کراچی : اسپیکر سندھ اسمبلی آغا سراج درانی کی گرفتاری کیلئے نیب کی ٹیم نے ان کی رہائش گاہ پر چھاپہ مارا ہے۔
تفصیلات کے مطابق سندھ ہائیکورٹ کی جانب سے اسپیکر سندھ اسمبلی آغا سراج درانی کی ضمانت مسترد ہونے کے بعد نیب ٹیم نے کارروائی کا آغاز کردیا۔
اب تک کی اطلاعات کے مطابق آغا سراج درانی کی رہائش گاہ پر تعینات سیکیورٹی گارڈز نے نیب کی ٹیم کو گھر کے اندر جانے سے روک دیا۔
اس حوالے سے اے آر وائی نیوز سے گفتگو کرتے ہوئے سابق صوبائی وزیر امتیاز شیخ نے کہا کہ آغا سراج پارٹی کے سینئر رہنما اور میرے دوست ہیں، آغا سراج درانی سے رابطہ نہیں ہوسکا اس لئے نہیں معلوم وہ اس وقت کہاں ہیں۔
امتیاز شیخ کا کہنا تھا کہ آغا سراج اور خورشید شاہ جیسے لوگوں کےاہل خانہ کو ہراساں کیا جارہا ہے، لازمی ہے کہ آغا سراج درانی اعلیٰ عدالتوں سے رجوع کریں گے
سابق صوبائی وزیر کا کہنا تھا کہ ہمیں امید ہے کہ اعلیٰ عدالتوں سے آغا سراج درانی کو ریلیف ملے گا، سیاست میں غلط روایت ڈالی جارہی ہے جو مناسب عمل نہیں ہے۔
واضح رہے کہ سندھ ہائی کورٹ نے آمدن سے زائد اثاثے بنانے سے متعلق نیب ریفرنس میں اسپیکر سندھ اسمبلی آغا سراج درانی سمیت 9 ملزمان کی درخواست ضمانت مسترد کردی، اہلیہ اور بیٹوں سمیت 9 کی ضمانت منظور کرلی گئی۔
سندھ ہائیکورٹ کی دو رکنی خصوصی بینچ نے نیب ترمیمی آرڈیننس کے اجراء سے قبل فیصلہ محفوظ کیا تھا، ذرائع کے مطابق آغا سراج درانی کےخلاف ایک ارب سے زائد کے غیر قانونی اثاثے بنانے کا الزام ہے۔ جسٹس ندیم اختر اور جسٹس اقبال کلہوڑو پر مشتمل اسپیشل بیچ نے فیصلہ جاری کیا۔
