گوجرانوالہ : ٹریفک وارڈن بن کردس سال تک شہریوں کو لوٹنے والا جعلساز بالاخر قانون کے ہتھے چڑھ گیا، جس سےجعلی سروس کارڈ، پستول، یونیفارم بیجز اور دیگر آلات برآمد کرلئے۔
تفصیلات کے مطابق نقلی ٹریفک اہلکار دس سال بعد اصلی ٹریفک پولیس کی گرفت میں آگیا، ملزم شہزاد انور جعلی ٹریفک وارڈن بن کر بس اسٹاپ کے قریب شہریوں کے چالان کر رہا تھا، اسی دوران اصلی ٹریفک وارڈن موقع پر پہنچ گیا۔
اپنی جگہ اسے دیکھ کرشہزاد سے پوچھ گچھ کی تو وہ گھبرا گیا، شک ہونے پر اسے پکڑلیا۔
سٹی ٹریفک پولیس کا کہنا ہے کہ گوجرنوالہ کا شہری شہزاد جو ٹریفک وارڈن کا روپ دھارے شہریوں کے چالان کرکے جعلی رسیدیں دیتا تھا، جعلی ٹریفک وارڈن سے جعلی سروس کارڈ، چالان کی رقم ، پستول، یونیفارم بیجز برآمد ہوئے۔
دوران تفتیش ملزم نے بتایا کہ وہ گزشتہ 10 سال سے ٹریفک وارڈنز کا یونیفارم پہن کر لوگوں کو لوٹ رہا ہے۔
پولیس کا کہنا ہے ملزم کے خلاف مقدمہ درج کرلیا گیا ہے اور تحقیقات کی جارہی ہیں۔
