Tag: NAB

اسلام آباد: قومی احتساب بیورو (نیب) نے پاکستان مسلم لیگ ن کے سیکریٹری جنرل احسن اقبال کے خلاف ریفرنس جمع کرانے کے لیے پھر مہلت مانگ لی۔

اے آر وائی نیوز کے مطابق احسن اقبال کے خلاف نارووال اسپورٹس سٹی کرپشن کیس کی سماعت کے دوران نیب نے ریفرنس جمع کرانے کے لیے پھر مہلت مانگ لی ہے۔

نیب نے اسلام آباد ہائی کورٹ کو بتایا کہ گواہوں کو طلب کیا گیا تھا لیکن وہ کرونا کی وجہ سے نیب میں پیش نہیں ہو رہے، احسن اقبال نے کہا کہ اگر گواہ ہی نہیں ہیں تو مجھے 2 ماہ جیل میں کیوں رکھا ؟

عدالت نے نیب سے نارووال کیس کا ریفرنس پیش نہ کرنے پر رپورٹ طلب کر لی، جج نے سماعت کرتے ہوئے کہا ایسے نہیں چلے گا، تفصیل بتائیں ریفرنس دائر کرنے میں کیا مشکل درپیش ہے؟ دریں اثنا، عدالت نے نارووال اسپورٹس سٹی کیس کی سماعت 20 جولائی تک ملتوی کر دی۔

نارووال اسپورٹس سٹی کیس ،احسن اقبال کیخلاف انکوائری کوانویسٹی گیشن میں تبدیل

عدالت کے باہر احسن اقبال نے میڈیا سے گفتگو کرتے ہوئے نیب پر تنقید کی کہ نام نہاد احتساب میں صرف کردار کشی کی جا رہی ہے، نیب کو لگا دیا جاتا ہے کہ کیس بنا کر لاؤ، لیکن ہم ان کا مقابلہ کریں گے، اس حکومت کے جانے کا وقت آ چکا ہے۔

احسن اقبال کا کہنا تھا چینی چوروں کو بچانے کے لیے پوری شوگر انڈسٹری کو چور بنا دیا گیا ہے اور تمام شوگر ملز کے خلاف ایف آئی آر کاٹ دی گئی ہے، حکمران ایک ایک کر کے ہر شعبے کو تباہ کر رہے ہیں، ن لیگ دور میں چینی کی قیمت 52 سے 53 روپے رہی، اب چینی 70 روپے فی کلو ہو چکی ہے، ایک طیارہ کریش ہونے پر بھی پوری انڈسٹری کو داؤ پر لگا دیا گیا ہے، ملک کی ایوی ایشن انڈسٹری مذاق بن گئی۔

انھوں نے نواز شریف کی صحت سے متعلق بتایا کہ نواز شریف کی صحت بہتر ہو رہی ہے، دل کے پروسیجر کی ضرورت ہے، اپائنمنٹ ملنے پر دل کا پروسیجر ہوگا۔

لاہور: قومی احتساب بیورو (نیب) کے دستاویزات میں یہ انکشاف کیا گیا ہے کہ میاں شہباز شریف کے خاندان کے اثاثوں میں کیسے اضافہ ہوا۔

اے آر وائی نیوز کے مطابق نیب کے دستاویزات سے شہباز شریف خاندان کے اب تک 2 ارب 40 کروڑ کے بے نامی داروں کی تفصیلات سامنے آ گئیں، شہباز فیملی کی 4 بے نامی کمپنیاں جب کہ 3 بے نامی دار ہیں۔

نیب دستاویزات میں انکشاف کیا گیا ہے کہ شہباز خاندان کے بے نامی دار نثار احمد، سید طاہر نقوی اور علی احمد ہیں، جب کہ بے نامی کمپنیوں میں گڈ نیچر، یونی ٹاس، وقار ٹریڈنگ اور نثار ٹریڈنگ شامل ہیں۔

