توشہ خانہ کیس میں اہم پیشرفت سامنے آئی ہے، ذرائع کا کہنا ہے کہ چیئرمین پی ٹی آئی عمران خان کی رہائش گاہ نیب ٹیم پہنچ گئی۔
اس حوالے سے ذرائع کا کہنا ہے کہ مذکورہ ٹیم عمران خان اور ان کی اہلیہ بشریٰ بی بی کو طلبی کے نوٹس پر دستخط کرانے کے لیے آئی ہے۔
ذرائع کے مطابق لاہور میں زمان پارک کی رہائش گاہ پر عمران خان کے وکیل نے نیب کا نوٹس وصول کرلیا ہے، واضح رہے کہ عمران خان اور ان کی اہلیہ کو9مارچ کو نیب اسلام آباد نےطلب کر رکھا ہے۔
واضح رہے کہ گزشتہ روز توشہ خانہ کیس میں قومی احتساب بیورو (نیب) نے چیئرمین پاکستان تحریک انصاف عمران خان کی اہلیہ بشریٰ بی بی شاہ محمود قریشی، فواد چوہدری اور پرویز خٹک کو سمن جاری کر دیا۔ انہیں 9 مارچ جبکہ پرویز خٹک کو 8 مارچ کے روز طلب کیا گیا ہے۔
اس کے علاوہ قومی احتساب بیورو نے توشہ خانہ کیس کی مزید تحقیقات کے لیے ٹیم متحدہ عرب امارات بھیجنے کا فیصلہ کیا ہے جو جلد ہی روانہ ہوگی۔
توشہ خانہ کیس : عمران خان، بشریٰ بی بی سمیت 5 رہنما طلب
عمران خان کو بھیجے گئے نوٹس میں 6 قیمتی گھڑیوں، قطر کے چیف آف آرمڈ اسٹاف کا دیا آئی فون، کف لنکس، انگوٹھی، ڈائمنڈ کی گراف کمپنی کا قلم اور سعودی عرب کے بادشاہ کی جانب سے دیے گئے کپڑے تحقیقات میں شامل ہیں۔
