Tag: NAB

لاہور: احتساب عدالت نے عوام کو جمع پونجی سے محروم کرنے والے ملزم جاوید مظفر کی پلی بارگین کی درخواست منظور کر لی۔

اے آر وائی نیوز کے مطابق نیب کورٹ نے سادہ لوح عوام کے ساتھ 3 ارب روپے کے فراڈ کیس میں ملوث ملزم جاوید مظفر بٹ کی 1 ارب 20 کروڑ کی پلی بارگین کی درخواست منظور کر لی۔

اس کیس میں ایک اور ملزم ملک عثمان ریاض سے نیب لاہور نے 72 کروڑ کی پہلی پلی بارگین مارچ 2020 میں کی تھی، پلی بارگین کے بعد اپریل میں عثمان ریاض کی رہائی کا حکم دیا گیا تھا۔

یاد رہے کہ عثمان ریاض اور جاوید مظفر نے گوجرانوالہ اور دیگر شہروں میں سادہ لوح شہریوں کو گاڑیاں دینے کا جھانسا دے کر اربوں روپے لوٹے تھے، سیکڑوں لوگوں نے گاڑیوں کی بکنگ کروائی، اور ڈیلرز پیسے لے کر بیرون ملک بھاگ گئے۔ ٹیوٹا موٹرز اسیکنڈل میں مرکزی ملزم عثمان ریاض کے خلاف دھوکا دہی کی شکایت پر نیب لاہور نے مئی 2019 میں تحقیقات کا آغاز کیا تھا۔ ستمبر 2019 میں تحقیقاتی ٹیم کی درخواست پر ملزم جاوید مظفر کو بھی گرفتار کیا گیا۔

نیب کا کہنا ہے کہ ملزمان کے خلاف مجموعی طور پر 647 مستند شکایات ملی تھیں، جو ریکارڈ کا حصہ ہیں، اکتوبر 2019 میں 14 کروڑ کی 8 نئی گاڑیاں، اور 42 گاڑیوں کے کاغذات متاثرین کو دیے گئے تھے۔

نیب لاہور کے ترجمان نے کہا کہ چیئرمین نیب کی ہدایت ہے کہ عوام کی لوٹی رقم کی برآمدگی ہماری ترجیح ہے، ڈیڑھ سال میں اس کیس میں نیب لاہور نے 1 ارب 92 کروڑ کی پلی بارگین کی ہے، پلی بارگین ایک مکمل سزا ہے، اس میں ملزم سے مکمل رقوم کی وصولی ہوتی ہے، اور وہ سزا یافتہ تصور کیا جاتا ہے۔

ترجمان کا کہنا تھا نیب لاہور کا 2020 کے دوران ملزمان کو سزائیں دلوانے کا تناسب 78 فی صد رہا، یہ نیب لاہور کی شان دار کامیابی کا مظہر ہے۔

لاہور: گرین ویو کوآپریٹو ہاؤسنگ سوسائٹی کے سابق صدر میاں رفاقت علی کو نیب نے گرفتار کر لیا۔

تفصیلات کے مطابق نیب کے ہاتھوں گرفتار رفاقت علی پر سوسائٹی کے رقبے میں مبینہ خورد برد اور سرمایہ حاصل کرنے کا الزام ہے۔

قومی احتساب بیورو کا کہنا ہے کہ ملزم اور ان کے اہل خانہ نے مجموعی طور پر 40 کروڑ سے زائد مالیت کے اثاثے بنائے ہیں، ملزم اور اہل خانہ کے 100 سے زائد بینک اکاؤنٹس کا بھی انکشاف ہوا ہے۔

نیب لاہور کے مطابق ملزم سوسائٹی کی ترقی کے نام پر 5 کروڑ کی خورد برد کا مرتکب ٹھہرا، نیب کو گرین ویو کوآپریٹو سوسائٹی کے خلاف 70 سے زائد شکایات ملی تھیں جس پر کارروائی کی گئی۔

نیب نے بتایا کہ دوران تحقیقات ملزم رفاقت علی اثاثہ جات کے ذرائع ثابت کرنے میں ناکام رہے، ملزم کو ضمانت قبل از گرفتاری کی منسوخی کے بعد گرفتار کیا گیا۔

نیب کے بیان کے مطابق ملزم رفاقت علی کو جسمانی ریمانڈ کے لیے کل احتساب عدالت میں پیش کیا جائے گا۔

یاد رہے کہ کچھ عرصہ قبل نیب لاہور نے پنجاب کے ایک اہم بیوروکریٹ گریڈ 19 کے چیف انجینئر ٹیپا مظہر حسین کو گرفتار کیا تھا، ملزم پر 70 کروڑ سے زائد مالیت کے اثاثے اور بینک اکاؤنٹس بنانے کا الزام تھا۔

ملزم مظہر حسین ایل ڈی اے میں بطورچ یف انجینئر بھی تعینات رہے اور مبینہ طور پر 50 کروڑ کے اثاثے اپنے اور اہل خانہ کے نام بنائے، ملزم نے ملازم بھانجے کے نام 20 کروڑ روپے بھی منتقل کیے۔