نیب کے مطابق سابق وزیر اعلیٰ پنجاب شہباز شریف جب سیاست میں آئے تو 1990 میں 21 لاکھ کے اثاثوں کے مالک تھے، لیکن دس سال بعد 2000 میں شہباز شریف کے اثاثے 1 کروڑ 50 لاکھ 90 ہزار تھے، 2018 میں ان کے اثاثے 18 کروڑ 96 لاکھ 49 ہزار تک پہنچ گئے۔

شہباز شریف کی عبوری ضمانت میں 29 جون تک توسیع

نیب دستاویزات میں مزید کہا گیا ہے کہ بیگم نصرت شہباز کے 2003 میں اثاثے صفر تھے، 2009 میں 13 کروڑ 41 لاکھ، اور 2018 میں 23 کروڑ 34 لاکھ ہو گئے۔

حمزہ شہباز کے 2000 میں اثاثے 2 کروڑ 22 لاکھ تھے جب کہ 2018 میں 41 کروڑ 71 لاکھ ہو گئے، سلمان شہباز کے اثاثے 2002 میں 65 کروڑ 50 لاکھ تھے، 2018 میں 2 ارب 58 کروڑ 98 لاکھ ہو گئے، رابعہ عمران کے اثاثے 1999 میں 1 کروڑ 69 لاکھ تھے، 2018 میں 11 کروڑ 81 لاکھ سے زائد ہو گئے۔

لاہور: آمدن سے زائد اثاثوں اور مبینہ منی لانڈرنگ کیس میں اپوزیشن لیڈر شہباز شریف کی آج نیب میں پیشی ہے۔

اے آر وائی نیوز کے مطابق شہباز شریف نے آج آمدن سے زائد اثاثہ جات اور منی لانڈرنگ کیس میں نیب کے سامنے پیش ہونے کا فیصلہ کر لیا ہے۔

پارٹی ذرایع کا کہنا ہے کہ شہباز شریف کی پیشی پر کارکنوں کو نیب آفس پہنچنے کی ہدایت کی گئی ہے۔ دوسری طرف شہباز شریف کی نیب دفتر میں طلبی کے سلسلے میں دفتر کے باہر بڑی تعداد میں پولیس اہل کار تعینات کر دیے گئے ہیں۔

نیب دفتر کے باہر رکاوٹیں بھی کھڑی کر دی گئیں، پولیس کی گاڑیاں اور پریزن وین بھی منگوا لی گئی۔

یاد رہے کہ شہباز شریف نے دو دن قبل قانونی ٹیم سے مشاورت کے بعد نیب کے سامنے پیش ہونے کا فیصلہ کیا تھا، اپوزیشن لیڈر نے امجد پرویز ایڈووکیٹ اور اعظم نذیر تارڑ سے مشاورت کی تھی۔

نیب نے شہباز شریف کو آمدن سے زائد اثاثہ جات اور منی لانڈرنگ کیس میں 9 جون کو طلب کیا تھا، عدالت نے اس کیس میں شہباز شریف کی درخواست ضمانت قبل از گرفتاری بھی منظور کرتے ہوئے نیب کو 17 جون تک انہیں گرفتار کرنے سے روک رکھا ہے۔

اس سے قبل قومی احتساب بیورو (نیب) نے مسلم لیگ ن کے صدر اور قومی اسمبلی میں قائد حزب اختلاف شہباز شریف کو 2 جون کو طلب کیا تھا، نیب کی جانب سے شہباز شریف کو مفصل سوال نامہ بھی فراہم کیا گیا تھا اور جوابات کے لیے مناسب وقت بھی دیا گیا تھا۔ اپوزیشن لیڈر کی خواہش پر انھیں مزید وقت فراہم کیا گیا تھا، تاکہ بیرون ملک سے مطلوبہ ریکارڈ حاصل کر سکیں۔