باکسنگ کے شعبے میں پاکستان کا نام سربلند کرنے والے جنوبی وزیرستان کے بلال محسود اور لیاری کے نادر بلوچ اپنی آئندہ فائٹ جیتنے کے لئے پر عزم ہیں۔
یہی وجہ ہے کہ عالمی سطح پر پاکستان کا نام روشن کرنے کی امید لئے باکسر نادر بلوچ اور بلال محسود آج کل سخت تیاریوں میں مصروف ہیں، اے آر وائی نیوز کے نمائندہ خصوصی شعیب جٹ نے دونوں باکسرز سے خصوصی گفتگو کی۔
جنوبی وزیرستان سے تعلق رکھنے والے بلال محسود نے بتایا کہ میری نئی فائٹ سولہ جولائی کو افغانستان (کابل) میں ہونے جارہی ہے، یہ فائٹ جیت کر ایک اور فتح اپنے نام کرنا چاہوں گا۔
بلال محسود نے بتایا کہ وہ ایشین ڈبلیو بی سی اور ڈبلیو بی اے اور آئی بی اے ٹائٹل کوالیفائڈ ہیں، بلال کو یقین ہے کہ افغان باکسر کو ہرا کر وہ ورلڈ سرکٹ میں چلے جائیں گے۔
دوسری جانب نادر بلوچ بھی باکسنگ میں پاکستان کو کئی بڑی کامیابیاں دلواچکے ہیں، اب بھی جیت کے لئے پرعزم ہیں، نادر بلوچ نے بتایا کہ ان کی اگلی فائٹ افغان باکسر ہے ، یہ مقابلہ جیت کر اپنی ورلڈ رینکنگ کو مزید بہتر بناؤں گا، پرامید ہوں کہ ورلڈ ٹائٹل کے لئے کوالیفائی کرلوں گا۔
یاد رہے کہ نادر بلوچ نے سال دوہزار اٹھارہ میں پروفيشنل باکسنگ فائٹ ميں افغان باکسر کو پچھاڑ کر یونیورسل باکسنگ آرگنائزیشن ٹائٹل اپنے نام کیا تھا۔
